سەرنووچە:

کاوە عەبدولقادر: حکومەتا هەرێمێ مافێ خەلکی بدە پاشی ئەرکی لسەر ملێن وان بدانە

فۆتۆ: 
2020-03-25

310 جار خوێندراوەتەوە

پەرلەمانتارەکێ فراکسیۆنا نەوەی نوێ د پەرلەمانێ کوردستانێ دا ڕاگەهاند، "حکومەتا هەرێمێ مافێ خەلکی بدەن پاشی ئەرکی لسەر ملێن وەلاتیان بدانە". دبێژیت ژی، د نها دا حکومەتا هەرێمێ چار مووچەیێن مووچەخۆران یا قەردارە، بێ چ سەدەمەکا باوەر پێکری مووچەی پارڤە ناکەت.

کاوە عەبدولقادر د پەیجێ خۆ دا لسەر تۆڕا جڤاکیا فەیسبووکێ نڤیسیە، "ئەم هەموو ژ ترسا ڤایرۆسێ کۆرۆنایێ تێدگەهین هەر ڤێ یەکێ ژی وەسا کریە، ب ئۆپۆزسیۆن و دەستهەلاتێ ڤە پێگیری ڕێنمایێن ساخلەمیێ و بڕیارێن حکومەتێ ببین، لێ نابیت د ڤێ ڕەوشێ دا وەلاتیان د مال دا زیندان بکەی و مووچەی نەدەیێ".

پرسیارا وێ یەکێ ژی کریە، "ئەرێ بۆچی حسابا ڤی خەلکێ هەژار و کێمدەرامەت ناکەی کو دەبارا ژیانا وان لسەر کارێ ڕۆژانەیە و ئەگەر ڕۆژەکێ کار نەکەن نکارن پێدڤیێن ژیانا خۆ دابین بکەن؟".

دایەزانین ژی، "زەلامەکێ پیرێ خانەنشینکری تەلەفۆن بۆ من کر و دگری ژبەر ژیانا خۆ یا بزحەمەت هیڤی دکر بزاڤەکێ بکەین ژبۆ کو حکومەت مووچەیێ خانەنشینیێ پارڤە بکەت، باوەر بکەن دلێ من ژان دکر بۆ وی و من نەزانی چاوا من نانێ دوهی نیڤرۆ خواریە. مامۆستایەکێ گەنج ژی نامە شاندیە دبێژیت، من پارە نینە شیر و دایبیێ بۆ زارۆکێ خۆ بکڕم و نزانم چبکەم؟".

ئەو پەرلەمانتارە بەحسا وێ یەکێ ژی دکەت، "ئەڤە میناکا سەدان هزار وەلاتیێن هەرێما کوردستانێ یە کو د ڕەوشەکا دژوار دا ژیانێ دبوورینن، ژبەر وێ یەکێ هەرچی زوویە پێدڤیە حکومەت مووچەیێ مەها ١٢ یێ سالا دەربازبوویی پارڤە بکەت، چ دی ب هێجەتا ڤێ ڕەوشێ پاشدا نەئێخیت. ب دەهان ڕێ هەنە بۆ پارڤەکرنا مووچەی ب ئاوایەکێ ساخلەم بێ کو مەترسی لسەر ژیانا مووچەخوران دروست بیت".

ئەڤە ژی دەمەکێ دایە، ب هێجەتا قەدەغەیا هاتن و چوونێ، هەیا نها حکومەتا هەرێمێ مووچەیێ مەها ١٢یێ سالا دەربابوویی یێ پڕانیا فەرمانبەرێن هەرێمێ پارڤەنەکریە.

س.م