سەرنووچە:

سەرۆکاتیا هەرێمێ مۆلکێ پارتیە ؟

6/15/2019 11:45:47 AM
5566 جار خوێندراوەتەوە
ئۆمێد حاجی بەڕۆشکی
+ -

پشتی ١٢ ساڵێن سەرۆکاتیا مەسعود بارزانی و ٢ ساڵێن ڕاگرتنا ئەوی پۆستی، ئێدی بۆ چوار ساڵێن ئایندە ئەو پۆست بۆ نێچیرڤان بارزانی دبیت، ئەڤە ددەمەکی دایە بەریا ٢ ساڵان مەسعود بارزانی ڕاگەھاند بوو، ئەو خۆ و نە کەسەکێ نێزیکی خۆ بۆ وی پۆستی بەربژار ناکەت، لێ جووت حزبان ب ھاریکاریا گوڕان سیاسەتا چەواشەکاری پشتی ٢٧ ساڵان درێژە پێدا، ب شێوەکی ھەلبژارتنا سەرۆکێ ھەرێمێ دناڤ پەڕلەمانی دا ب ھەموو دەستھەڵاتان ڤە و پەڕلەمان نەشێت بۆ ئێک پەیڤ ژی دۆیڤچوونا کارێن سەرۆکێ ھەرێمێ بکەت!

ھەلبەت ئەڤە ژی درێژە دانە ب سیاسەتا چەواشەکاری کو نەدبوو بڤی ئاوایی با، چۆنکە پۆستێ سەرۆکێ ھەرێمێ ب دەسھەڵاتێن زێدە نەدبوو بۆ پارتی ھاتبا ئێک لاکرن چۆنکە ئەو پۆستە مافێ ھەر تاکەکێ ئەڤێ ھەرێمێ یە، ئەڤ پڕۆسا ھاتیە ئەنجامدان ب پەردە پۆشکرنا یاسایێ پارتی بۆ چوار ساڵێن ئایندە ژی دێ بڕیارا ئێک لاکەر لسەر سیاسەتا ھەرێمێ دەت ، تایبەت ژی ئەو بڕیار ب بۆچونا من دێ ژلایێ مەسعود بارزانی ڤە بیت، ھەر چەندە نھا سەرۆکێ ھەرێمێ نینە، لێ د پەیاما نێچیرڤان بارزانی و مەسرۆر بارزانی یا خوویا بۆ کو ئەو بۆ چوار ساڵێن ئایندە دێ لژێر فەرمانێن  دا بن و درێژە ب سیاسەتا وی دەن، لەوا ژی ئێدی پۆستێ سەرۆکاتیا ھەرێمێ بوویە مۆلکێ پارتی و تایبەت ژی مۆلکێ سەرۆکێ پارتێ مەسعود بارزانی ، ئەڤە ژی ئەوێ واتایێ نادەت کو گھوڕین ھاتینە کرن، بەلکۆ خەلکێ ھەرێمێ ھاتیە چەواشەکرن دبن دەقێن یاسایێ ڤە، کو ھەلبەت ددەمێ خۆ دا جووت حزبان یاسا دبەڕژەوەندا خۆ دا نڤیسینە و لگوڕ خاستا خۆ سەرەدەریێ دگەل یاسایێ دکەن.

بێدەنگبوونا ئۆپۆزسیونێ دئەڤێ پڕۆسێ دا تایبەت یەکگرتوویا ئیسلامی و بەشداریا وێ دمەڕاسیمێن سۆیند خۆارنا نێچیرڤان بارزانی دا، شەرعیەت دانە ب ئەڤێ چەواشەکاریا جووت حزبان کو چەندەھا ساڵە ئەنجامددەن و بێ ھیڤیکرنا ھاوڵاتیێن دلسوز و دەنگدەرێن ئۆپۆزسیۆنێ یە .