سەرنووچە:

مەسعود حەیدەر: هەر کەسەکێ خۆ ب کورد بزانیت نابیت ژ مەرجەعیەتا بارزانی دەربکەڤیت

فۆتۆ: 
2020-02-27

408 جار خوێندراوەتەوە

شێورمەندێ مەسعود بارزانی ڕاگەهاند، "هەر کەسەکێ خۆ ب کورد بزانیت و یێ پاقژ و نیشتیمانپەروەر بیت، نابیت ژ ئیجماعا کوردی و سەیوانا مەرجەعیەتێ کوردان دەربکەڤیت، کو ئەو ژی بارزانییە".

ئەڤرۆ پێنجشەمبیێ مەسعود حەیدەر شێورمەندێ مەسعود بارزانی سەرۆکێ پارتیا دیموکراتا کوردستانێ ڕاگەهاند، "هەر کەسەکێ ڤێ یەکێ بکەت چ جۆداهی نابیت دگەل تەها جەزراوی و تەها محێدینێ بەعس".

دیارکر ژی، "پێکهاتەیەکا دیارا عێراقێ بۆ پاراستنا دەستهەلاتا خۆ و ب ئەجێندایا دەرەکی، گەلێن عێراقێ بەر ب حوکمێ تاکڕەویێ دبەن"، بەحسا وێ یەکێ ژی کر، "قەوارەیا دەستوریا هەرێمێ دێ یەک بیت ژ ئارمانجێت وان د داهاتی دا".

شێورمەندێ بارزانی ئەو یەک ژی گوت، "ئەوا ئەڤرۆ ل عێراقێ ڕووددەت پێدڤیە ب یەکهەلویستی ڕووبڕووی ببین، هەر کوردەکێ ل بەغدا و ل دەرڤەی بازنەیا نیشتیمانیا کوردی ڤەلڤینێن سیاسی بکەت، خیانەتا نەوتەوەی و نیشتیمانی ل ئاخ و گەلێ کوردستانێ و هەموو قوربانیێن سەد سالێن دەربازبوویی دکەت".

ئەڤە ژی دەمەکێ دایە، کو د چەند ڕۆژێن دەربازبوویی دا موقتەدا سەدر ڕابەرێ ڕەوتا سەدر د هەڤدیتنەکا تەلەفزیۆنی دا گوت ل کوردستانێ تنێ پارتی و یەکێتی نینە، بەلکو حزب و ئاراستەیێن دی ژی هەنە و نەوەی نوێ کرە میناک، هەر پشتی ڤێ یەکێ ژی د جادەیێن عێراق و کوردستانێ دا دنگۆیێ وێ یەکێ هاتە بەلاڤکرن کو نەوەی نوێ هاتیە بانگهێشتکرن بۆ بەشداریکرن د پێکئینانا حکومەتا نوویا عێراقێ دا، هەرچەندە چ تشتەک دەربارەی وێ یەکێ ب فەرمی نەگەهشتیە دەست ڤەلڤینا نەوەی نوێ، لێ لگۆری تویتەکا شاسوار عەبدولواحید سەرۆکێ ڤەلڤینا نەوەی نوێ کو ڕاگەهاندیە، "پشتەڤانیا پێکئینانا حکومەتا عێراقێ دکەین، کو نوینەراتیا داخوازیێن خەلکی بکەت و دووربیت ژ بەربژارێن حزبی ب حزبێن کوردی ژی ڤە". ئەڤە ژی وەسا دهێتە لێکدان کو نەوەی نوێ بەشداریێ د پێکئینانا حکومەتا نوودا ناکەت.

س.م