سەرنووچە:

دەربارەی کۆرۆنایێ ئیران وەلاتیێن خۆ ژ گەشتکرن بۆ هەرێمێ ئاگەهدار دکەت

گەفا کۆرۆنایێ لسەر جیهانێ
فۆتۆ: 
2020-01-29

339 جار خوێندراوەتەوە

ژبەر ڤایرۆسا کۆرۆنایێ وەزارەتا ساخلەمیا ئیرانێ داخوازێ ژ وەلایێن خۆ دکەت سەرەدانا هەریەک ژ هەرێما کوردستانێ، سعودیێ و ئیماراتێ نەکەن.

سەعید نمەکی وەزیرێ ساخلەمیا ئیرانێ بۆ میدیایان ڕاگەهاند، "داخوازێ ژ وەلاتیێن خۆ دکەین کو ژبەر دەرکەفتنا حالەتێ ڤایرۆسا کۆرۆنایێ ل ئیماراتێ، گەشتێ بۆ وی ولاتی نەکەن".

بەحسا وێ یەکێ ژی کر، "هەتا ئەگەر گەشتا وان جهان ژی بکەن کو حالەتێن تووشبوون ب ڤایرۆسێ تێدا دەرکەفتینە، داخوازێ ژ هەوە دکەین ب ئاوایەکێ گشتی پاقژیا خۆ بپارێزن وەک شووشتنا دەستان و پاقژ ڕاگرتنا وان ب ئاوایەکێ بەردەوام".

بەحسا وێ یەکێ ژی کر، "ئەم نکارین تەڤاهیا دەرگەهان لسەر هاتنە ناڤا ڤایرۆسێ دابێخین، ژبەر وێ یەکێ لسەر وەلاتیێن مە پێدڤیە لگۆر ڕێنمایێن کاروبارێن ساخلەمیێ خۆ بپارێزن".

ژ ئالیەکێ دی ژی ڤە، کیانوش جەهانپور ڕێڤەبەرێ فەرمانگەها پەیوەندیێن گشتیێن وەزارەتا ساخلەمیا ئیرانێ دبێژیت، "مە ژبەر وێ یەکێ هەرێما کوردستانێ د ناڤ لیستا وان ولاتێن کو سەرەدانێ بۆ نەکەن دانایە، ژبەر کو حالەتێ تووشبوون ب ڤایرۆسا کۆرۆنا ل هەرێمێ هاتیە تۆمارکرن"، لێ وەزارەتا ساخلەمیا هەرێما کوردستانێ ب هەموو ئاوایان هەبوونا حالەتێ ڤایرۆسا کۆرۆنا ڕەت دکەت.

ئەڤە ژی دەمەکێ دایە، ئەڤرۆ وەزیرێ ساخلەمیا ئیماراتێ ڕاگەهاند، یەکەم حالەتێ توشبوون ب ڤایرۆسا کۆرۆنا د ولاتێ وان دا هاتیە تۆمارکرن. هەڤدەم، هەژمارا وان کەسێن کو بسەدەما ڤایرۆسێ کۆرۆنایێ ل ولاتێ چینێ ژیانا خۆ ژ دەستداین بۆ ١٣٢ کەسان بلندبوو.

س.م