سەرنووچە:

چار هەزار زارۆک د زیندانێن تورکیا دانە

چار هەزار زارۆک د زیندانێن تورکیا دانە
فۆتۆ: 
2019-01-02

440 جار خوێندراوەتەوە

پارێزەر ئەمین چۆپان سەرۆکێ لقا ئامەدێ یا کۆمەلەیا مافێ مرۆڤان راگەهاند، نێزیکی چار هەزار زارۆک د زیندانێن تورکیا دا هەنە.

پارێزەر ئەمین چۆپان د داخویانیەکێ دا بۆ ئاژانسا فوراتێ بالکشاندە سەر رەوش و هەژمارا گرتیێن زارۆک د ناڤ زیندانێن تورکیا دا و دازانین، ژ ٤ هەزار زارۆکێن گرتی، تەمەنێ زێدەتر ژ ٣ هەزار زارۆکان د ناڤبەرا ١٢ بۆ ١٨ سالیێ دایە.

هەروەسا دازانین، نێزیکی ٧٠٠ زارۆکێن یەک سالی بۆ ٦ سالیێ ژی د گەل دایکێن خوە د زیندانان دانە  و نێزیکی ١٧٠ زارۆک ژی ئاوارە نە.

سەرۆکێ لقا ئامەدێ یا کۆمەلەیا مافێ مرۆڤان هەروەسا گۆت:" رەوشا تەندروستی و پەروەردەکرنا زارۆکان گەلەک نەباشە و ژ سالا ٢٠١٣ێ و هەیا نها ١٣ زارۆکان د زیندانێن تورکیا دا ژیانا خوە ژ دەست دانە.

د ٢٨ێ مەها مژدارا ٢٠١٨ێ دا کۆمەلەیا مافێ مرۆڤان یا تورکیا دابووزانین بەریا پارتیا داد و گەشەپێدان "ئاکەپە" وەرە سەر دەستهەلاتێ، د سالا ٢٠٠٢ان دە ب گشتی ٥٩ هەزار و ٤٢٩ کەس ل تەڤاهیا تورکیا د زیندانان دا بوون، لێ د ناڤا ١٦ سالێن دەستهەلاتیا ئاکەپێ دە، هەژمارا گرتیان بۆ زێدەتر ژ ٢٦٠ هەزار کەسان بلند بوو.

ل گۆری ئامارا کو کۆمەلەیا مافێ مرۆڤان یا تورکیا بەلاڤ کر، ٤٣٦ زیندان ل تورکیا و باکورێ کوردستانێ هەنە کو ٢٦٠ هەزار کەس تێدانە و ئەگەر ٥٣ زیندانێن دن یێن مەزن بێن چێکرن، دێ جهێ ٨٠٠ هەزار کەسان د گرتیگەهان دە هەبە کو ل گۆری هەژمارا خەلکێ تورکیا ژ هەر ١٠٠ کەسان یەک کەس دێ د زیندانێ دا بە.

هـ.ج