سەرنووچە:

قوتابیەکێ دهۆکێ لسەر ئاستێ هەرێمێ بۆ یەکەم

پشتی ڤەگەڕیانا ئەنجامێن نەڕازیبوونێ
فۆتۆ: 
2019-07-11

2626 جار خوێندراوەتەوە

 دیجیتال میدیایا ئێن ئار تى، دهۆک، بێوار حیلمى

پشتى دەرکەفتنا ئەنجامێن نەرازیبوونێ قوتابیەکێ پارێزگەها دهۆکێ ب ناڤێ ھەژی بەنگین تاھر لسەر ئاستێ هەرێمێ بۆ یەکەم.

نیوار عەبدولعەزیز بەرپرسێ راگەھاندنا پەروەردا رۆژھەلات یا دھۆکێ بۆ دیجیتال میدیایا ئێن ئاڕ تی راگەھاند، پشتی ئاشکراکرنا ئەنجامێن ئەزموونێن گشتی یێن قوناغا ١٢ێ ئامادەیی و نیشتیمانی یێن قوناغا ٩ێ بنەرەتی، دگەل ڤەکرنا دەرفەتا تژیکرنا نەڕازیبوون (ئیعتیراز) لسەر نمرەیان بۆ قوتابیان و نەڕازیبوون پێشکێشی وەزارەتێ کرین، ئەڤرۆ ئەنجام ڤەگەڕیان و قوتابیێ بناڤێ ھەژی لسەر ئاستێ هەرێما کوردستانێ ژ ئاستێ ڕێزا دوویێ بۆ یا یەکێ سەرکەفت.

دیارکر ژی، هەژی بەنگین قوتابیێ کولیژا بەھرەدارانە یا سەر ب پەروەردا قەزا دھۆک یا رۆژھەلات و پێشتر ب کۆما ٩٩.١٤ ڕیزا دوویێ یا یەکەمێن سەر ئاستێ ھەرێما کوردستانێ بەشێ زانستی گرتبوو.

بەرپرسێ راگەھاندنا پەروەردا رۆژھەلات یا دھۆکێ دازانین ژی، ئەنجامێ قوتابی هەژی ژ ٩٩.١٤ بۆ ٩٩.٤٣ بلندبوویە ب ڤێ یەکێ ژی هەڤئاوایێ قوتابی مه‌نسور قادر موحسین لێهاتیە کو پێشتر کۆما نمرەیا ٩٩.٤٣ بدەستخستبوو، ببوو یەکەمێ پۆلا ١٢ێ ئامادەیی بەشێ زانستی لسەر ئاستێ ھەرێمێ.

هەڤدەم قوتابی هەژی بەنگین د داخویانیەکێ دا بۆ ئێن ئاڕ تی زێدەباری نیشاندانا دلخۆشیا خۆ لسەر بوون ب یەکەمێ هەرێمێ ڕاگەهاند، کو نەڕازیبوونا وی لسەر شاشیەکا پسیارەکا وانەیا پەروەردەیا ئیسلامیێ و زمانێ عەرەبیێ بوویە، ب ڕاستڤەبوونا وێ شاشیێ دوو نمرە بۆ ڤەگەڕیانە و گوهەڕتن لسەر ڕیزبەندیا یەکەمان دا ئینایە و گەهشتیە پلەیا یەکێ.

ڕۆژا (٢٣ێ هەزیرانا ٢٠١٩ێ) وەزارەتا پەروەردا هەرێما کوردستانێ ئەنجامێن خولا یەکەم یا ئەزمۆنێن گشتی بەلاڤکر، ناڤ و نمرەیێن وان خویندکار و قوتابیان ئاشکراکر کو لسەر ئاستێ هەرێما کوردستانێ یەکەم بوونە، لگۆڕی ئەنجامان ژی هەر یەک ژ قوتابیان مه‌نسور قادر موحسین ب نمرەیا ٩٩.٤٣ یەکەمێ پۆلا دوازدێ ئامادەیی بەشێ زانستی، سه‌هه‌ند سه‌ركه‌وت ب نمرەیا ٩٧.٤٣ یەکەمێ پۆلا دوازدێ بەشێ وێژەی و ئه‌نوا شیرزاد ئەسعەد حاجی یەکەمێ پۆلا نەهێ بنەڕەتی هاتن دەستنیشانکرن.

س.م