سەرنووچە:

هەدەپێ بەیاننامەک دەربارەی سالڤەگەڕا بدارڤەکرنا سەید ڕزا و هەڤالێن وی بەلاڤکر

فۆتۆ: 
2019-11-15

300 جار خوێندراوەتەوە

بەریا ٨٢ سالان و د ڕۆژەکا وەک ئەڤرۆ دا هەریەک ژ سەید ڕزا و هەڤالێن وی کو پێشەنگیا شۆڕەشا باکورێ کوردستانێ دکرن، ژ ئالیێ دەستهەلاتا وی سەردەمی یا تورکیا ڤە هاتنە بدارڤەکرن، هەڤسەرۆکاتیا هەدەپێ ژی ب بەیاننامەیەکێ ئەو سالڤەگەر ب بیرئانی.

هەڤسەرۆکاتیا هەدەپێ ب بەیاننامەیا بیرئانینا وێ سالڤەگەڕێ ب پێشەکیا "ئەم بەژنا خۆ ل هەمبەر سەید ڕزا و هەڤالێن وی دچەمینن" دەستپێکریە و دیارکریە، کۆمکوژیا دەرسیمێ ڕووپەلەک ڕەش و تاریی یا تورکیایە کو هێشتا نەهاتیە ڕوون کرن، ئەو دێ بۆ هەرتمی بەرخۆدانا مەزن یا سەید ڕزا و هەڤالێن وی د ویژدان، هزر و بیر و خەباتا خۆ دا ساخ بهێلن.

دەقێ بەیاننامەیا هەڤسەرۆکاتیا پارتیا دیموکراتا گەلان (هەدەپێ):

ئەم بەژنا خۆ ل هەمبەر سەید ڕزا و هەڤالێن وی دچەمینن

ئەم سەید ڕزا و هەڤالێن وی، د سالڤەگەڕا ٨٢ێ یا بدارڤەکرنا وان دا ب ڕێز ڤە ب بیر دئینین. د ١٥ێ مژدارا ١٩٣٧ێ دا، ژبەر کو سەید ڕزا و هەڤالێن وی، پێشەنگیا بەرخۆدانا خەلکێ دەرسیم و عەلەویان کرن، ژبەر ڤێ سەدەمێ بۆ هاتن بدارڤەکرن. ب ڤێ بدارڤەکرنێ خواستن بەرخۆدانا خەلکی بشکێنن.

ڕێڤەبەریا وی دەمی، ژ بۆ کو بکاریت سەید ڕزایێ ٧٥ سالی بدارڤە بکەت، ژیێ وی بچیک کر، ژیێ کورێ وی یێ بچیک ژی مەزن کر و ب وی ئاوایی ئەو بدارڤەکرن. وان داخوازا داویێ یا سەید ڕزا جیبجی نەکرن و ئەو ل بەر چاڤێن کورێ وی بدارڤەکرن، هەیا کو دلێ وی بێشینن.

ئەڤرۆ ژی گۆرا سەید ڕزا ژ خێزان و خەلکێ کوردێ عەلەوی دڤەشێرن، لێ سەید ڕزا د سالڤەگەڕا ٨٢ێ یا بدارڤەکرنا خۆ دا ژ بیرا گەلێن تورکیایێ و کوردان نەچوویە و نەکارین ژ ناڤببەن. ژبەر کو ب بدارڤەکرن، کۆمکوژی، نکولی و گڤاشتنان نەکارین بەرخۆدان و خەباتا وان ژناڤ ببەن.

ئەم بکەرێن کۆمکوژیا دەرسیمێ و ڤێ تاوانا ل دژی مرۆڤاتیێ هاتی کرن ژ بیر ناکەین و ناهێلین ژ بیر بچن. ئەم دێ بۆ هەرتمی دێ بەرخۆدانا مەزن یا سەید ڕزا و هەڤالێن وی د ویژدانا خۆ، هزر و بیر و د خەباتا خۆ دا ساخ بهێلین.

کۆمکوژیا دەرسیمێ ڕووپەلەک ڕەش و تاریی یا ڤی ولاتیە کو هێشتا نەهاتیە ڕوون کرن و ڕووبڕووبوونەک نەهاتیە کرن. پێدڤیە گەلێن تورکیا ل حسابا ڤی دەمێ ڕەش، کو تژیە ژ کۆمکوژی و زلمێ بپرسیت. ڕووبڕووبوونا جڤاکی دێ ڕێیا ڕاستیێ ڤەکەت و ئاشتیێ و دیموکراسێ ئاڤا بکەت.

ئەم سەید ڕزا و هەڤالێن وی کو ل بەر زولما دەولەتێ سەرێ خۆ نەچەماندنە و ب وێرەکی بەر ب مرنێ ڤە چوونە و بۆ دەولەتێ بوونە دەرد و خەم، د سالڤەگەڕا ٨٢ێ یا بدارڤەکرنا وان دا ب بیر دئینین و ل هەمبەر بەرخۆدانا وان جارەکا دی بەژنا خۆ دچەمینن.

پەروین بولدان-سەزای تەمەللی

هەڤسەرۆکێن گشتیێن هەدەپێ

١٥ مژدارا ٢٠١٩

S.M