سەرنووچە:

کوڕەک پشتی کو د خۆنیشاندانێن بەغدا دا هاتیە کوشتن ب ساخی ڤەگەڕیاڤە

فۆتۆ: 
2019-10-16

2329 جار خوێندراوەتەوە

پشتی کو نووچەیا کوشتنا موسلیم بەلاڤ دبیت، کەسوکارێن وی ڤەدشێرن و بەهیێ بۆ ددانن، لێ پشتی سێ ڕۆژان و پشتی تەمامبوونا بەهیا وی، موسلیم ب ساخی ڤەدگەڕیت.

لگۆری نووچەیەکا سایتێ ئەلعەرەبیە، کورەکێ ١٧ سالی بناڤێ موسلیم، زێدەباری نەڕازیبوونا دایک و بابێن وی، ل ڕۆژا ئەینیێ ٤ێ جۆتمەها ٢٠١٩ێ بەر ب خۆنیشاندانێن بەغدا ڤە دچیت، هەر وەک گەنجێن دی یێن وی باژێڕی ب مەرما داخوازکرنا مافێن خۆ.

لێ دەردورا دەمژمێر حەفتێ ئێڤاری و د دەما تەقەکرن ژ خۆنیشاندەران ژ ئالیێ هێزێن ئەولەهیێ ڤە ب مەرەما بەلاڤەکرنا وان، هەڤالێن موسلیمی مالا وی ئاگەهدار دکەن، کو کوڕێ وان گولەیەک ب سەرێ وی کەفتیە و هاتیە کوشتن، ب ڤێ یەکێ ژی سەروچاڤێن وی تێکچوونە، هەروەسا پۆلیسان ڕێ نەدایە ئەو نێزیکی لاشەیێ وی ببن و ب تڕۆمبێلا هەوارهاتنێ لاشەیێ وی بۆ نەخۆشخانەیێ ڤەگوهاستنە.

مامێ موسلیم گوتیە، "ئێڤاریا هەمان ڕۆژ نووچەیا کوشتنا وی گەهشتیە مە، ئەم د هەمان دەم دا چووین بۆ چەند نەخۆشخانەیان و دیف لەشێ وی دا دگەڕیاین، داویێ ل یەک ژ نەخۆشخانەیان مە لاشەیێ وی وەرگرت و بۆ نەجەف ڤەگەڕیاین، دیڤدا ڕێورەسمێن ڤەشارتنا وی مە تەمامکرن و بەهی بۆ دانا".

"لێ هەر پشتی سێ ڕۆژان و پشتی تەمامبوونا بەهیا وی، نووچەیا ساخیا موسلیم گەهشتیە مە و گوتنە مە، کو ل قاتێ ١٥ێ یێ نەخۆشخانەیێ یە و ئەو قات یێ تایبەتە ب کەسێن بێ ناسنامە".

د دڕێژاهیا ئاخافتنێن خۆ دا دیاکریە ژی، "ئەم گەهشتینە نەخۆشخانەیێ و پشتی پشتڕاستیێ مە دیت موسلیم یێ ساخ بوو، لێ یێ بریندارە، د وی دەمی دا ژی مە مالباتەکا دی دیت کو لدیف کوڕێ بێسەرۆشینێ خۆ دا دگەڕیان".

"پشتی دیڤچوون و پشتڕاستبوونێ دەرکەفت ئەو کەسێ مە ڤەشارتی کوڕێ وان بوویە بناڤێ حسێن، کو ب تەمامی لەش و بلنداهیا وی هەڤئاوایێ موسیلم بوو، هەڤدەم هەردوو ژی د تەمەنێ ١٧ سالیێ دابوون.

ئەڤە ژی دەمەکێ دایە، ژبەر ئالۆزی و بەرفرەهیا خۆنیشاندانێن عێراقی هەیا نها چەندین کەسێن دی ژ خۆنیشاندەرێن عێراقێ بێسەرۆشینن، مالباتێن وان بێئاگەهن ژ چارەنڤیسێ وان.

ل دەستپێکا ڤێ مەهێ خۆنیشاندانێن وەلاتیان ل بەشەک ژ باژارێن ناڤەراست و باشورێ عێراقێ ل دژی نەبوونا خزمەتگوزاریان و بێکاری و گەندەلیێ دەستپێکر، هەیا داویهاتنا خۆنیشاندانان ژبەر ئالۆزیێن ناڤبەرا خۆنیشاندەر و هێزێن ئەولەهیێ، زێدەتری ١٦٠ کەس هاتن کوشتن و نێزیکی شەش هزار کەسێن دی ژی برینداربوون.

س.م