سەرنووچە:

قۆناغا سێیێ یا هەلدانا گۆڕێن ب کۆم یێن شنگالێ دەستپێدکەت

ل گوندێ کۆچۆ
فۆتۆ: 
2019-06-20

422 جار خوێندراوەتەوە

سەرپەرشتێ تیمێن هەلدانا گۆڕێن ب كۆم یێن شنگالێ دازنین، بەرهەڤیان بۆ دەستپێکرنا قۆناغا سێیێ یا هەلدانا گۆڕێن بکۆم یێن گوندێ کۆچۆ دکەن.

زیا كه‌ریم سه‌رپه‌شت و ئه‌ندامێ تیمێن گۆڕێن ب كۆم یێن شنگالێ بۆ دیجیتال میدیایا ئێن ئاڕ تی ڕاگەهاند، نها ئەو بەرهەڤیان ژبۆ ڤەگوهاستنا ئامیران بۆ جهێن گۆڕێن ب کۆم دکەن، دێ د دەمەکێ نێزیک دا دەست ب قۆناغا سێیێ یا هەلدانا گۆڕێن ب کۆم یێن گوندێ کۆچۆ ل شنگالێ کەن.

دزانین ژی، د ناڤەراستا ئادارا دەربازبوویی دا قۆناغا ئێكێ یا هەلدانا گۆڕێن ب كۆم یێن كوردێن ئێزدی ل گوندێ كۆچۆ یێ سه‌ر ب شنگالێ‌ ده‌ستپێكربوو، قۆناغا دوویێ ژی به‌ری مه‌ها ره‌مه‌زانێ ب داوی هاتبوو.

ئەو یەک ژی دیارکر، د هه‌ردوو قوناغان دا ١٢ گۆڕێن ب كۆم هاتبوونه‌ هەلدان كو رۆفاتێن ١٤١ كه‌سان تێدابوون.

بەحسا وێ یەکێ ژی کر،  نها ب تنێ چار گۆڕێن ب کۆم ل گوندێ کۆچۆ مانە و پشتی هەلدانا وان گۆڕان دێ دەست ب هەلدانا گوڕێن گوندێ سولاغێ یێ سەر ب قەزا شنگالێ کەن.

ژ ئالیێ خۆڤە ژی فەلاح حەسەن ئەفسەر ل دەستەيا بلندا جينوسايد ناساندنا كوردێن ئێزدی و كەمينەیان ل هەريمێ بۆ ئێن ئاڕ تی ئاشکراکر،  نها ئەو چاڤەڕێی بڕیارا لژنەیا گۆڕێن ب كۆم ل بەغدا دکەن، بۆ دەستپێكرنا قۆناغا سێیێ.

د تەباخا٢٠١٤ێ دا چەکدارێن داعشێ هێرشی سەر شنگال و دەردۆرا وێ کرن، ب هەزاران کوردێن ئێزدی ژ جهـ و وارێن خۆ ئاوارەبوون، نێزیکی شەش هەزار ئێزدی هاتن کوشتن و ڕەڤاندن و گەلەک ژ وان ژی د گۆرێن ب کۆم دا هاتن ڤەشارتن، پشتی نەمانا چەکدارێن داعشێ ل شنگالێ ب هەڤبەندیا پشکداریا تیمێن حکومەتا هەرێم و عێراقێ و ب هەڤبەندیا نەتەوەیێن هەڤگرتی دەست لێگەڕیان و هەلدانا گۆڕان کرنە.

س.م