سەرنووچە:

ئەمریکایێ داخواز کر، چەکدارێن بیانی یێن د دەستێ هەسەدێ دا بۆ وەلاتێن وان بێن ڤەگەراندن

شەرێ ل دژی داعشێ
فۆتۆ: 
2019-02-05

315 جار خوێندراوەتەوە

وەزارەتا دەرڤەیا ئەمریکایێ داخواز ژ وەلاتێن جیهانێ کر، وەلاتیێن خوە کو د ناڤ داعشێ دا بوون و ژ ئالیێ هێزێن سوریایا دیموکراتیک ڤە هاتنە گرتن، ژ بۆ وەلاتێن خوە ڤەگەرینن و رۆلا هەسەدێ ژی د شەرێ ل دژی داعشێ دا بلند نرخاند.

د داخویانیەکا نڤیسکی دا وەزارەتا دەرڤەیا ئەمریکایێ دیار کر، ئەمریکا رۆلا هێزێن سوریایا دیموکرتایک کو ل شوونا هێزێن هەڤپەیمانان گەلەک کار کرنە، بلن دنرخینە و دازانین، هەسەدێ ب وێرەکی و رژدبوونا خوە، ناڤچەیێن خوە رزگار کر، ب سەدان چەکدارێن بیانی یێن تیرۆریست کو خەلکێ د دەهان وەلاتێن جیهانێ نە، دیل گرتن، ب تێکۆشینا هەسەدێ داعش لەواز بوو و د گەل وێ یەکێ جیهان زێدەتر تێ پاراستن.

هەروەسا دازانین، زێدەباری وێ یەکێ کو هەسەدێ ل هەمبەر دوژمنەکێ هۆڤانە شەر کر، لێ گرێدایی یاسایێن ناڤدەولەتی یێن شەر بوون و چەکدارێن دیل ب ئاوایەکی تەندروست و مرۆڤانە پاراستن و ئەمریکا ژی داخواز ژ وەلاتێن جیهانێ دکە، وەلاتیێن خوە کو د ناڤ داعشێ دا بوون و ژ ئالیێ هێزێن سوریایا دیموکراتیک ڤە هاتنە گرتن، ژ بۆ وەلاتێن خوە ڤەگەرینن.

وەزارەتا دەرڤەیا ئەمریکایێ دەستنیشانکر، زێدەباری کۆنترۆلکرنا ناڤچەیێن کو بەرێ دبن دەستێ داعشێ دا بوون، لێ هێژ ژی داعش گەفەکا مەزنە و پێدڤیە هەموو ئالی ب هەڤرە ل دژی چەکدارێن تیرۆرسیت یێن داعشێ شەر بکەن.

بەرێ ژی هێزێن سوریایا دیموکراتیک  چەند جاران داخواز ژ وەلاتێن جیهانێ کربوو، وەلاتیێن خوە کو د ناڤا داعشێ دا بوون و ژ ئالیێ هێزێن وان ڤە هاتنە گرتن، ژ بۆ وەلاتێن خوە ڤەگەرینن و بارگرانیا سەر ملێن وان ڕاکەن.

هـ.ج