سەرنووچە:

سازیا میدیایا نالیا: ژێدەرێ تەشویشا سەر ئێن ئاڕ تی ل سلێمانیێ یە

ژ ئێڤاری ڤە هەیا نها بەردەوامە
فۆتۆ: ئێن ئاڕ تى
2019-05-21

169 جار خوێندراوەتەوە

ئاوات عەلی سەرۆکێ سازیا نالیا، دەربارەی وێ تەشویشا کو لسەر کەنالێ ئێن ئاڕ تی هاتیە دانان ڕاگەهاند، هیڤیدارن ئەو کەسێ و ئالیێن کو بەرەڤانیێ ژ دەنگێ ئازاد دکەن، لسەر ڤێ بنپێکاریا زەق و ئاشکرا یا ل دژی ئێن ئار تی بێدەنگ نەبن.

ئاوات عەلی دیارکر ژی، لگۆڕی دیڤچوونێن کۆمپانیا دابینکەرا وەشانا ئێن ئاڕ تی، ژێدەرێ تەشویشێ ل باژارێ سلێمانیێ یە.

ئەڤە ژی دەمەکێ دایە، دەمژمێر ٦:٣٠ خولەکێ ئێڤاریا ئەڤرۆ ژ ژێدەرەکێ نەدیار ڤە تەشویش لسەر وەشانا ئێن ئاڕ تی هاتە دانان و هەیا نها بەردەوامە.

هەڤدەم هەر یەک ژ ڕۆژنامەڤان شوان محەمەد و نیاز عەبدوڵا ڕاگەهاندن، تەشویش خستنا سەر ئێن ئاڕ تی کارەکێ نەیاسایی و نەئەخلاقییە و هەر کەسەک بکەت دیارە دەستهەلاتا ژ حکومەتێ زێدەتر هەیە.

ڕۆژنامەڤان شوان محەمەد د فەیسبووکا خۆدا ڕاگەهاند، "هەر کەس و هەر ئالیەک تەشویشێ لسەر هەر کەنالەکێ کو مۆلەتا فەرمی هەبیت ب ئێن ئاڕ تی ژی ڤە دانیت، کارەکێ نەیاسایی و نەئەخلاقییە. ئەو ئالی و دەزگەهێ وی کاری ژی دکەت دیارە دەستهەلاتا زێدتر ژ حکومەت و پارلەمان و دەزگەهێن فەرمیێن هەرێمێ هەیە، ژبەر وێ یەکێ وێ دەستهەلاتێ بخۆ ددەت کو نەیاسایی و بێ باکی وی کاری بکەت".

ڕۆژنامەڤان نیاز عەبدوڵا ڕاگەهاند، "تەشویش خستنا سەر کەنالێ ئێن ئاڕ تی و ئاستەنگکرنا کارێ ڕۆژنامەڤانی، درێژەپێدانا وی کارێ نەیاسایی و نەئەخلاقییە کو سالانێن درێژن بناڤێ "ژێدەرێن نەدیار" ل سەر کەنالێن ئۆپۆزسیۆن و سەربەخۆ د هەرێما کوردستانێ دا دهێنە دانان".

ئەو یەک ژی گوتیە، "ژبلی هێرشا ڕاستەوخۆ و دەستدرێژی و تیرۆرا ڕۆژنامەڤانان، پێشتر تەشویش لسەر KNN  و NRT  و هەژمارەکا ڕادیۆیان دانانە، هەڤدەم بزاڤا هاککرنا ڕووپەلێن ڕۆژنامەڤانی یێن سەربەخۆ وەک ئاوێنە و هاوڵاتی و ڕادیۆیا نەوا و چەند جهێن دی هاتیە دان".

س.م