سەرنووچە:

هەرێم.. ئاستێ بەرهەمئینانا نەفتێ ل زەڤیا ئەتروش گەهشتە ملیۆنەک بەرمیلان د مەهەکێ دا

فۆتۆ: 
2019-08-21

346 جار خوێندراوەتەوە

کۆمپانیا نیشتیمانیا ئەبوزەبی بۆ وزەیێ ڕاگەهاند، تیمێن وان ل عێراقێ پلەیێن پیڤانەیی تۆمارکرن د بەرهەمئینانا نەفتێ دا ل زەڤیا ئەتروش یا هەرێما کوردستانێ و بەرهەمێ مەهانەیێ خۆ گەهاندیە یەک ملیۆن بەرمیلان د مەهەکێ دا.

کۆمپانیایێ بەحسا وێ یەکێ ژی کریە، ژ دەستپێکا دەرخستنا نەفتێ و بەرهەمئینانێ ل سالا ٢٠١٧ێ ڤە هەیا نها ئەڤە یەکەمجارە ل وێ زەڤیێ بەرهەمێ نەفتێ بگەهیتە وی ئاستی.

ئەڤ ئامارا کۆمپانیا نیشتیمانیا ئەبوزەبی دەمەکێ دایە، هەیا نها داتایەکا دروست ل بەردەست نینە، کو بهێتە زانین ڕۆژانە هەرێم چەند هزار بەرمیلان بەرهەم دئینیت.

ل تیرمەها دەربازبوویی ئێن ئاڕ تی د ڕاپۆرتەکا شیکاری دا بەحسا وێ یەکێ کر، هەرێمێ د شەش مەهێن دەستپێکا ئەڤ سالە دا تێکڕایێ بەرمیلەکا نەفتێ ب ٥٦ دۆلاران فرۆتیە و تەڤاهیا داهاتێ هەرێمێ ل فرۆتنا نەفتێ کو ب بۆڕیان دەستکەفتیە گەهشتیە ٤ ملیار دۆلاران. ئەڤە ژبلی وێ نەفتا ب تانکەران دهێتە هنارتن، کو هەر لگۆری زانیاریێن ئێن ئاڕ تی داهاتێ وێ مەهانە زێدەتری ١٥٠ ملیۆن دۆلارانە.

زێدەبوونا هنارتنا نەفتا هەرێمێ دەمەکێ دایە، کو زێدەباری بلندبوونا بهایێ نەفتێ و داهاتێن وێ، باندۆریەکا وەسا لسەر ژیارا وەلاتیان دروست نەکریە و پرۆژەیێن خزمەتگوزاری ژی ب سستی دەست پێکرنە، هەیا نها ژی هەرێم بۆ پاڕڤەکرنا مووچەیێ فەرمانبەرێن خۆ چاڤەڕێی بەغدایە.

س.م