سەرنووچە:

جڤاتا وەزیرێن هەرێمێ د یەکەم جڤینێ دا چەند بڕیارەک دان

فۆتۆ: 
2019-07-15

243 جار خوێندراوەتەوە

ئەڤرۆ دووشەمبێ ئەنجومەنا وەزیران ب سەرۆکایەتیا مەسرور بارزانی سەرۆکێ ئەنجومەنا وەزیران، یەکەم جڤینا فەرمی لدارخست و چەند بڕیارەک ژی دان.

ڕاگەهاندنا جڤاتا وەزیران بەلاڤکر، د جڤینێ دا پشتی ڕوونکرنا کارێن دەستبکاربوونا وەزیرێن کابینەیا نوو، جڤاتا وەزیران وەزیرێن خۆ ئەرکدارکرن د بن ڕووناهیا هێلێن گشتی یێن کارنامەیێن کابینەیا نەهێ، بەرنامەیێ کارێن ەزارەتێ د دەمێ ٣٠ ڕۆژان دا دابڕێژێن و پێشکێشی ئەنجومەنا وەزیران بکەن هەیا کو بهێنە پەسەنکرن و بکەڤنە بیاڤێ جێبجێ کرنێ دا.

هەر د جڤینێ دا، سەرۆکێ جڤاتا وەزیران ڕاگەهاند، سووبەهی شاندەکا بلندا حکومەتا هەرێمێ بۆ نیشاندنا مەرەم پاقژیێ دێ سەرەردانا بەغدا دکەت بۆ گۆتووبێژکرن دەربارەی دیتنا چارەسەرکرنەکا گونجای بۆ ئاریشەیێن هەلاویستیێن ناڤبەرا هەولێرێ و بەغدایێ د چارچوڤەیا دەستورێ دا.

ناڤەرۆکا یەکەم جڤینا جڤاتا وەزیران:

یەکەم: تەڤایا وەزیران و خودان پۆستێن بلند دبیت پێگیری دەواما دیاریکریێ وەزاتان بن ژ دەستپێکا دەواما ڕۆژا یەکشەمبێ هەیا داویا دەواما فەرمی کو ڕۆژا پێنجشەمبێ یە.

دووەم: تەڤایا فەرمانبەرێن حکومەتا هەرێمێ دبیت پێگیر بن ب دەمێ دیاریکریێ دەواما فەرمی و چ کەسەکێ مافێ وێ یەکێ نیە د دەمێ دەواما فەرمی دا جهێ کارێ خۆ بجی بهێلیت یان کارەکێ دی ل دەرڤەیێ کارێ  خۆ یێ فەرمی بکەت.

سێیەم: دبیت فەرمانبەر پێگیری پاراستنا نهێنیا کاروبارێن فەرمانبەرایەتیێ بن و نابیت ئەو زانیاریێن کو ب نهێنی دهێنە ڕیزکرن، ژ دەرڤەیێ ڕێکارێن یاسای بهێنە ئاشکرا کرن.

چارەم: هەمی وەزیرین کابینەیا نەهێ یا حکومەتا هەرێمێ دبیت لگۆرێ یاساو ڕێنماهیێن دەستەیا دەستپاقژیا هەرێمێ، تەڤاهیا مال و مولکێن خۆ ئاشکرا بکەن.

پێنجەم: دبیت رووتین د دامو دەزگەهێن حومەتێ دا نەمینیت و تەڤاهیا مامەلەیێن وەلاتیان ب بلە و هوور، بهێنە جێبجێ کرن. هەروەسا بەرسڤدانا سکالا و  پرسیارێن وەلاتیان ب ئاوایەکێ بلە ز گونجای، دڤێت ڕیز ژ وەلاتیان بهێتە گرتن و سەدەما هەر گیرۆبوونەکێ یان زەرەکێ ڕوون و ئاشکرا بیت.

شەشەم: دیاردەیا بەرتیل دان و وەرگرتن د ناڤ سازیێن حکومەتێ دا هەیە، دڤێت بهێتە ژ ناڤبرن ، هەر ژ بەر وێ یەکێ کارێ هەرێ دەستپێکێ یێن وەزیرو بەرپرسێن بلندێن حکومەتا هەرێمێ و ئەڤ بابەتە ب چ ئاوایەکێ چاڤگرتن لێ ناهێتە کرن و کەسێن بنپێکار دێ ب توندی هێنە سزادان.

س.ع