سەرنووچە:

ئارتێشا تورکیا ب چەکێن گران تۆپبارانا گوندەکێ دێرێکێ دکەت

هێرشا ئارتێشا تورکیا بۆ سەر ڕۆژئاڤایێ کوردستانێ
فۆتۆ: 
2019-10-10

156 جار خوێندراوەتەوە

میدیایێن ڕۆژئاڤایێ کوردستانێ ڕاگەهاندن، ژ سەرێ سپێدەهیا ئەڤرۆ ڤە هەیا نها ئارتێشا تورکیا ب بەردەوامی گوندێ عەین دیوار یێ سەر ب باژارۆکێ دێرکێ ب چەکێن گران تۆپباران دکەت.

دیارکرن ژی، د نها دا هێزێن هەسەدێ بەدەوامن لسەر بەرسڤدانا هێرشان. ئێڤاریا دوهی ژی د درێژاهیا بەرسڤدانان دا تانکەک ژناڤبرنە و دوو لەشکەرێن ئارتێشا تورکیا ژی کوشتنە.

ئەڤە ژی دەمەکێ دایە، ئێڤاریا دوهی چارشەمبیێ (٩ێ جۆتمەها ٢٠١٩ێ) ڕەجەب تەیب ئەردۆغان سەرۆک کۆمارێ تورکیا دەستپێکرنا ئۆپراسیۆنا لەشکەرى ل باکورێ رۆژهەلاتا سوریا دبن ناڤی "کانیا ئاشتیێ" ڕاگەهاند.

پشتی راگەهاندنا دەستپێکرنا ئۆپەراسیۆنێ ژی، هەسەدێ دازانین، بالافڕێن تورکیایێ دەست ب بۆمبەبارانکرنا دەڤەرێن سڤیلان ل ڕۆژئاڤایێ کوردستانێ کرنە، ترسەکا مەزن ژی لجەم خەلکێ دەڤەرێ چێبوویە.

گوت ژی، "مە شانیێن بەڕەڤانیکرن لهەمبەرێ هێرشێن ئارتێشا تورکیایێ هەنە و دەستکەفتێن خۆ ڕادەستی تورکیایێ ناکەین، داخوازێ ژی ژ ئەمریکا و هەڤپەیمانان دکەین دەڤەرا دژە فڕینێ ڕابگەهینن".

هەڤدەم ڕوانگەها سوری بۆ مافێ مرۆڤان ئاشکرا کر، د یەکەم ڕۆژا ڕاگەهاندنا ئۆپەراسیۆنا تورکیا و دەستپێکران هێرشان  دا ١١ وەلاتی شەهیدبوونە و هەژمارەکا زێدە ژی بریندارابوونە کو پڕانیا وان سڤیلن.

دەستپێکرنا ئۆپەراسیۆنێ تورکیا ل باکور و ڕۆژهەلاتا سوریایێ کارڤەدانێن مەزنێن جیهانی لدیف خۆ دا ئینان و ژ وان ژی یەکێتیا ئەوروپا ڕاگەهاند، "داخوازێ ژ تورکیایێ دکەین هێرشێن خۆ لسەر ڕۆژئاڤایێ کوردستانێ رابگریت".

هەروەسا هاوکو ماس وەزیرێ دەرڤەیێ ئەلمانیا دەستپێکرنا هێرشێن تورکیا بۆ سەر ڕۆژئاڤایێ کوردستانێ شەرمزارکر، فەرەنسا و بەریتانیایێ ژی داخوازا جڤینا بلەز یا جڤاتا ئەولەهیێ دەربارەى دەستپێکرنا ئۆپەراسیۆنا تورکیا کر.

هەڤدەم، لیندز گراهام ئەندامێ جڤاتا پیرێن ئەمریکایێ دازانین، "ئیدارا ترەمپ بێ شەرمانە دەستبەرداری هەڤپەیمانێن مە یێن کورد بوو".

س.م