سەرنووچە:

هەڤدیتنێن ناڤبەرا تورکیا و ئەمریکایێ دەربارێ رەوشا سوریا، دێ بێن دەستپێکرن

هەڤدیتن ل سەر ئاستا سەربازی دبن
ئالایێن تورکیا و ئەمریکایێ
فۆتۆ: 
2019-01-12

269 جار خوێندراوەتەوە

هەڤدیتنێن ناڤبەرا تورکیا و ئەمریکایێ دەربارێ رەوشا سوریا، دێ بێن دەستپێکرن و هەڤدیتن ل سەر ئاستا سەربازی دێ بێن لدارخستن.

جۆن بۆلتۆن شێورمەندێ ئاسایشا نەتەوی یا ئەمریکایێ د بەرنامەیەکا رادیۆیی یا وەلاتێ خوە دا کو د میدیایێن تورکیا دا ژی هاتیە بەلاڤ کرن راگەهاند، ڤێ حەفتیێ ل سەر ئاستا سەربازی، هەڤدیتنێن ئەمریکا و تورکیایێ دێ بێن دەستپێکرن.

بۆلتۆن دازانین، هەڤدیتنێن ناڤبەرا هەردوو ئالیان یێن سەربازی دێ د دەربارێ رەوشا سوریایێ دا بێن لدارخستن و ئارمانجا هەڤدیتنان ژی گەهشتن ب بریارەکا هەڤپار بۆ پرسا سوریایێ یە.

هەروەسا دازانین، د هەڤدیتنان دە دێ پرۆتۆکۆلێن سەربازی د ناڤبەرا ئەمریکا و تورکیایێ دا بێن ئیمزاکرن.

دوهی ژی بەرپرسەکێ بلندێ وەزارەتا بەرەڤانیا ئەمریکایێ راگەهاندبوو، هێزێن وان دەست ب ڤەکشاندنا چەک و ئالاڤێن سەربازی ژ سوریایێ کرنە، لێ هەیا نها زەلال نینە کەنگی هێزێن وان کو نێزیکی دوو هەزار سەربازن، ب تەمامی ژ سوریایێ تێن ڤەکشاندن.

بەرپرسێ ئەمریکی دازانین، ژ بەر سەدەمێن ئەولەکاریێ نکارە د نها دا زانیاریێن زێدەتر بەلاڤ بکە.

کەنالا سی ئێن ئێن ژی ژ زارێ بەرپرسەکێ ئیدارەیا ئەمریکایێ، راگەهاندبوو دەست ب ڤەکشاندنا ئالاڤێن لەشکەری ژ سوریایێ هاتیە کرن و ئەو یەک ژی دەستپێکا پرۆسەیا ڤەکشاندنا هێزێن ئەمریکا ژ سوریایێ یە.

 

١٩ێ کانونا ٢٠١٨ێ دۆنال ترەمپ سەرۆکێ ئەمریکایێ بریارا ڤەکشاندنا هێزێن وەلاتێ خوە ژ سوریایێ دا و ئەو یەک ژی بوو سەدەما کارڤەدانان ل سەر ئاستا ناڤخوە و دەرڤەیێ سوریایێ دا.

 

هـ.ج