سەرنووچە:

نەبوونا پێگەھێ کوردی ل ڕۆژھەلاتا ناڤین

11/11/2018 10:11:28 PM
11163 جار خوێندراوەتەوە
دلاوەر سەعدوڵا
+ -

بێگومان ھەتا کورد ببن خودان کیانەکێ سیاسی سەر بخوو ل ڕۆژھەلاتا ناڤین پێدڤی ب ڤان خالان ھەیە:

 ١- بەرەیەکێ سیاسی 

٢- لەشکەرەکێ ب ھێزێ نیشتمانی

٣- ئابوورەکێ ب ھێزو و پاراستی

٤- ئیدارەیەکا چاکساز و شەفاف و نیشتمانی

لێ ئەگەر بەحس ژ دیروکا کوردان بکەین دوان چەند سالێن حکومرانیێ دا ل ڕۆژھەلاتا ناڤین ب تایبەت ل سالێن (١٩٩١ و ٢٠٠٣) دوو دەرفەتێن زێرینێن سەربەخوویێ کوردان ژ دەست دان، ئەگەر ژی ڤەدگەریت کو ھەردووک حزبێن دەستھەلاتدارێن ھەرێما کوردستانێ مژیلی برا کوژیێ بووینە و مژیلی سەروەت و سامانی بووینە و مژیلی بەرژەوەندیێن حزبی و بنەمالەیی بووینە و قەد خوو ئامادە نەکرینە بۆ رێکخستن و ئاڤەدانکرنا ناڤ مالا کوردی، لەوما ئەڤرۆ دبینین کو خەلکێ ھەرێما کوردستانێ دخرابترین ڕەوش دانە و توشی ب دەھان قەیرانێن سیاسی و ئابووری کرینە و خەلک بێ ئومێد کرینە و پاشەڕۆژا وان بەر ب چارەنڤیسەکێ نەدیار و تاریڤە بریە .

ژلایەکێ دیڤە ئەگەر بەحس بکەین کو ڕۆژھەلاتا ناڤین جەرگێ ھەمی کێش و ناکوکیێن جیھانێ یە، ئانکو ئەگەر بشێین دەولەتەکا کوردی یا سەر ب خوو و پێشکەفتی دڤێ دەڤەرێ دا دروست بکەین ھوسا دیاردبیت کو ئەم دێ شێین ئیدارا جیھانێ ھەمیێ کەین ژ بەرکو ئەڤ دەڤەرە لاندکا شارستانیەتێ و روحا ژیانا مروڤایەتیێ یە.

دیسان کورد و کوردستانی دەربارەی پرسا دەولەتا کوردی گەلەک خەبات و قوربانیدان داینە ھەژی ھندێ نە کو دەولەتەکا سەربخوو ھەبیت ل ڕۆژھەلاتا ناڤین لێ ژبەرکوو دمێژوویا خودا کوردان گەلەک خەلەتی ئەنجام داینە بگرە ژ نەگرنگیدانا بەرژەوەندیا گشتی و گرنگیدان ب بەرژەوەندیێن حزبایەتی و تایبەت، خو سەپاندنا کەسایەتی و بەرژەوەندیێن بنەمالەیی ئەگەرێن سەرەکی بوینە کو تانھا کورد بێ دەولەت بوینە و ئەگەر ژ بەر وان خەلەتیان نەبوایە دبیت ئەڤرو کورد خودان کیانەکێ سیاسیێ سەربخوو بان ل ڕۆژھەلاتا ناڤین.

ئەگەر ب شێوەیەکێ دی تەماشە بکەین راستە جوگرافیا کوردستانێ نەیا ھاریکارە دگەل ھەبوونا کیانەکێ سیاسیێ کوردی ل ڕۆژھەلاتا ناڤین، لێ ئەگەر حزبێن دەستھەلاتدارێن کوردی ب عەقل و مەنتیق سەرەدەری دگەل ھەڤدوو کربانە و بەرژەوەندیێن گشتی بەرچاڤ وەرگرتبانە و ئێکرێزیا ناڤ مالا کوردی پاراستبا و خیانەت ل ھەڤدوو نەکربانە ئەس باوەرم دووخێ ھەرێمێ ئەڤروو ب ڤی ئاوایی نەدبوو، لێ ب مخابنیڤە سەرکردێن کوردی و لایەنێن دەستھەلاتدارێن سیاسیێن کوردی ئەڤروو خو توشی لەعنەتێن مێژوویی کرینە.

ل داویێ ب دیتنامن ھەتاکو ئەم بشێین دەولەتەکا کوردی و کیانەکێ سیاسیێ کوردی ل ڕۆژھەلاتا ناڤین ب دامەزرێنین دڤێت ڤان کاران ئەنجام بدەین :

١-پێدڤیە کوردان پەیوەندیێن ناڤ دەولەتیێن ب ھێز ھەبن و گروپ و لایەنێن سیاسیێن ھەرێما کوردستانێ کاربکەن ل سەر بنیاتێ بەرژەوەندیێن ھەڤبەش و گشتی و نەتەوایەتی

٢-کاربکەن ژ بوو دروستکرنا ھەیئەیەکا سەروکایەتی یا گشتی دیر ژ ھەمی بنەمایێن حزبی و بنەمالەیی و تاکەکەسی

٣- رابن ب دروستکرنا سوپایەکێ ب ھێزێ نیشتمانی و دامەزراندنا دام و دەزگایێن نیشتمانی و دانانا ئیدارەیەکا روون و شەفاف کو لایەن ھەمی تێدا بەشداربن و بھێتە دابەشکرن ب شێوەیەکێ دادپەروەرانە