سەرنووچە:

چەند ڕۆژنامەڤانان: تەشویش خستنا سەر کەنالێ ئێن ئاڕ تی کارەکێ نەیاسایی و نەئەخلاقییە

د نها دا تەشویش لسەر ئێن ئاڕ تی هاتیە دانان
فۆتۆ: ئێن ئاڕ تى
2019-05-21

136 جار خوێندراوەتەوە

هەر یەک ژ ڕۆژنامەڤان شوان محەمەد و نیاز عەبدوڵا ڕاگەهاندن، تەشویش خستنا سەر ئێن ئاڕ تی کارەکێ نەیاسایی و نەئەخلاقییە و هەر کەسەک بکەت دیارە دەستهەلاتا ژ حکومەتێ زێدەتر هەیە.

ڕۆژنامەڤان شوان محەمەد د فەیسبووکا خۆدا ڕاگەهاند، "هەر کەس و هەر ئالیەک تەشویشێ لسەر هەر کەنالەکێ کو مۆلەتا فەرمی هەبیت ب ئێن ئاڕ تی ژی ڤە دانیت، کارەکێ نەیاسایی و نەئەخلاقییە. ئەو ئالی و دەزگەهێ وی کاری ژی دکەت دیارە دەستهەلاتا زێدتر ژ حکومەت و پارلەمان و دەزگەهێن فەرمیێن هەرێمێ هەیە، ژبەر وێ یەکێ وێ دەستهەلاتێ بخۆ ددەت کو نەیاسایی و بێ باکی وی کاری بکەت".

هەروەسا دیارکریە، "ڕێگریکرن ژ وەشانا کەنالان دژی ئازادیا ڕۆژنامەگەری و ئازادیا هزری یە، حەق نینە چ دەزگەهـ و کەسێن میدیاکار لسەر ڤان ڕەفتارێن نەیاسایی بێدەنگ بن".

وی ڕۆژنامەڤانی ئەو یەک ژی گوتیە، "کا دوزگەرێ گشتی، کا وەزارەتا ڕۆشنبیری، کا سەندیکا و سازیێن کو داکۆکیێ ژ ئازادیا ڕۆژنامەگەریێ دکەن".

هەڤدەم ڕۆژنامەڤان نیاز عەبدوڵا ڕاگەهاند، "تەشویش خستنا سەر کەنالێ ئێن ئاڕ تی و ئاستەنگکرنا کارێ ڕۆژنامەڤانی، درێژەپێدانا وی کارێ نەیاسایی و نەئەخلاقییە کو سالانێن درێژن بناڤێ "ژێدەرێن نەدیار" ل سەر کەنالێن ئۆپۆزسیۆن و سەربەخۆ د هەرێما کوردستانێ دا دهێنە دانان".

ئەو یەک ژی گوتیە، "ژبلی هێرشا ڕاستەوخۆ و دەستدرێژی و تیرۆرا ڕۆژنامەڤانان، پێشتر تەشویش لسەر KNN  و NRT  و هەژمارەکا ڕادیۆیان دانانە، هەڤدەم بزاڤا هاککرنا ڕووپەلێن ڕۆژنامەڤانی یێن سەربەخۆ وەک ئاوێنە و هاوڵاتی و ڕادیۆیا نەوا و چەند جهێن دی هاتیە دان".

نیاز عەبدوڵا نڤیسیە ژی، "هەموو ئەو تاوانێن ل هەمبەر ڕۆژنامەڤان و دەزگەهێن ڕاگەهاندنێ هاتنە کرن، بەرپرسێن بلندێن ولاتی و بەشەک ژ دەزگەهێن ئەولەهیێ و میلیشیایان دەست تێدا هەبوونە".

دەمژمیر ٦:٣٠ خولەکێ ئێڤاریا ئەڤرۆ ژ ژێدەرەکێ نەدیار ڤە تەشویش لسەر وەشانا ئێن ئاڕ تی هاتە دانان و هەیا نها بەردەوامە.

س.م