سەرنووچە:

١٢ سال بسەر کارەساتا گر عوزێر و سیبا شێخ خدر دا دەربازبوون

هەیا نها چ کەس لسەر ڤێ یەکێ نەهاتیە دەستەسەرکرن
فۆتۆ: 
2019-08-14

493 جار خوێندراوەتەوە

دیجیتال میدیایا ئێن ئاڕ تی، شنگال، نەزیر شنگالی

بەریا ١٢ سالان و د ڕۆژەکا وەک ئەڤرۆ (١٤ێ تەباخا ٢٠٠٧)، ل دەمژمێر ٧ێ ئێڤاری چار تڕۆمبێلێن بارهەلگر یێن بۆمبەکری هەر ئێک ژ ناحیەیا گر عوزێر و کۆمەلگەها سیبا شێخ خدر کرنە ئارامانج و د ئەنجامێ دا ٨١٢ کەس بوونە قوربانی.

ژ وێ هەژمارا قوربانیان ٣١٢ کەسان جانێ خۆ ژ دەستدان و ٥٠٠ کەسێن دی ژی برینداربوون و ژ وێ هەژمارێ ژی نێزیکی ٥٠ کەسان هەیا نها بێسەروشینن، کو ژ زارۆک و ژن و گەنج و پیران بوون.

ژبلی زەرەرێن جانی زەرەرێن زێدە یێن مادی لدیف خۆ هێلان، کو زێدەتری هزار مال و دوکان تێکدان و هەیا نها بەشەکێ زێدە ژ خودانێن وان نەهاتنە قەرەبووکرن.

ل دەما ڤان تەقینان دا ئەو دوو دەڤەرە ژ ئالیێ ئەولەهیێ ڤە د دەستێ ئارتێشا عێراقێ و هێزێن سەر ب پارتی دیموکراتی کوردستانێ دا بوون.

زێدەباری کو ١٢ سالن بسەر بوویەرێ دەربازبوونە، لێ هەیا نها چ ڤەکۆلینێن هوور ل سەر نەهاتنە کرن و هەیا نها چ کەس لسەر ڤێ بوویەرێ نەهاتنە دەستەسەرکرن.

ئەڤە ژی دەمەکێ دایە، کو ل ڕۆژا ٣ێ تەباخا ٢٠١٤ێ جارەکا دی خەلکێ وان دوو کۆمەلگەهان و شنگالێ ب گشتی ڕاستی کارەساتەکا دی بوون، ئەو ژی هاتنا ڕێکخراوا داعش بۆ کو هێرشی سەر شنگالێ و دەردوورا وێ کر و ب دەهان کۆمکۆژی و وێرانی پێکئینان و هزاران کچ و ژنێن ئێزدیان دەستەسەرکرن و بۆ باژیرێن بن دەستهەلاتا خۆ ل عێراق و سوریایێ ڤەگوهاستن، هەیا نها زێدەباری نەمانا داعشێ چارەنڤیسێ هەژمارەکا زێدە ژ وان نەدیارە.

س.م