سەرنووچە:

سالەک ب سەر هێرشا ئارتێشا تورکیا و هەڤالبەندێن وێ بۆ سەر عەفرینێ دەرباس بوو

د هێرشێ دە ب سەدان سڤیل هاتبوون کوشتن و بریندارکرن
عەفرین
فۆتۆ: 
2019-01-20

135 جار خوێندراوەتەوە

د ٢٠ێ چلەیا ٢٠١٨ێ دا، ٧٢ بالافرێن شەر یێن ئارتێشا تورکیا ژ هێلا ئەسمانی ڤە و ب هەزاران چەکدارێن گرۆپێن توندرەو و سەربازێن تورکیا هێرشی کانتۆنا عەفرینێ یا رۆژئاڤایێ کوردستانێ کرن.

دەولەتا تورکیا ژ بۆ کۆنترۆلکرنا عەفرینێ د گەل هێزێن هەرێمی و ناڤدەولەتی دەست ب بازارێ کربوو و هەری داوی د گەل روسیایێ ل هەڤ هات. هێزێن گرێدایی تورکیا ژ ئیدلبێ ڤەکشیان و روسیایێ ژی بۆ هێرشا عەفرینێ گلۆپا کەسک بۆ تورکیا ڤێخست و هێرشا تورکیا هاتە دەستپێکرن.

د گەل هێرشا تورکیایێ گەلەک گرۆپ ژی تەڤلی هێرشی بوون کو ژ وان گرۆپان پێک دهاتن: لیوایا سەرمەرکانت، لیوا شەمال، لیوا ئەلمونتەسەر بیلاح، جێش ئەلئەحفاد، ئەحرار ئەلشەرقیە، فاتح سولتان محەمەد، سولتان عوسمان، قوات ئەلمەخەویر، فرقە ئەلسەفوە، فرقە سولتان موراد، فرقە ئەلحەمزە، سوار ئەلجەزیرە، فەوج ئەلخامس، فرقە ٢٣ ، لیوا ئەلموعتەسەم، فەیلەق ٢، فرقە ئەلشەمالیە، فەج ئەلمستەفا، جێش ئەلئیسلام، تەجەموح فاستاکیم کەما عومێرت، جەبحە ئەلشامیە، لیوا ٥١، سقور ئەلشام، حەرەکە تەحریر ئەلشام، فرقە٩ ، جێش ئەلنوخبە، فەیلەق ئەلشام، لیوا ئەلسولتان سولەیمان شا، لیوا سقور ئەلشەمال، نورەدین زەنگی، جەبحە تەحیری سوریە.

حکومەتا تورکیا و گرۆپێن گرێدایی وێ ژ بەر کو ژ هێلا بەژایی ڤە نەکارین پێشدە بچن و هێزێن یەپەگێ و یەپەژێ ب هەموو هیزا خوە ل بەر خوە ددان، ئارتێشا تورکیا ب چەکێن گران یێن ناتۆیی و بالافرێن پێشکەتی، هێرشی هەموو ناڤچە و گوندێن عەفرینێ کر.

شەرێ عەفرینێ مەهەکێ بەردەوام کر، لێ ئارتێش و گرۆپێن تورکیا نەکارین پیشبکەڤن. ژ بەر وێ یەکێ ژی جهێن نیشتەجێبوونا وەلاتیان کرن ئارمانج.

ل گۆری ئامارا رەوانگەها سوری یا مافێ مرۆڤان کو ناڤەندا وێ ل لەندەنێ یە، د ئەنجاما هێرشێن ئارتێش تورکیا دا ١٧٦ وەلاتیێن سڤیل هاتن کوشتن کو ٢٧ کەس ژ وان زارۆک و ٢١ ژی ژن بوون، هەروەسا ٤٨٤ وەلاتی ژی بریندار بوون.

دەستەیا تەندروستیا کانتۆنا عەفرینێ و هەیڤا سۆر یا کوردی ژی دازانین، ٢٣٢ سڤیل هاتنە کوشتن کو ٣٥ کەس ژ وان زارۆک و ٢٩ ژی ژن ڤبوون و ٦٦٨ وەلاتیێن سڤیل ژی برینداربوون.

پشتی بداویهاتنا شەر، رێڤەبەریا باکور و رۆژهەلاتێ سوریێ دابووزانین، د شەرێ عەفرینێ دا ٥٠١ کەسێن سڤیل هاتنە کوشتن و ٧٩٧ کەس ژی بریندار بوونە.

ژ بلی کوشتنا سڤیلان، بالافر و لەشکەرێن ئارتێشا تورکیا ب دەهان خواندنگەهـ و جهێن گشتی و شوونوارێن دیرۆکی کو د لیستا یونسکۆیێ دا نە هاتن وێرانکرن.

هـ.ج