سەرنووچە:

هیومان ڕایتس وۆچ: دوورخستنا سەرۆک باژێڕڤانیان ل تورکیا ژ کارخستنا دیموکراسیێ یە

فۆتۆ: 
2019-08-21

140 جار خوێندراوەتەوە

ڕێکخراوا هیومان ڕایتس وۆچ ڕاگەهاند، دوورخستنا سێ سەرۆک باژێڕڤانیێن باکورێ کوردستانێ ژ کارخستنا دیموکراسیێ یە و بێبەشکرنا کوردانە ژ نوینەراتیا خۆ.

ڕێکخراوێ نڤیسیە، دوورخستنا هەرسێ سەرۆک باژێڕڤانیێن وان، ئامەد و مێردینێ ژ پۆستێن وان "بنپێکرنا زەلالا مافێ دەنگدەرانە، هەروەسا دیموکراسیەتێ د ناڤخۆیا وی ولاتی دا ژ کاردئێخیت.

هیو ویلیامسن ڕێڤەبەرێ پشکا ئەوروپا و ناڤەڕاستا ئاسیا یێ ڕێکخراوا هیومان رایتس وۆچ دەربارەی وێ یەکێ دایەزانین، "حکومەتا ڕەجەب تەیب ئەردۆغان ب ڕێکا دوورخستنا وان سەرۆک باژێرڤانیان ب ئاوایەکێ ب باندۆر ئەنجامێن هەلبژارتنین مەها ئادارا دەربازبوویی ل وان سێ باژێڕێن کوردی هەلوەشاندن کو دەنگدەران هەلبژارتبوون، زێدەباری کو هەرسێ بەربژارێن ڕەوابوون بۆ پۆستێن وان و ئەو سێ باژێڕڤانی بڕێڤەبرنە".

وی بەرپرسی بەحسا وێ یەکێ ژی کریە، "بێ ڕێزی" ب ناڤێ سێ سەرۆک باژێڕڤانیان هاتیە کرن کو تۆهمەتبارکرنە ب پەیوەندیەکا "نەزەلال" دگەل پەکەکێ، ڤێ یەکێ ژی وەها کریە، وەلاتیێن کورد لسەر هەبوونا نوینەراتیێن خۆ بێ بەش بن، کو ڤێ یەکێ مەترسی بۆ تەڤاهیا تورکیایێ دبیت.

ڕێکخراوێ ڕەخنە لسەر وێ یەکێ ژی گرتیە، کو وەزارەتا ناڤخۆیا تورکیا قەیوم بۆ بڕێڤەبرنا پۆستێ وان سێ باژێڕڤانیا دەستنیشانکرنە دەمەکێ دا، دادگەهێ بڕیارا دۆماهیکێ دەربارەی وان تۆهمەتان نەدایە کو ڕووبڕووی وان سێ کەسان هاتنە کرن، دیارکریە ژی، "ئەو سێ سەرۆک باژێڕڤانیە ژبەر گۆتار و چالاکیێن بێ توندوتیژی نها لگۆری یاسایێن تیرۆرێ سەرەدەری دگەل دا دهێتە کرن".

ڕۆژا ١٩ێ ڤێ مەهێ، ب بڕیارەکا سولەیمان سۆیلۆ وەزیرێ ناڤخۆیا تورکیا، هێزێن ئەولەهیێ یێن تورکیا ئاڤاهیێن هەرسێ سەرۆکاتیێن باژێڕڤانین ئامەد، مێردین و وان دورپێچکرن، هەر ئێک ژ سەلجوق مزراکلی هەڤسەرۆکێ باژێرڤانیا ئامەدێ و ئەحمەد تورک هەڤسەرۆکێ باژێرڤانیا مێردین و بەدیعا ئۆزگۆکچێ هەڤسەرۆکا باژێرڤانیا وانێ لسەر پشکا پارتا دیموکراتا گەلان هەدەپێ ب تۆهمەتا پەیوەندیێ دگەل پەکەکێ و چەند دۆسیەیێن دی ژ پۆستێن وان هاتنە دورخستن، ل جهێ وان قەیوم هاتنە دانان (دبێژنە وان کەسان قەیوم کو ژ ئالیێ حکومەتا تورکیا ڤە ل جهێ سەرۆک باژێڕڤانیێن هەلبژارتی دهێنە دانان).

د کارڤەدانا ڤێ بڕیارێ ژی دا، هەڤسەرۆکێ هەدەپێ ڕاگەهاند، ئەو کریار کودەتایەکا سیاسیە و ئیرادەیا گەلی ژ ئالیێ دەستهەلاتێ ڤە هاتیە زەفتکرن.

س.م