سەرنووچە:

ھەمان ئازادیێ ژبۆ کەسێن دن ژی بخوازە

6/12/2019 8:58:16 PM
4398 جار خوێندراوەتەوە
محەمەد عومەر
+ -

مروڤێ رۆژھەلاتا ناڤین ب تایبەت ل کوردستانێ ئەو بونەوەرە یێ پتریا وان دبنیاتا ھەبوونا خوەدا روحەک خوەسەپینەر و زیانبەخش خوەجھکریە، گاڤا لسەر رێبازەکێ دمەشن دخوازن ب دارێ زورێ ژی بە ھەرکەس مینا وان لسەر وێ رێیێ بچن، ل ڤان دەمێن داویێ ژبەر ھاتنەڤەیا پێلا پەرتوکێن فەلسەفی و بەلاڤبوونا ئایدولوژیێن زێدەتر لسەر ئازادیا کەسی لناڤا ژینگەھا تاکێ کوردستانی دا، ھەم ئارمانجێن فەلسەفێ و ئایدولوژی شێواندن ھەم ژی پیروزیێن ئازادیا مروڤی فەتساندن، ب رەنگەکێ وەسا کو جڤاک ژ سەردەمێ نەخواندەواریێ ل پرسێن مروڤاتی نەفامتر لێکریە.

 د سەردەمێ نھادا بەشەک زێدە یا تاکێ خوە ب رەوشەنبیر ددانن، بانگ دکن کانێ ئازادیا من، و د بەرامبەردا ئازادیێن تاکێن دن دکن بن لنگێن خوەستەکێن خوەدا، ھەرەشەکرن لسەر رێباز و ئایدولوژیێن کەسێن دن ب دەستکەفت دزانن و چەپکان ژبو ھەڤ لێددن ژبەر وێ سڤکاتیا ئەنجام ددن ب پیروزی و ئازادیێن کەسێن ب وانرە دژین دجڤاکی دا!.

ل ڤێرێ پرس ئەوە، گەلو چەوا دبە فەلسەفا ئازادیێ ئەو قاس کێم بە مینا ژ مروڤێ کوردستانی رەنگڤەددە؟!، یان قەی چەند ژیان وێ وەرە گوھارتن گەر ئەم ژی تەنێ ٢٠٪‏ وەک مروڤێ روژئاڤایی بفکرن و تشتان شیکاربکن و ئایدولوژیا خوەجھ بکن؟!، کەنگێ ئەمێ ببن ئەو مروڤێن کو روحیەتا خوە سەپینەر دناڤا خوەدا نەھێلن؟!، گەر ئەم بخوازن ئازاد بن د ھەلبژارتنێن خوەدا چ "ھزر، ئایدولوژی، کریار یان ھتد..." چما ئەم وێ ئازادیێ ژبو کەسێن دن ژی ب رەوا نابینن یێن کو جودا ژمە ھزر دکن؟!، ما ھند تشتەک مەزنە ئەم بگەھن وێ باوەرێ کو سفکاتیکرن ب پیروزیێن مروڤان گوپیتکا بن پێکرنا ئازادیا تاکی و نەمروڤبوونێ یە!؟.

بمن ئیدی دڤێ ئەم مەزنتر ژ خوەیێن نھا بفکرن و رەفتار بکن، دەمە رێ ل ڤێ گێلەشوکێ بگرن ئەوا سەرھلدای بناڤێ نویبوون و توزا وێ ژینگەھا مە نخافتی، دڤێ ببێژین ئازادم ھەتا کو ئازادیا تە نەکم لبن حەزێن خوەدا، ئازادی لێ ئەڤ سنورێن منن نەبەزینە!، ئەزێ ژبو خوە بژیم دباوەشا فکرێن خوەدا، و تو ژی ژیانێ بکە ل ناڤ وێ ئایدولوژیا کو تە ھەی، ل وی دەمی نوی ئەمێ وەرن ئاستێ بدەست خستنا ناڤێ مروڤ ب واتەیا وێ یا فەرھەنگی، ئەمێ نوی ببن رەنگڤەدانا ئارمانج و فەلسەفا ئازادیێ یا تەمام  و ئەمێ نوی ببن خوەدی جڤاکەک تەندروست.