سەرنووچە:

باکورێ کوردستانێ.. چیرۆکا ژنەکێ کو پشتی ١٧ دەمژمێران دبن ئاڤاهیەکێ هەرفتی دا هات ڕزگارکرن

ل باژاڕێ خەرپێت
فۆتۆ: 
2020-01-25

529 جار خوێندراوەتەوە

ژنەک بناڤێ عەزیزە ل باژاڕێ خارپێت یێ باکورێ کوردستانێ پشتی ١٧ دەمژمێران دبن ئاڤاهیەکێ کو ژبەر عەردهەژا شەڤێدی هەرەفتبوو هات ڕزگارکرن.

پشتی کو شەڤا دەربازبوویی عەردهەژەکا بهێز باکورێ کوردستانێ هەژاندی، ژبلی جان ژدەستدای و برینداران چەندین کەس دبن ئاڤاهیێن هەرفتی دا ئاسێماین و پشتی بوورینا چەندین دەمژمێران ژ ئالیێ تیمێن هەوارهاتنێ ڤە هاتن ڕزگارکرن.

یەک ژ وان کەسێن کو دبن ئاڤاهیان کەفتبوو و وێ بخۆ پەیوەندی ب تیمێن هەوارهاتنێ کری، ژنەک بوو بناڤێ عەزیزە، کو زێدەتری ١٧ دەمژمێران دگەل چەند کەسێن دی دبن ئاڤاهیەکێ هەرفتی ل باژاڕێ خارپێت دا مابوون.

لگۆری گرتەیەکا ڤیدیۆیی کو د میدیایێن تورکیا دا هاتیە بەلاڤکرن، دەردکەڤیت تیمێن هەوارهاتنێ مژیلی لێگەریانێ نە لدیف قوربانیان کو دبن ئاڤاهیێن هەرفتی دا مانە، د وی دەمی دا عەزیزە تەلەفۆنا کارمەندەکا تیما هەوارهاتنێ دکەت و ئەو کارمەندە ژی ژبۆ ئارامکرن و دروستکرنا مورالێ بۆ وێ ب کوردیا زازاکی و تورکی دگەل دا دئاخڤیت و دبێژیتێ، "ئارام بە ئەم ل ڤێرەنە، کێم مایە عەزیزە، تشتێ کو ئەم ژ تە دخوازین، تۆ ب هەر کەسی ڕا باخڤە نەهێلی کەس ل خوارێ بێدەنگ بیت (بمریت)".

هەروەسا دبێژیتێ، "ژ دفنێ نەفەسا کوور وەرگرن و ژ دەڤی دەرخەن، چ تشتێ کو تۆ ژێ بترسی نینە، ئەم هەموو ل سەری نە، تنێ ئارام بە، عەزیزە تەماشە بکە تۆ دایکا هەموو وان کەسانی کو دبن ئاڤاهی دانە، تاکە کەسا کو مە پەیوەندی دگەلدا هەی تەنێ تووی، تەمام جانامن؟، تۆ یا بهێزی و دێ مینی بهێز، نابیت بگری و پێدڤیە ئارام بی و دگەل هەر کەسەکێ کو ل وێرێ یە بئاخڤی".

پشتی دەربازبوونا دەمەکێ بسەر پەیوەندیا تەلەفۆنی دا و ب بەردەوامیا لێگەڕیان و بزاڤێن تیمێن هەوارهاتنێ، عەزیزە و چەندین کەسێن دگەلدا دهێنە ڕزگارکرن، کو پشتڕا تیمێن هەوارهاتنی ڤیدیۆیا دەما ڕزگارکرنێ ژی بەلاڤکرن.

ئەڤە ژی دەمەکێ دایە، دەمژمێر ٨ و ٥٥ خولەکێ شەڤا دەربازبوویی عەردهەژەکا بهێز ب گۆڕا ٦.٨ ڕێختەر باکورێ کوردستانێ هەژاند، ب وێ سەدەمێ ژی ٢٢ کەسان ژیانا خۆ ژ دەستدان و زێدەتی هزار کەس ژی برینداربوون کو پڕانیا وان  ل باژارێ خارپێت بوون.

س.م

 

دیمەنێ دەما ڕزگارکرنا عەزیزەیێ