سەرنووچە:

دەزگەهێ لوتکە: ٧ گەنجێن کورد د گرتیگەهەکا تورکیا دا هاتنە ئازادکرن

فۆتۆ: 
2019-11-16

422 جار خوێندراوەتەوە

دەزگەهێ لوتکە ڕاگەهاند، کارینە ٧ گەنجێ کورد ل گرتیگەهەکا تورکیێ ئازاد بکەن و تەرمەکێ ژی کو خەلکێ باژارێ بەسرایە ڕادەستی عێراقێ بکەن.

ئاری جەلال رێڤەبەرێ دەزگەهێ لوتکە بۆ کارۆبارێ پەنابەران بەلاڤکر، د بەردەوامیا کار و چالاکیێن دەزگەهێ لوتکە ل ولاتێ تورکیا و ب ڕێیا نوینەرێ دەزگەهێ لوتکە ل وی ولاتی، کارینە ٧ گەنجێن خەلکێ باژارێ سلێمانی، هەولێر و دهۆکێ ئازاد بکەن، پشتی کو بۆ دەما مەهەکێ ل گرتیگەهەکا باژارێ ئیستەنبولێ هاتبوون دەستسەرکرن.

ناڤبری گۆت ژی، پشتی کو نووچەیا دەستگیرکرنا ٧ کۆچبەران دگەهیتە دەستێ وان، ب هەڤکاریا کنسولخانەیا عێراقێ ل تورکیا، ب هاوارا وان کەسان ڤە چوونە و پشتی دەربازکرنا مامەلەیێن وان یێن یاسایی و دەرخستنا پاسپۆرتان بۆ وان، هەموو ڤەگەراندنە هەرێما کوردستانێ.

بەحسا وێ یەکی ژی کر، هەر ب رێیا نوینەرێ دەزگەهێ لوتکە ل تورکیا پشتی کو ولاتی رەعەد نەزار عەبدولوەهاب ل باژارێ بۆرسایا تورکیێ ب جەلتەیا دلی وەغەرا داویێ کری، کاروبارێن یاسایی بۆ شاندنا تەرمێ وی ب رێیا بالەفرخانەیا بەغدا هاتن جیبجیکرن و رادەستی کەسوکارێن وی هاتکرن، کو خەلکێ بەسرایە.

 ئەڤە ژی د دەمەکی دایە، لگۆری ئامارێن سازیا کۆچا ناڤدەولەتی، ژ دەستپێکا ئیسال ڤە هەیا دەستپێکا مەها جۆتمەهێ، هزار و ٤١ کۆچبەران د دەریا ناڤەراست دا ژیانا خۆ ژ دەست دانە یان ژی بێسەرۆشوین بوونە، بسەدان ژی د زینداناندانە ژبەر کو  بزاڤکرنە ب ئاوایەکی نەیاسایی سنورێ وان ولاتان دەرباز بکەن.

س.م