سەرنووچە:

سەرۆکێ هەرێمێ و جێگرێ وەزیرێ دەرڤەیێ ڕوسیا جڤیان

لسەر باشترکرنا پەیوەندیێن هەردوو ئالیان
فۆتۆ: 
2020-01-29

191 جار خوێندراوەتەوە

سەرۆکێ هەرێما کوردستانێ و جێگرێ وەزیرێ دەرڤەیێ ڕوسیا جڤیان و تێدا، پرسا ئابوریا ناڤبەرا هەرێمێ و روسیا، پرسا سوریا و ئالۆزیێن عێراقێ گوتوبێژکرن.

سەرۆکایەتیا هەرێما کوردستانێ د ڕاگەهاندنەکێ دا بەلاڤکر، ئەڤرۆ چارشەمبێ،  ٢٩ی چلەیا ٢٠٢٠ێ، نێچیرڤان بارزانی، سەرۆکێ هەرێما کوردستانێ د جڤینەکێ دا دگەل میخائیل بۆگدانۆف، جێگرێ وەزیرێ دەرڤەیێ روسیا کو هەڤدەم نوینەرێ سەرۆکێ وی وەلاتی یە بۆ کارۆبارێن ڕۆژهەلاتا ناڤەڕاست و ئەفریقیا، " خواستا هەرێمێ بۆ پێشڤەبرنا پەیوەندیان ژ هەموو بیاڤان دا دگەل روسیا تەکەزکر و دەستخۆشی ژی ل کارێن کۆمپانیا گازپڕۆما روسی ل کەرتا وزەیا هەرێمێ کریە".

ئاماژە ب وێ یەکێ ژی کریە، " هەردوو ئالیان ڕەوشا عێراقێ گوتوبێژکریە و تەکەز لسەر گرنگی دان ب ئارامکرنا ڕەوشا دەڤەرێ و نەبوونا عێراقێ ب گۆڕەپانا هەڤڕکیێن هێزێن هەرێمێ و ناڤدەولەتی کرنە".

بەحسا وێ یەکێ ژی کریە، "هەردوو ئالیان بالکشاندیە سەر خۆنیشاندانان و بزاڤێن دیارکرنا سەرۆک وەزیرێ داهاتیێ عێراقێ، ئاریشەیێن هەولێر- بەغدا و گرنگی دان ب هەڤبەندیا پێشمەرگەی و ئاڕتێشا عێراقێ ل دەڤەرێن ئاریشە لسەر".

هەر د ڕاگەهاندنا سەرۆکایەتیا هەرێمێ دا هاتیە، د جڤینێ دا گوتوبێژ دەربارەی، " ڕەوشا سوریا و هەبوونا هێزێن ناڤدەولەتی و پرسا کوردان و داهاتیا وان د چارچۆڤەیێ سوریا دا و ڕۆلێ روسیا د وی وەلاتی دا هاتنە کرن".

هەڤدەم، گوتوبێژ دەربارەی، " پڕۆسەیا ئاشتیێ ل ڕۆژهەلاتا ناڤەڕاست و داوی پێشهاتێن کریزا فەلەستیێ – ئیسڕائیل، ڕەوشا دەڤەرێ ب گشتی و چەند پەرسێن دی هاتیە کرن".

زەلالکریە ژی، جێگرێ وەزیرێ دەرڤەیێ روسیا ب هەڤالتیا بالیۆزێ وی وەلاتی ل بەغدا و کونسولێ گشتی ل هەولێرێ و هەژمارەکا دیپلۆماتکار و بەرپرسێن کۆمپانیا گازپرۆم یا ڕوسیا دگەل سەرۆکێ هەرێمێ جڤیاینە.

ئەڤەژی د دەمەکێ دایە، سالا دەربازبووی سێرگی لاڤرۆڤ، وەزیرێ دەرڤەیێ روسیا سەرەدانا عێراقێ کر و دیڤدا سەرەدانا هەرێما کوردستانێ کر و دگەل بەرپرسێن بلندێن هەرێمێ جڤیا.

س.ع