سەرنووچە:

نەوەى نوێ داخواز دکەت هەلبژارتنێن جڤاتا پارێزگەهێن عێراقێ، هەرێمێ ژى ڤەگریت

داویێ ب نەشەرعیەتا دەما مانا جڤاتێن نها و پارێزگەهان بئینن
فۆتۆ: 
2019-09-17

124 جار خوێندراوەتەوە

نەوەى نوێ داخواز دکەت د گەل هەلبژارتنێن جڤاتا پارێزگەهێن عێراقێ دا هەلبژارتن ل هەرێمێ ژى بهێت کرن.

د راگەهاندنەکێ دا ڤەلڤینا نەوەى نوێ ئاماژە کریە، " هەڤدەما هەلبژارتنێن جڤاتا پارێزگەهان ل عێراقێ ، دەرفەتەکا گونجایە د هەمان دەم دا ل پارێزگەهێن هەرێما کوردستانێ ژى بهێن ئەنجام دان و حکومەتا خۆجهى یا پارێزگەهان بهێتە نوو کرن و هەڤکارێن خەلکى بن بۆ پێشکێشکرنا باشترین خزمەتگوزاریان  و داویێ ب نەشەرعیەتا دەما مانا جڤاتێن نها و پارێزگەهان بئینن".

د راگەهاندنێ دا هاتیە، " دگەل خرابیا رەوشا ئەولەهیێ د سالا ٢٠٠٥ێ وەرە هەیا نها ، هەمى چار سالان جارەکێ و د دەمێ خۆ دا ، ل تەڤاهیا پارێزگەهێن عێراقێ ژبلى هەرێما کوردستانێ هەلبژارتن هاتینە ئەنجام دان، بۆ هەمى خولەکێ حکومەتا خۆجهى یا پارێزگەهان هاتیە نوو کرن، لێ د وێ دەمێ دا هەیا نها ل هەرێما کوردستانێ تەنێ دوو جاران هەلبژارتنێن جفاتا پارێزگەهان هاتینە کرن و هەیا نها پارتى و یەکێتى لسەر ترسا هەلبژارتنان و چوونا هەمبەر خەلکى جارەک دى ، هەلبژارتن بۆ دەمەکا نەدیار هاتیە پاشخستن و یاسایا جفاتان ل بەرژەوەندیا خۆ و بۆ دانانا کەسێن حزبى بۆ پارێزگارێن باژاران سەرەراست کریە".

ڤەلڤین داخواز دکەت،" هەڤدەم دگەل هەلبژارتنێن جڤاتا پارێزگەهێن عێراقێ دا ، هەمان هەلبژارتن ل هەرێمێ بهێتە ئەنجام دان و رێک بهێتە دان کۆمسیۆنا بلند  یا سەربەخۆیا هەلبژارتنێن عێراقێ  سەرپەرشتیا هەلبژارتنان بکەت ، ب هەمان تێچوویا هەلبژارتنان دکەڤیتە ستویێ حکومەتا عێراقێ و دەرفەت نامینیت حکومەتا هەرێما کوردستانێ ب هێجەتا هەبوونا قەیرانا دارایێ بەحسا بودجەیا پێتڤى بۆ هەلبژارتنان بکەت و یاریێ ب دەنگ و چارەنڤیس و ئیرادەیا خەلکى بکەت".

هەروەسا دبێژیت، " ژبلى وێ یەکێ وەها دبینین ئەنجامدانا  هەلبژارتنا پارێزگەهان دگەل پارێزگەهێن دى یێن عێراقێ دا ئاریشا پێکئینانا جفاتا پارێزگەها هەلەبجە ژى دێ هێتە چارەسەر کرن و ئێدى خەلکێ خوشتڤیێ هەلەبجە ل چاڤەرێى پێکنەئینان و ئاڤەدانکرنا پارێزگەهێ و ب وێ یەکێ روحا شەهیدێن وێ پارێزگەهێ ئارام بکەت".