سەرنووچە:

بالیۆزخانەیا ئەمریکایێ سەدەما راگرتنا کارێن خوە ل عێراق و هەولێرێ ئاشکرا کر

پشتى کو دوهى ل عێراقێ هێزێن خوە  خستنە د ئامادەباشیێ دا
فۆتۆ: 
2019-05-15

1996 جار خوێندراوەتەوە

بالیۆزخانەیا ئەمریکایێ ل بەغدایێ سەدەما دەست بەردانا بەشەک ژ فەرمانبەرێن وان ل بەغدایێ و راگرتنا کارێ بالیۆزخانەیا وەلاتێ وان ئاشکرا کر و راگەهاند، ب سەدەما زێدەبوونا گەڤان ل سەر وان ئەو بریار دایە.

پەیڤدارێ بالیۆزخانەیا ئەمریکایێ ل بەغدایێ د بەیاننامەیەکێ دا ئەڤرۆ چارشەمبیێ ١٥ێ گۆلانا ٢٠١٩ێ بەلاڤکر، ژ بەر بەرچاڤگرتنا گەفان و زێدەبوونا مەترسیان د عێراقێ دا هەست پێ دهێتە کرن، بریار دایە هەژمارەکا کارمەندێن خوە یێن بالیۆزخانە و کونسولخانەیا عێراقی بجهبێلن.

ئاماژە ب وێ یەکێ کر، د سەردانا ڤێ داویێ یا مایک پۆمپیۆ بۆ بەغدایێ و جڤینا د گەل بەرپرسێن عێراقى دا ، راستیا وێ مەترسى و گەفێ بۆ حکومەتا عێراقێ ئاشکرا کریە و هاتنە ئاگەهدار کرن.

د بەشەکا دن یا بەیاننامەیێ دا ئاشکرا کریە، پێداچوون و هەلسەنگاندنێ بۆ سەلامەتى و ئاسایشا دامەزراوەییان ل سەرانسەرێ جیهانێ دا دکەن، بریارا ڤەکێشانا هەژمارەیەکا کارمەندێن بالیۆزخانەیێ ل بەغدایێ و کونسولگەریا هەولێرێ ل سایەیا وێ رەوشا ئەولەهیا د نها دا هاتیە پەیرەو کرن.

زەلال ژى کر، ئەو بریار هەر ب ساناهى و سەرپێ نەدایە.

پەیڤدارێ بالیۆزخانەیا ئەمریکایێ ل بەغدایێ تەکەز کریە، ئاسایش و سەلامەتیا کارمەندێن ئەمریکایێ و وەلاتیێن وان ب یەک ژ هەرە کارێن سەرەکى یێن وەزارەتا دەرڤە یا ئەمریکایی دهێتە دانان.

باوەریا خوە ژى ب هێزین ئەولەهیا عێراقێ نیشان دایە کو دکارن بپارێزن، لێ دزانن گەڤێن ب مەترسینە و دخوازن مەترسیان کێم بکەن.

د داویا بەیاننامەیێ دا هاتیە، ئەو دێ ب هەڤبەشى د گەل عێراقیان بۆ ب هێزکرنا بەرژەوەندیێن هەڤپار پێگیر بن.

شەڤا دەرباز بووى سوپایێ ئەمریکایێ راگەهاند، ب سەدەما مەترسیێن ئیرانێ ل سەر بەرژەوەنیا وەلاتێ وان هێزا خوە ل عێراقێ ئێخستە د ئامادەباشیێ دا.

م.س