سەرنووچە:

ناڤەرۆکا ناکۆکیێن یەکێتی و پارتیێ ل سەر پارێزگارێ کەرکوک و وەزارەتا دادێ یا عێراقێ

پرسا پێکئینانا حکومەتا نوو یا هەرێمێ
ناکۆکیێن ناڤبەرا یەکێتی و پارتیێ
فۆتۆ: ئەرشیڤ
2019-02-16

885 جار خوێندراوەتەوە

زێدەباری وێ یەکێ کو دوهی یەکێتی و پارتی نێزیکی هەڤدوو ببوون، لێ دۆسیەیێن پارێزگارێ کەرکوک و وەزارەتا دادێ یا عێراقێ دیسا ناکۆکیێن ناڤبەرا هەردوو ئالیان کوور کرن و لپێشیا رێکەتنێ ئاستەنگن.

ل گۆری زانیاریێن ئێن ئاڕ تی، ئاریشەیێن ناڤبەرا هەردوو ئالیان بەردەوامن و دۆسیەیێن پارێزگارێ کەرکوک و پۆستێ وەزارەتا دادێ یا عێراقێ وەک خوە مانە و نەهاتنە چارسەر کرن.

د جڤینا دوهی دا، پارتیێ ب ئەشکەرەیی ژ یەکێتیێ رە دیار کریە، هەیا رەوشا کەرکوکێ نەیێ ئاسایی کرن، ل سەر دانانا پارێزگارەکی ژ ئالیێ یەکێتیێ ڤە رازی نابن، ژ بەر کو کەرکوک هاتیە داگیرکرن و ئەو ژی پارێزگارەکی بۆ باژارەکێ داگیرکری دانانن.

دەرباری پرسا وەزارەتا دادێ، ژێدەرەکێ ئاگەهدار د ناڤ پارتیێ دا بۆ ئێن ئاڕ تی راگەهاند، ناڤێ بەربژارێ یەکێتیێ بۆ وێ وەزارەتێ گەهشتیە دەستێ مەسعود بارزانی ، لێ هەیا نها گۆتوبێژ ژی ل سەر نەهاتیە کرن.

پارتیێ ب چ ئاوایەکی گەرەنتی نەدایە  یەکێتیێ داکو پرسا پارێزگارێ کەرکوک و پۆستا وەزارەتا دادێ بۆ یەکێتیێ یەکئالی بکە.

تشتێ کو ل هەمبەر پێکئینانا حکومەتا نوو یا هەرێمێ ئاستەنگە، ئەڤ دوو پرسن و پارتی ژی ئامادە نینە بەریا پێکئینانا حکومەتێ، رێکەتنێ ل سەر هەردوو مژاران بکە.

پارتی دخوازە حکومەتێ پێک بینە و هەرێمێ ژ بۆ خوە ئارام و مسۆگەر بکە، پشترە ل گۆری بەرژەوەندیا خوە دەربارێ پارێزگارێ کەرکوک و وەزارەتا دادێ رێبکەڤە و مەرجێن خوە ب سەر یەکێتیێ رە بسەپینە.

پارتیێ پاکێجا دوهی کو رێکەتن ل سەر هاتبوو کرن، ژ ١٨ خالان بۆ ١٧ خالان کورت کریە. یەکێتی ژی گۆتوبێژان ل سەر ئیمزاکرن یان ئیمزانەکرنا وێ پاکێجێ دکە. ژ ئالیەکی دن ڤە یەکێتی دێ بەشداریێ د جڤینا ١٨ێ مەهێ یا پارلەمانێ دا بکە، لێ جڤین دێ جڤینەکا رەمزی بە و بێ بریارێن یەکئالیکەر دێ جڤین بداوی وەرە.

هـ.ج