سەرنووچە:

ترەمپ: دێ ھێدی ھێدی ھێزێن خۆ ل سوریایێ ڤەکێشین

پرسا ڤەکێشانا هێزێن ئەمریکا ل سوریایێ
دۆنالد ترەمپ سەرۆکێ ویلایەتێن ھەڤگرتیێن ئەمریکا
فۆتۆ: ئەرشیڤ
2018-12-31

352 جار خوێندراوەتەوە

دۆنالد ترەمپ سەرۆکێ ویلایەتێن ھەڤگرتیێن ئەمریکا ڕاگەھاند، دێ ھێدی ھێدی ھێزێن خۆ ل ناڤخۆیا سوریایێ ڤەکێشن و تەکەزی لسەر دژایەتیکرنا داعشێ کر.

 لسەر ھەژمارا خۆ یا تۆیتەری ترمپ ئەڤرۆ (٣١ێ کانونا ٢٠١٨ێ) ڕاگەھاند، "دەمەکێ دا من دەستھەلات وەرگرتیە کو سوریا ڕووبرۆی بێسەرۆبەری و ئالۆزیا زێدەبوونا داعشێ ببوو، ئەوا من ل سوریایێ کری ئەگەر کەسەکێ دی کربا، نھا دا نازناڤێ قەهرەمان لێ ھێتە دانان".

ترەمپ ئەو یەک ژی دیارکر، شەرێ داعشێ بەر ب دۆماھیکێ ڤە دچیت، ژبەر وێ ژی دێ ھێدی ھێدی ھێزێن خۆ ل سوریایێ ڤەکێشن.

زەلالکریە ژی، بریارا ڤەکێشانا ھێزێن ولاتێ خۆ ل سوریایێ، جێبەجێکرنا وان سۆزا بوو کو د ھەوا ھەلبژارتنان دا ب خەلکێ خۆ دابوو.

ھەڤدەم ڕەخنە ژ پشکەک ژ نووچەیێن میدیایان گرت و ب نووچەیێن ھەلاویستی ل قەلەمدان.

د دۆماھیکا تۆیتا خۆ دا ترەمپ ھێرشی سەر ھندەک ژ جەنەرالێن ئارتێشا ولاتێ خۆ کر، ب دیتنا وی وان شکەستن د وی ئەرکێ پێ ھاتنە ڕاسپاردن ئینانە، نھا ژی ب وان تەکتیکێن کو ئەو بکاردئینیت سەرسامن و بەرھەمێ خۆ ژی ھەبوونە.

ئەڤ داخۆیانیێن ترەمپی دەربارەی ڤەکێشانا ھێزێن ولاتێ خۆ ل سوریایێ دەمەکێ دایە، ڕۆژا ١٩ێ ڤێ مەھێ سەرۆکێ ئەمریکایێ ڕاگەھاند، دێ دەم و دەست پرۆسەیا ڤەکێشانا ھێزێن خۆ ل سوریایێ دەست پێکەن.

ئەڤرۆ لیندز گراھام سیناتۆرێ کۆماریێن ئەمریکا ڕاگەھاند، پشتی ڤەکێشانا ئەمریکا ل سوریایێ ترەمپ دخوازیت ھەڤپەیمانێن خۆ یێن کورد بپارێزیت.

پشتی بریارا ڤەکێشانا ئەمریکا ل سوریایێ، تورکیا گەفان ژ ھێزێن سوریایا دیموکراتیک (ھەسەدە) دکەت، کو دەما چار سالانە ھەڤپەیمانێن ئەمریکانە و ل شەرێ داعشێ دا پشکداربوونە.

س.م