سەرنووچە:

شاندنا ١٧% پشکا دەرمانێن ھەرێمێ ل پەرلەمانێ عێراقێ ھاتە پەسەند کرن

لۆگۆیێ وەزارەتا ساخلەمیا هەرێما کوردستانێ
فۆتۆ: ئێن ئاڕ تى
2019-01-20

252 جار خوێندراوەتەوە

لیژنەیا ساخلەمیا جڤاتا پەرلەمانێ عێراقێ بڕیارا شاندنا ١٧% پشکا دەرمانێن ھەرێما کوردستانێ پەسەند کر و بۆ سەرۆک وەزیران شاندنە.

 دکتۆر میران محەمەد ئەندامێ لیژنەیا ساخلەمیا جڤاتا پەرلەمانێ عێراقێ، بۆ دیجیتال میدیایا ئێن ئاڕ تی ڕاگەھاند، یەکدەنگی لسەر پشکا دەرمان و پێدڤیێن نوژداری یێن ھەرێما کوردستانێ ھەبوو، کو ل ڕێژەیا ١٧% نەھێتە کێمکرن، ھەروەسا گرنگیا زێدەتر ب پێشکەشکرنا خزمەتگوزاریێن ساخلەمیێ بۆ وان مالباتێن ئاوارەیێن کو نھا د ھەرێما دانە بھێتە دان، ھەروەسا د ڤی بابەتی دا تەڤایا پەرلەمانتارێن عێراقێ ب ئالیێن عەرەب ژی ڤە یەک ھەلۆیست بوون.

گوت ژی، "ژبەر کو ئەز ڕێڤەبەرێ گشتی یێ ساخلەمیا سلێمانیێ بووم، ژ نێزیکڤە ھایداری کێمیا دەرمان و پێدڤیێن نوژداری بووم، ھەروەسا ھەژمارەکا زۆر یا نەخۆشێن پارێزگەھێن باشورێ عێراقێ بۆ وەرگرتنا چارەسەریا نوژداری قەستا ھەولێر و سلێمانیێ دکرن، ب تایبەت نەخۆشخانەیا ھیوا ل باژارێ سلێمانیێ و نەخۆشخانەیا نانەکەلی یا ھەولێرێ، ژبەر وێ ژی مە زێدەتر پێدڤی ب دەرمان و پێدڤیێن نوژداری ھەبوو، ئارمانجا مەژی ئەو بوو ئەو ڕیژەیا دەرمانێن ھەرێمێ نەھێتە کێمکرن".

ھەڤدەم ب ڤێ بڕیارێ دێ تەڤایا مەلبەند و نەخۆشخانەیێن ھەرێمێ مفاداربن.

پشتی سەرھەلدانا ئاریشەیێن ناڤبەرا ھەولێر و بەغدایێ، ب بەردەوامی بەغدا وەک کارتەکا گەفان لھەمبەر ھەرێمێ کار بۆ کێمکرنا پشکا بودجەیا ھەرێمێ کریە و ھەیا نھا ژی بەرپرسێن ھەرێمی ب ڕێکا وان پۆستێن کو د حکومەتا عێراقێ دا ھەنە نەکارینە کار بۆ زێدەکرنا وان پشکێن بودجەی بکەن.

س.م