سەرنووچە:

هەسەدە: تورکیا بۆمبەبارانا کاروانەکێ سڤیلان کر و ب دەهان کەس شەهید و برینداربوون

هاوار نیۆز: ڕۆژنامەڤانەکێ مە شەهیدبوویە
فۆتۆ: 
2019-10-13

701 جار خوێندراوەتەوە

هەسەدێ ڕاگەهاند، بالەفرێن ئارتێشا تورکیا کاروانەکێ سڤیلان ل ڕێیا چوون بۆ سەرێ کانیێ بۆمبەباران کر و د ئەنجامێ دا دەهان کەس ژ سڤیل و ڕۆژنامەڤانان شەهید و برینداربوون.

د ڕاگەهاندنەکێ دا هێزێن سوریایا دیموکراتیک (هەسەدە) دیارکر، ئەڤرۆ یەکشەمبیێ ئەو کاروانێ سڤیل و ڕۆژنامەڤانان کو ژ ئالیێ هەژمارەک کارمەندێن هێزێن پاراستنا ناڤخۆ دهاتن چاڤدێریکرن ل ڕێیا چوون بۆ سەرێ کانیێ بوونە ئارمانجا هێرشێن بالەفرێن تورکیا.

بەحسا وێ یەکێ ژی کریە، "ئەڤ کریارێن تورکیا لبەرچاڤێن جیهانێ دکەت، بنپێکاریێن زەلالن لەهمبەر تەڤاهیا بها و یاسایێن ناڤدەولەتی و مرۆڤی، ئەم جڤاکا ناڤدەولەتی بەرپرسیار دبینین لسەر ڤان کۆمکۆژیێن تورکیا لەهەمبەر وەلاتیێن سڤیل پێکدئینیت".

هەڤدەم رەوانگەها سوریا بۆ مافێن مرۆڤان دەربارەی ب ئارمانجگرتنا وی کاروانێ سڤیل و ڕۆژنامەڤانان ڕاگەهاند، ئەو کاروان ل تل تەمەر بەر ب سەرێ کانیێ دچوو و ٩ کەس ژ سڤیل و هێزێن دگەل دا شەهیدبوونە کو پێنج ژ شەهیدان سڤیل و ڕۆژنامەڤانن.

دیارکریە ژی، دهێتە چاڤەرێکرن هەژمارا شەهیدان زێدەببیت، ژبەر هەبوونا هەژمارەکا زێدەیا برینداران کو د ناڤ وان دا زارۆک ژی هەنە و برینا هند ژ وان یا گرانە، د ناڤ وی کاروانی دا هەژمارەک ڕۆژنامەڤانێن بیانی ژی هەبوونە.

هەر دەربارەی بۆمبەبارانا وی کاروانی ئاژانسا نووچەیی یا هاوار نیۆز ڕاگەهاند، نووچەگەهانێ وان سەعەد ئەحمەد دگەل وی کاروانێ سڤیلان ل ڕێیا چوون بۆ سەرێ کانیێ شەهیدبوویە، هەژمارەک ڕۆژنامەڤانێن دی ژی برینداربوونە.

ئاشکرا کر ژی، بریندارێن بۆمبەبارانێ بۆ نەخۆشخانەیێن باژارێن قامشلۆ، حەسەکێ، تل تەمەر و عامودێ هاتنە ڤەگوهاستن.

ژ ئالیێ خۆ ژی ڤە هەیڤا سۆرا کوردی ژبەر زووریا برینداران بانگا وەلاتیێن هەموو گەلێن دەڤەرێ کر، کو سەرەدانا نەخۆشخانەیان بکەن و خوینێ بدەنە برینداران.

ئاژانسا هاوار نیۆز دازانین ژی، هەر ئەڤرۆ نووچەگەهانەکێ وانێ دی محەمەد ئەکەنجی ژ ئەنجاما بۆمبەبارانا ئارتێشا تورکیا بۆ سەرێ باژارێ سەرێ کانیێ برینداربوویە، کو مژیلی ڕوومالا شەڕ و ئالۆزیێن هێرشا تورکیا بۆ سەر وی باژاڕی بوو.

دیارکر ژی، پشتی برینداربوونێ ناڤبری ب مەرەما چارەسەریێ بۆ نەخۆشخانەیا تل تەمەر هاتە ڤەگوهاستن.

س.م