سەرنووچە:

تۆلا بوویەرا ھەولێرێ ژ گەشتیاران ھاتە ڤەکرن !

7/19/2019 9:22:06 PM
5895 جار خوێندراوەتەوە
عیماد ئالیخان
+ -

بەردەوام گەشتێن ھاولاتیێن باشورێ کوردستانێ بۆ وەلاتێن جیران دھێنە ئەنجامدان و ب تایبەت بۆ وەلاتێ تورکیا و ھەموو جارەکێ گەشتیار ئالایێ کوردستانێ دگەل خوەدا دبن و بێی کو چ گرفت و ئالۆزی ژێ پەیدا ببن، یان ژی بێێ کو گەشتیار بھێنە ئاگەھدارکرن کو ھەلگرتنا ئالایێ کوردستانێ قەدەغەیە، لێ ئەو رەفتارا دگەل گەشتیارێن کورد دا ھاتیە کرن ژلایێ تورکان ڤە نە ژبەر ئالایێ پیرۆزێ کوردستانێ بوو، بەلکو  ھندەک مەرەمێن دی ھەبوون، ژ وان ژی کو ئەڤە چەند رۆژەکە شەر و ئالۆزی دناڤبەرا پەکەکێ و سۆپایێ تورکیا دا دژوارتر لێھاتینە و ب تایبەت پشتی ئەوێ کریارا تیرۆری ئەوا ل ھەولێرا پایتەخت روودای کو ئێک ژ کارمەندێن کونسلخانەیا تورکیا تێدا ھاتبوو کوشتن!

ئەگەر ئەوا وان د دەرھەق گەشتیاران دا کری تۆلڤەکرنا ئەوێ بیت ئەوا ل ھەولێرا پایتەخت روودای ئەڤە مەزنترین ئیھانە و سڤکاتی یە ددەرھەق ھاولاتیێن باشور دا ھاتیە کرن، ژبەرکو بکەرێن ئەوێ کریارا تیرۆری نە گەشتیار بوون تاکو ب وی شێوەی بھێنە ئێشاندن، بلا وەلاتێ تورکیا و پەکەکە شەرێن خوە نە ل سەر ئاخا باشورێ کوردستانێ بکەن و نە ژی زەرەر و زیانێ بگەھیننە ھاولاتیان.

یان ژی ئەگەر ھەلگرتنا ئالایێ کوردستانێ قەدەغە بیت ل وەلاتێ تورکیا بۆچی خودانێ کۆمپانیا گەشت و گوزارێ پێش وەخت گەشتیار ئاگەھدار نەدکرن کو ھەلگرتنا ئالایێ کوردستانێ قەدەغەیە؟ یان ژی بۆچی ئاسایی و نۆرمال بیت ئالایێ تورکیا ل باشورێ کوردستانێ بھێتە بلندکرن و رێز لێ بھێتە گرتن و ل تورکیا سڤکاتی ب کوردان و گەشتیاران و ئالایێ وان بھێتە کرن و بھێنە قوتال و ئەشکەنجەدان؟ ئەرێ گەشتیار ژ ھەژی ئەوێ سەرەدەریێ بوون ئەوا دگەل دا ھاتیە کرن؟!

ل باشورێ کوردستانێ ژ ئەنجامێ شەرێن دناڤبەرا پەکەکێ و سۆپایئ تورکیا دا ھەر زیان و زەرەر ب ھاولاتیێن سڤیل دکەڤیت و دبنە قوربان، و د گەشتان دا ژی ھەر ھاولاتیێن سڤیل بھێنە ئێشاندن و سڤکاتی پێ بھێتە کرن ژلایێ ھاولاتیێن تورک ڤە! ئەرێ ھاولاتیێن مە ژ ھەژی ئەڤێ نەخۆشی و نەئارامیێ نە ئەوا دگەل دا دھێتە کرن ژلایێ ھەردو ھێزان ڤە؟! ئەرێ گەشتیار ھێزەکا لەشکەری بوون تاکو ب وی شێوەی بھێنە قوتان؟! بۆچی ئاسایی بیت ھێزێن لەشکەری یێن تورکیا و پەکەکێ ھاتن و چوونێ ل سەر ئاخا باشور دا بکەن و کریە مەیدانا شەرێن خوە و زیان ب ھاولاتیان کەڤیت؟ بێی کو حکومەتا ھەرێمێ رێگریێ لێ بگریت؟!

دڤێت دەستھەلات و حکومەتا ھەرێما کوردستانێ بێ دەنگ و ھەلویست نەمینیت بەرامبەر ئەوا دگەل گەشتیارێن کورد دا ھاتیە کرن، ژبەرکو نە ھێزرکا لەشکەری بوون تاکو تورکێن فاشست وێ سەرەدەریێ دگەل دا بکەن، ھەروەسا داخوازێ ژ ھەردو ھێزێن لەشکەری بکەت شەرێن خوە ببەنە دناڤا ئاخا خوەدا داکو ھاولاتیێن باشور ژی ب ئارامی قەستا جھ و وارێن خوە بکەن و زێدەتر نەبنە قوربانیێن شەرێن دناڤبەرا وان دا.