سەرنووچە:

١٩ سال بسەر وەغەرا داویا هونەرمەند ئەحمەد کایا دەربازبوون

فۆتۆ: 
2019-11-16

451 جار خوێندراوەتەوە

 د رۆژەکا وەکى ئەڤرۆ دا ل سالا ٢٠٠٠ێ ل ولاتێ فرەنسا هونەرمەندێ بناڤودەنگ ئەحمەد کایا وەغەرا داویێ کر، ل تەنشت قەبرێ یلماز گونەى هاتە ڤە شارتن.

ئەحمەد کایا هونەرمەندێ مەزنێ گەلێ کورد د ٢٨ێ جۆتمەها سالا ١٩٥٧ێ دا، ل باژارێ مەلەتی یا باکورێ کوردستانێ د ناڤا مالباتەکا هەژار دە ژدایک بوو. ژ بەر کو بابێ وی کارکەرێ کارگەها قۆماش بوو، دەبارا ژیانا وان نەباش بوو، ژ بەر وێ یەکێ ب مالباتا خوە رە کۆچبەری ستەنبۆلێ دبن.

ئەحمەد کایا ل ستەنبۆلێ دەست ب خواندنێ کر، لێ ژ بەر هەژاریێ، نەچار ما ژ خواندنێ ڤەقەتە و ژ بۆ کو ئالیکاریا بابێ خوە بکە، دەست ب شاگرتی و کاسبکاریێ س ناڤا بازارێن ستەنبۆلێ دە کر.

پشتی دەمەکی ئەحمەد کایا بریارێ ددە خواندنا خوە ل دەرڤە تەمام بکە " ئەزموونێن خارجی" و خواندنا ناڤەندی ب وی ئاوایی تەمام کر. پشترە د سالێن ١٩٧٠ێ دا ب هەڤالێن خوە رە دەرباسی ناڤ کۆمەلەیا زانیاریێن گەل دبە و د وێ کۆمەلەیێ دە دبە خوەدیێ هەستێن شۆرەشگێری.

ئەحمەد کایا د وێ دەمێ دە دەست ب نڤیساندنا هەلبەستان دکە و هێدی هێدی  د ناڤا جڤاکا هەلبەستڤانان دە خوە بجی دکە و هەیا تەمەنێ وی دبە ٢١ سالی، د سالا ١٩٧٨ سالیێ دە دچە خزمەتا سەربازیێ و ١٨ مەهان سەربازیێ دکە.

پشتی کو ژ سەربازیێ ڤەدگەرە دیسا دەست ب کارێ هەلبەست و موزیکێ ب ئاوایەکێ نۆرمال دکە و کارین خوە یێن ناڤ کۆمەلەیێن شۆرەشگیر یێن چەپ بەردەوام دکە و ب ژنەکێ ب ناڤێ ئەمینە رە دزەوجە.

د سالا ١٩٨٠ێ دە د ئەنجاما داربەیا لەشکەریا ١٢ێ تیرمەهێ دە تێ گرتن و راستی ئیشکەنجەیێ تێ و پشتی دەمەکی تێ ئازادکرن.

ب گشتی ئەحمەد کایا پشتی سالێن ٨٠ێ یێ، د ناڤا تورکیا دە ناڤدار دبە و دەست ب موزیکا پیشکەتی دکە و ئیدی وەکی کەسەکی ناسکری د ناڤا جڤاکێ دە دەنگ ڤەددە.

ئەحمەد کایا گەلەک بەرهەمێن گرنگ یێن شۆرەشگێری د ژیانا خوە یا هونەری دە بەلاڤ کرن و ئەو رەوش هەیا سالا ١٩٩٩ێ بەردەوام بوون.

د ١٠ێ سوباتا سالا ١٩٩٩ێ دە، د ئاهەنگەکا مەزن دە کو تەڤاهیا هونەرمەندێن مەزنێن تورکیا تیدە بەشدار بوون، ئەحمەد کایا وەکی باشترین هونەرمەندێ تورکیایێ تێ هەلبژارتن.

د ئاهەنگێ دا ئەحمەد کایا دازانین باوەریا وی ب براتیا ناڤبەرا کورد و تورکیان دە هەیە و ئەو دێ ب زمانێ کوردی سترانان بێژە، لێ وێ دەمێ راستی هێرشا هونەرمەندێن نەتەوەپەرست هات و پشتی وێ یەکێ ل دادگەها تورکیایێ  وەکی خیانەتکارێ وەلات هاتە بناڤکرن و نەچار ما تورکیایێ بجی بهێلە.

ل ١٦ێ مژدارا ٢٠٠٠ێ ل باژارێ پاریسا پایتەختا فەرەنسایێ، ب سەدەما کریزا دل ئەحمەد کایا ژیانا خوە ژ دەست دا و ل گۆرستانا "پێر لاچیس" ل کێلەکا قەبرێ ییلماز گونای هاتە ڤەشارتن.