سەرنووچە:

ب حکومەتەکا بێ پلان د هەمی سێکتەران دا، کوردستانەکا بهێز ئاڤا نابت

2/12/2020 6:25:40 PM
1772 جار خوێندراوەتەوە
فاروق عومەر
+ -

 ٢٩ ساڵ ب سەر حکومڕانیا خۆمالی یا فاشل دا دەرباز دبن، ھێشتا تەنانەت د ئێک سێکتەر دا ژی پێنگاڤێن ئەرێنی و دلخوەشکەر نەھاتنە ئاڤێتن، مفا ژ پێشکەتنا تەکنەلۆژیا و سیستەمێن پێشکەفتی یێن جیھانی نەھاتنە وەرگرتن.

مخابن حکومڕانیا کوردی کو پارتی و ئێکەتی و دیڤەلانکێن وێ نە، ژبەر بەرژەوەندیێن خوە یێن حزبی و بنەمالەی و کەسی، ڕەوشەکا وەسا ئافراندنە کو کەربێن وەلاتیێن ئاسایی ژ حکۆمڕانیا خۆمالی ڤەببن و خواستا وان یا سەرەکی ڕەڤین بت ژ پیرۆزیێن خوە و خوەزیا ب ژیانا ل ژێر حکۆمڕانیێن فاشست و خوینمژێن گەلێ مە بخوازن، ھیڤیداربن بەشەک بن ژ پارێزگەھێن ژێر دەستھەڵاتا فیدرال یا عێراقێ( حکومەتا عێراقێ زێدەباری کێماسیێن خوە ڤە ژی ھێشتا بەردەوامە ل سەر دابینکرنا پانزین و گاز و کەھرەب و مووچە و سولفێن جور ب جور و خزمەتگۆزاریێن دەستپێکی)، پارتی و ئێکەتی و دیڤەلانکێن وان ڕەوشەک وەسا خولقاندنە کو تەنانەت وەلاتی خوەزیا ب ژیانا پەنابەر و ئاوەرەیێن کەمپا دخوازن، کەربێن وەلاتیا ژ وەرزێن سالێ ڤەدبن، نە گەرما ھاڤینێ و نە سەرما زڤستانێ دلۆڤانیێ ب وەلاتیێن ڤێ ھەرێما ل ژێر دەستێ مافیا و قاچاخچیا دبت، نە بارانێن بوھارێ و نە پەتایێن پایزێ چاڤێن خوە ل ھەژارێن ڤی واری دنقینن.

دگەل بارینا چەند ڕۆژەکێن بارانێ ل وەرزێ بوھارێ و بارینا چەند سانتیمەکێن بەفرێ ل وەرزێ زڤستانێ، حکومەتا بێ پلان ل جھێ ھزر د ھندێ دا بکت پێشوەخت ئاڤڕێژ و سۆلینا ل گۆر ستانداردێن جیھانی و زانستی دروست بکت و چەند ئالاڤەکێن پشکەفتی یێن ڕامالینا بەفر و جەمەدێ بەرھەڤ بکت، دەملدەست بڕیارا ڕاگەھاندنا پشوویێ ددت، ئاخر کاربدەستێ نەبەرپرس! تو دزانی ڕاگەھاندنا بێھنڤەدانێن بێ پلان و بێ بنەما چەند کاریگەریێ ل قوتابیان دکت؟ چەند کەس بێ کار دمینن؟ ژڤان و مامەلەیێن چەند کەسان تێک دچن؟.

ئەم ل سەر خاکەکێ دژین پڕە ژ بەرھەمێن سرۆشتی، بیرێن نەفتێ و یێن غازێ و سکرێن ئاڤێ، ل بەر چاڤێن وەلاتیان و بێ شەرمانە بوریێن نەفتێ و تانکەرێن نەفتێ و غازێ دشینن دەرڤە و دفرۆشن، خەلک ژی خەونان ب ھەبوونا گاز و غاز و کارەب و پانزینێ ڤە ببینن، ئاخر ئەگەر ئەڤ ڕەوشە ب مەرەم نەھاتبتە دروستکرن کو خەلکێ بێ کەڕامەت و ڕەزیل بکن، دڤێت چ شرۆڤەیێن دی ھەبن؟!

ئاشکرایە کو دەستھەلاتەکا قاچاخچی و مافیا دەست ب سەر ڤێ ھەرێمێ دا گرتیە و کۆمەکا ب ناڤ بەرپرس یێن بێ وژدان; بڕیار بدەستن، بۆچ وژدانا کەسێن دەولەمەند و بازرگانێن ڤی واری نالڤت و خوە ل بوھایێن مرۆڤی ناکن خۆدان؟! ئەز ھندەک بازرگانا ناس دکم کو ڕۆژانە ھەتا ئێک دەفتەر دۆلاری ژی ل سیستەمێ قومارێ ددن، ھەیە ژی ھەتا ئێک ملیۆن دۆلار ل قوبرسێ ل قومارێ دایە! ئەگەر ل ھەرباژێرەکێ چەند بزنسمەنەک دەستپێشخەر بن و ھاریکاریا خێزانێن ھەژار بکن و ب دابینکرنا چەند لترەکێن گازێ قولانچکێن خانیان ل وان گەرم بکن و وان ژ لەرزینا ڤێ سەرما بێ ڕەحم رزگاربکن، گەلو ژ ڤێ چەندێ دەستکەفتتر ھەیە؟

ل ھەر دەمێ پێچێبوویەک وەک کاک شاسوار عەبدولواحد دخوازت ب جۆرەکێ ژ جۆران خزمەتەکا بچیک ژی بت بۆ تەخەکا جڤاکی بکت، دەھان ئەزماندرێژ دێ بێژن موزایەدەیە و بۆ خوەدەرخستنێ یان بۆ مەرەمێن حزبی وان پێنگاڤان دھاڤێژت، خزمەتکرنا تاکێ جڤاکی ب تایبەت تەخا ھەژار و دەستکورتان ژ لایێ ھەرکەسەکێ یان ب ھەر مەرەمەکێ بت ب شانازیەک مەزن دبینم، ھیڤیدارم ب ڤان پێنگاڤێن کاک شاسواری وژدانا ھندەکێن دی ژی بلڤت، ھندەکێن دی ژی ھەست ب بەرپرسیارەتیێ بکن و خوە ل ڤی خەلکێ خێرژخوەنەدیتی بکن خودان.

ب ڤێ بێ سەروبەریێ و بێ پلانیێ و ل ژێر سایا کەسێن نەبەرپرس کوردستان ژی چ جارا بھێز ناکەڤت.!