سەرنووچە:

ل شنگالێ بسەدەما ئاگری سەدان دۆنمێن دەخلودانی و نێزیکی هزار خانیان شەوتین

هەیا نها بەردەوامە
فۆتۆ: 
2019-06-20

376 جار خوێندراوەتەوە

دیجیتال میدیایا ئێن ئار تی، شنگال، نەزیر شنگالی

ل ناحیا گر عوزێر یا سەر ب قەزا شنگالێ بسەدەما ئاگر کەفتنێ سەدان دۆنمێن دەخلودانی و نێزیکی هزار خانیێن وەلاتیان شەوتین.

نووچەگەهانێ دیجیتال میدیایا ئێن ئاڕ تی ل شنگالێ ڕاگەهاند، ژ ئێڤاریا دوهی ڕۆژا چارشەمبیێ ڤە ئاگر ب دەخلودانێ وەلاتیان کەفتیە و ب وێ سەدەمێ ژی سەدان دۆنمێن دەخلودانی و نێزیکی هزاران خانیێن وەلاتیان شەوتینە.

دیارکر ژی، شەڤا دەربازبوویی ل دەردورا دەمژمێر سێ ئاگر هاتبوو کۆنتڕۆلکرن، لێ سپێدەهیا ئەڤرۆ جارەکا دی د پشکەک ژ وان خانیان دا دووبارە دەرکەفتیە و د نها دا ئاگر ل کۆمەلگەها گر زەرکا و زەڤیێن دەڤەرێ بەردەوامە.

گوت ژی، خانیێن کو شەوتینە پشتی هاتنا چەکدارێن داعشێ ژ ئالیی وەلاتیان ڤە هاتبوون ڤالاکرن، لێ تەڤاهیا کەلوپەلێن د ناڤ دا شەوتینە.

ئەو یەک ژی دازانین، د نها دا تیمێن ئاگرڤەمراندنێ یێن هەردوو قەزایێن شنگال و بەعاج و وەلاتیێن دەڤەرێ، د بزاڤا کۆنتڕۆلکرنا ئاگری دانە، لێ ژبەر زێدەیا ئاگری هەیا نها نەهاتیە کۆنترۆلکرن.

ل دەستپێکا ئەڤ سالە هەیا نها ١٦ بوویەرێن ئاگرکەفتنێ ل سنورێ قەزا شنگالێ چێبوونە، ب وێ سەدەمێ ژی زێدەتری ٣٥ هزار دۆنمێن دەخلودانێ وەلاتیان شەوتینە و سێ جوتیار ژی د بزاڤێن ئاگرڤەمراندنێ دا جانێ خۆ ژ دەستدانە.

س.م