سەرنووچە:

پاداشتێ کوردا پشتی ژناڤبرنا داعشێ

10/13/2019 6:39:23 PM
7013 جار خوێندراوەتەوە
عەدنان محەمەدتاهر
+ -

داعشێ د دەستپێکا ھێرشێن خوە دا وەکی ئاگری مەزن بوو، چ ھێزەکێ نەشیا خوە بەر ڤی ئاگری بگریت، دەمەکێ کورت دا شیا دەوڵەتەکا مەزن دامەزرینن سەر ئەردێ سوریا و عێراق، لەشکرێن ڤان وەڵاتان نەشیان خوە بەر ھێزا داعش راگرن، سەرەرایی ھەبونا چەکێ مەزن و پێشکەفتی دەستێ ڤی لەشکری دا.

ب تنێ ھێزێن کوردستانی شەرڤان ل رۆژئاڤا و پێشمەرگە ل باشور شیان خوە راگرن و سەنگەر ساناھی چول نەکرن، لێ ژ بەر نەبوونا چەکێ پێتڤی دەستی دا مەترسی دروست بوو،  پشتی وەڵاتێن جیھانێ بریار دایی بەشەک ژ ھاریکاریێن لەشکری پنێرن بۆ ھێزێن کوردی، ئیدی داعش ژ دەوڵەتێ بەرەڤ نەمانێ چوو، ھنارتنا ڤی چەکی دەمەکێ دا بوو کو گەھشت بوو وی ئاستی ڤێ رێکخراوا درندە گەف زوور وەڵاتان دکرن، وەڵاتێن جیھانێ ئەڤ ھێزە ب مەترسی بوو سەر خوە ناساند، ھێزێن کوردی سەر ئەردی نوێنەراتیا جیھانێ شەر دکرن، ڤان شەران دا زیانێن مەزنێن مرۆڤی و مادی ھەبوون، سەدەھان ھێزێن کوردستانی بینە قوربان، ژێر خانا ئابوری وێران بوو، جورەکێ باژێرەکێ وەکی کوبانێ تمامی ھەرفت،  وەڵاتێن ھەڤپەیمان لەشکرێ وان ب تنێ جھێن بریارێ بوون و کێمترین زیان گەھایێ، راستی دا مفایێ وەڵاتێن بیانی شەرێ داعش گەلەک زێدەتر بوو ژ زیانێن گەھایێ، تایبەت مفایێن ئابوری و سیاسی.

ناڤبرنا دەوڵەتا داعش و روخاندنا پایتەخێ وان سەر دەستێ ھێزێن کوردستانی کارەکێ مەزن بۆ مێژووێ دا ھاتی تومارکرن، ئەو مەترسی راکر سەر خەلکێ وان وەڵاتان کو تەنانەت ژ دیتنا ڤیدیویێن ڤی شەری دا خەو چاڤا نەدکەفت،پشتی ڤێ خەباتا زوور وەسا ھزر دھات کرن کە ژ بەر ڤێ قوربانیا کوردان دایی ئیدی دێ جیھان رێز ڤێ قوربانیێ گریتن، ئەگەر ھەر چ نەبیت چ ئاستەنگیا درووست ناکەن کە کورد وان دەڤەرێن خوە رێڤەبەن ئەوێن ب خوین رزگارکری.

لێ مخابن زوور پێ نەچوو دەمێ ریفراندوما ھەرێما کوردستان ریێ راستەقینە زوور وەڵاتان دەرکەفت، بەشەک ژ وان وەڵاتان گلوپێ کەسک ھەلکر کە لەشکرێ عێراق ڤان ھەمی دەڤەرێن رزگارکری کونترول بکەن جارەکا دی پێشمەرگە زڤری خالا دەست پێکی، دەمەکێ دا ھزاران پێشمەرگە بین قوربانی ڤان دەڤەرا.

ئەڤرۆ روژئاڤایێ کوردستان ب ھەمان دەرد و سیناریوا باشورێ کوردستان و خرابتر دەرباز دبیت، پشتی ھەلکرنا گلوپی کەسک ژ لایێ ھەڤپەیمانان بۆ تورکیا عەفرین ھات داگیرکرن، ئەڤرۆ ھێرشەکا دی یا ھەمان رەنگ ھەیە بو داگیرکرنا دەڤەرێن دی یێن کوردستانی، ھەڤپەیمانێن کوردان تایبەت ئەمریکا بەردەوام کورد ب دوست و ھەڤپەیمان ددان ناسین دەمێ گەرمە گەرما شەرێ داعش دا لێ ئەڤرۆ بێ ھەڵویستە، دوستەکێ خراب و بێ وەفا و بەرژوەندیخاز دەرچوو.

ئەنجامێن دیماھیکێ شەرێ داعش ھێدی ھێدی دەردکەڤیت کو ژ بلی ھندێ کورد ب پاڵەوان و شەرکەرێن زیرک ھاتن ناسین چ تشتەکێ دی زێدە نەبوو، زیانێن مەزنێن مروڤی مادیی بۆ کوردان و بەرھەمیش بۆ وان ئەوێن مالێن خوە رینشتی.

یا جھێ ئەسەف و بەحسکرنە زوور خالێن خراب ناڤا دەسەڵاتدارێن کوردیی ھەنە تایبەت ناڤا مالا کوردیی کو تژی ناکوکیە، ھەر ڤێ وەکریە پشتی وان سەرکەفتنێن لەشکری دگەل تیرور دەست ھاتی رێکێن سیاسی نەشێین درووست سەرەدەری بکەین و بپارێزین خوە ئەگەر ھەلبژارتنا کێمترین زیان با، ھەر ڤێ وەکریە نیڤەیا ئەردێ باشور و نوکەش ئەردێ روژئاڤا دەست بدەین ، ڤیابا دەمێ بوری رێککەفتن و براینیەکا موکم ناڤبەرا حکومەتا ھەرێم و رێڤەبەریا روژئاڤا پەیدا ببا کو ھەردوو پێتڤی ھەڤدو بین، لێ مخابن ئەڤی دەمێ نازک ئەڤە نەھات دیتن.

عینادییا کوردان د سیاسەتێ دا دگەل ھەڤدوو، خوەش باوەریا کوردان، دووڕووییا ھەڤپەیمانان، ئەڤە ھەمی کێشەکا مەزنە کە ئەڤرۆ گەھشتینە ڤی حالی، دەستێ ڤاڵا و تژی خوین د سەرکەفتنا دا بێ پاداشت دەرکەفتین.