سەرنووچە:

پارلەمانێ کوردستانێ: بوویەرا گوندێ پەلکانەیێ ڕامالینا کوردان ل دەڤەرێ یە

فۆتۆ: ئێن ئاڕ تى
2019-05-15

139 جار خوێندراوەتەوە

دەربارەی بوویەرا دوهی یا گوندێ پەلکانەیێ ل سنورێ کەرکوکێ، سەرۆکا لیژنەیێن دەڤەرێن کوردستانیێن دەرڤەی ئیدارەیا هەرێمێ د پارلەمانێ کوردستانێ دا ڕاگەهاند، ئەو کارە هەڤئاوایێ سەرەدەریا ڕەژیما بەعسە و داخواز کر، سنورەک بۆ ڕامالینا کوردان د وان دەڤەران دا بهێتە دانان.

جوان یونس سەرۆکا لیژنەیێ، د کۆنفڕانسەکا ڕۆژنامەڤانی دا دیارکر، بەردەوام وەلاتیێن کورد د وان دەڤەران دا ڕاستی چەندین ڕێکارێن نەیاسایی و سەرەدەریێن نە سڤیلانە دبن، ئەڤە ژی بەرڤاژی وێ ڕێکەفتن و تێگەهشتنێ یە کو د ڤان داویان دا ناڤبەرا بەغدا و هەرێمێ پەیدابووی.

هەروەسا داخواز کر، ڕەوشا کەرکوک و دەڤەرێن دی بهێنە ئاسایکرن.

ئەڤە ژی دەمەکێ دایە، پێشتر بەدرەدین یوسف ئەندامێ جڤاتا ناحیەیا سەرگەڕان بۆ دیجیتال میدیایا ئێن ئاڕ تی ڕاگەهاند، سپێدەهیا دوهی سێشەمبیێ (١٤ێ گۆلانا ٢٠١٩ێ) هەژمارەکا وەلاتیێن عەرەب، کو زێدەتری ١٥ مالباتان بوون، ب پشتەڤانیا هێزێن ئارتێشا عێراقێ هاتنە گوندێ پەلکانە ب مەرەما داگیرکرن و دووبارە تەعریبکرنێ.

س.م