سەرنووچە:

دەربارەی سیستەمێ پیڤەرێن ئاڤێ جڤاتا پارێزگەها دهۆکێ دگەل ڕێڤەبەریا گشتی یا ئاڤا هەرێمێ جڤیا

ب مەرەما گەهاندنا گلەی و گازندەیێن وەلاتیان
فۆتۆ: 
2019-07-15

583 جار خوێندراوەتەوە

ب مەرەما دیتنا میکانزمەکا گونجایی بۆ کارپێکران پیڤەرێن ئاڤێ و گەهاندنا گلەی و گازندەیێن وەلاتیێن سنورێ پارێزگەها دهۆکێ جڤاتا پارێزگەهێ دگەل ڕێڤەبەریا گشتی یا ئاڤا هەرێمێ جڤیا.

د کۆنفرانسەکا ڕۆژنامەڤانیا هەڤبەش دا مەسعود محەمەد کارەشی ڕێڤەبەرێ گشتی یێ ئاڤا هەرێمێ ڕاگەهاند، دێ بەردەوام بن لسەر دانانا سیستەمێ پیڤەرێن ئاڤێ بۆ مالان و دێ ل هەموو باژێر و باژارۆکان هێتە دانان، ئەو لسەر بڕیارا دانانا پیڤەران پەشیمان نەبوونە و دێ بەردەوام بن.

دیارکر ژی، وان گلەی و گازندەیێن وەلاتیێن دهۆکێ ب ڕێکا جڤاتا پارێزگەهێ وەرگرتنە و دێ کار کەن ژبۆ باشکرن و چارەسەرکرنا وان ئاریشەیێن د سیستەمێ پیڤەرێن ئاڤێ دا هەی.

هەر د کۆنفرانسا ڕۆژنامەڤانی دا فەهیم عەبدولا سەرۆکێ جڤاتا پارێزگەها دهۆکێ دازانین، تەڤاهیا ئاریشە و کێماسیێن گرێدای ئاڤێ ل سنورێ پارێزگەهێ ب ڕێڤەبەرێ گشتی گەهاندنە و سۆزا چارەسەرکرن و دیتنا میکانزمەکا باش دەربارەی ڤێ یەکێ وەرگرتنە.

هەروەسا دیارکر، سیستەمێ پیڤەرێن ئاڤێ ل دهۆکێ نەدادپەروەری تێدا هەبوویە و هەیا ئەو ئاریشە نەهێتە چارەسەرکرن ئەو کار ب وان پیڤەران ناکەن.

ئەڤە ژی دەمەکێ دایە، حەفتیا دەربازبوویی پارێزگارێ دهۆکێ ڕاگەهاند، کو ئەو بهایێ ئاڤێ یێ هاتیە دیارکرن زۆرە و ژ وەلاتیان ناهێتە وەرگرتن، پیڤەرێن ئاڤێ ژی دێ هێنە ڕاگرتن، دێ پشتەڤانیا گازندەیێن خەلکی کەن و دەنگێ خۆ دئێخینە دگەل دەنگێ وان.

ل سنورێ پارێزگەها دهۆکێ ڕۆژا ١/٧ ئەڤ سالە هاتبوو دیارکر وەک داوى دەم بۆ دانانا پیڤەرێن ئاڤێ، لێ بهایێ کریا ئاڤا هندەک وەلاتیان ٤٠٠ بۆ ٥٠٠ هزار دیناران هاتیە و زێدەترین بها ٨٦ ملیۆن دینار بوون کو بۆ مالەکێ هاتبوو، ڤێ یەکێ ژی کارڤەدان و بەڕازیبوونێن مەزن یێن وەلاتیان ل دیڤ خۆدا ئینان.

 س.م