سەرنووچە:

پارێزگارێ دهۆکێ ب وەکالەت: ئاریشەیا ئاڤێ هاتە چارەسەرکرن

ڕێڤەبەرێ ئاڤێ:  ئەڤ ئاریشەیە دووبارە نابیت
فۆتۆ: 
2019-08-18

472 جار خوێندراوەتەوە

پارێزگارێ دهۆکێ ب وەکالەت ڕاگەهاند، ئاریشەیا ئاڤێ هاتە چارەسەرکرن، ڕێڤەبەرێ ئاڤێ ژی دبێژیت، ئەڤ ئاریشەیە دووبارە نابیت.

پشتی ١١ ڕۆژان ژ بەردەوامیا ئاریشەیا نەبوونا ئاڤا ڤەخوارنێ، ئەڤرۆ هەریەک ژ بەهزاد عەلی پارێزگارێ دهۆکێ ب وەکالەت و جەلال بەرئاشی ڕێڤەبەرێ ئاڤێ و محەمەد سالح حەمید جێگرێ ساخلەمیێ دەربارەی سەدەم و چاوانیا چارەسەریا ئاریشەیا ئاڤێ جڤیان و پشتی جڤینێ ژی پارێزگارێ دهۆکێ ب وەکالەت د کۆنفرانسەکا ڕۆژنامەڤانیا هەڤبەش دا داخویاکرن، وان ئاریشەیا ئاڤێ ب یەکجاری چارەسەرکرنە.

دازانین ژی، چەند ڕۆژن ئەو دگەل ئالیێن پەیوەندیدار لسەر خەت بوونە و مژۆلی چارەسەریا ڤێ ئاریشەیێ بوونە و کارینە شەڤا دەربازبوویی ب تەمامی وێ ئاریشەیێ چارەسەربکەن و وەک بەرێ دێ ٨ هزار مەتر چارگۆشە د دەمژمێرێ دا ئاڤ بسەر وەلاتیان هێتە پارڤەکرن.

هەڤدەم جەلال بەرئاشی ڕێڤەبەرێ ئاڤا دهۆکێ دیارکر، ئاریشە ب یەکجاری چارەسەر کریە، ب ڕەنگەکێ کو دووبارە ئاریشەیەکا وەسا سەرهەلنەدەت.

ئەڤ داخویانیا پارێزگارێ دهۆکێ ب وەکالەت ژی دەمەکێ دایە، هەر ئەڤرۆ بەشەک ژ خۆدان تانکەرێن ئاڤێ هەبوونا بەردەوامیا ڤێ ئاریشەیێ تەکەزکرن و وەلاتی ژی دبێژن، ژبەر نەبوونا ئاڤا ڤەخوارنێ وان پەنا بۆ کڕینا ئاڤێ ب تانکەران بریە، ژبەر زێدەبوونا خواست و فشاران لسەر تانکەرێن ئاڤێ بهایێ وان ژی زێدەبوویە و پێشتر ب ٢٠ هزار دیناران دهاتن کڕین، لێ د نها دا بۆ زێدەتری ٤٠ هزار دیناران بلندبوویە، دگەل ڤێ یەکێ ژی دا ساناهی بدەست ناکەڤن.

دەما ١١ ڕۆژانە ئاریشەیا ئاڤا ڤەخوارنێ ل بەشەک ژ تاخێن دهۆک و قەزا سێمێلێ سەرهەلدایە، ڤێ یەکێ ژی نەڕازیبوونا ئاکنجیێن وان تاخان لێ پەیدابوو و چەندین خۆنیشاندان و خرڤەبوون لدارخستن، داخوازا بلەز چارەسەرکرنا ڤێ ئاریشەیێ دکرن.

س.م