سەرنووچە:

تورکیا..ب سەدەما بنئاڤبوونا بەلەمەکێ نەهـ کۆچبەر خەندقین

فۆتۆ: 
2019-06-17

369 جار خوێندراوەتەوە

ب سەدەما بن ئاڤ بوونا بەلەمەکا کۆچبەران ل نێزیک حسێن بورنو ژ کەنارلێڤێن باژاڕێ بۆدرمی یا سەر ب پارێزگایا موغلا نەهـ کۆچبەرێن نەئاسایی خەندقین.

میدیایێن تورکیا بەلاڤکر، ئەڤرۆ ١٧ێ هەزیرانا ٢٠١٩ێ بەلەمەک کو ٤٠ کۆچبەرێن نەیاسای تێدا هەلگرتنە د کەنارلێڤێن ئاڤا بۆدروم بنئاڤبوون وهەیا نها ژی شیاینە ٣١ کەسان ڕزگار بکەن.

هەر لگۆڕی میدیایێن وی وەلاتی، هەیا نها نەهـ کەس خەندقینە و تیمێن هەوارهاتنێ ژی بەردەوامن بۆ دیتنا تەرمێن وان.

هەڤدەم، هەیا نها میدیایێن وی وەلاتی ناسنامێ وان کۆچبەران ئاشکرا نەکر کو ڕوونشتڤانێن چ وەلاتەکی نە.

سالانە هژمارەکا زێدە یا کۆچبەرێن نەیاسایی ب ڕێکا تورکیا بزاڤا گەهشتن بۆ وەلاتێن ئەوروپا دکەن و بوویەرێن بن ئاڤبوونێ و خەندقینا کۆچبەرێن نەیاسای ب ڕێکا ئاڤی یا وی وەلاتی بەردەوامە.

سالا ٢٠١٦ێ تورکیا و وەلاتێن یەکێتی یا ئەوروپا ڕێکەفتنەک لسەر پرسا کۆچبەران ئیمزاکر، لگۆڕی ڕێکەفتنێ، پێدڤیە تورکیا ڕێکێ ب چوونا کۆچبەران بۆ ئەوروپا نەدەت، ل هەمبەرێ وێ یەکێ ژی دا یەکێتی یا ئەوروپا هەڤکاریا دارایی وفریاگوزاری دێ پێشکێشی وی وەلاتی بکەت.

س.ع