عەقلیەتا تیرۆرکرنێ بۆ بێدەنگکرنا دەنگێن ئازاد شکەستن ئینا
PM:10:13:05/05/2022
3700 جار خوێندراوەتەوە
مەرین سەرنی
+
-
ئەم ئەڤرۆ د ١٢ سالیا سالڤەگەرەکێ داینە، کو
بکەران هەوڵ و بزاڤێن وان بۆ بێدەنگرن و نەهێلان و تیرۆرکرنا دەنگەکێ ئازاد و قەلەمەکێ
حەق نڤیسبوو، ژ پێخەمەت وێ هندێ دۆماهیکێ ب دەنگێ ئازاد و ڕەخنەگر بینن، ئەڤرۆ سالڤەگەرا
تیرۆرکرنا سەردەشتە کو پشتی ١٢ سالان هێشتا خوینا ویا گەرمە و قەلەمێ وی دنڤیسیت،
و خوینا وی بوویە توڤەک ل هەمی کونجەکا ڤێ هەرێمێ سەردەشتێن لێ پەیدابووین و ئەو
خاڵا کو سەردەشتی بخوە بەحس دکر و ل پشت خۆ هێلای و مە هەمیا نوکە خاڵەک دگەل یا وی
دانایە و ئەم هەمی سەردەشتین، ڕوو دکەینە دەستەلاتداران و ل وان دپرسین، خێرە ١٢
سالە و وە نەشیایە بکەرێن ڤی کارێ ڕەش دەستەسەر بکەن، مانێ ئەڤ گەنجێ هە ل ڕۆژا ڕوون
و ل ناڤبەرا ئاڤاهی و کۆچک و تەلار و دەزگەهێن هەوەیێن ئەولەهیێ و ل ناڤا هەولێرێ
دا هات ڕەڤاندن، بۆچی بێدەنگ و بکەر دیار نین؟ ئەگەر تاوانبار نەهێن دەستنیشانکرن
و گرتن کی لێ بەرپرسە؟ و سەردەشت بوویە خالەکا ڕەش و شەرمزاریەکا مەزن ب ناڤچاڤێن ڤێ
دەستهەلاتێ ڤە و دێ هەر مینیت و مەزنتر دبیت.
ئەڤ دەستهەلاتە هێشتا ب عەقلیەتا بەریا ١٢ سالان دگەل سەردەشت، سەرەدەریێ دکەت و
نوکە ژی هەڤڕێیێن سەردەشت زیندانی دکەت، و نوکە کو ئەم ڤێ سالڤەگەرێ ساخ دکەین دەهان
ڕۆژنامەڤان و چالاکڤانێن هەڤئاوایێ سەردەشت ژبۆ بێدەنگرنا دەنگێ ئازاد ڕاپێچی زیندانێ
کرینە، لێ ئەو ژی وەک ستێرەکێ د تاریاتیا کونجێن زیندانێ دا دگەشن و ڕەونەق و ڕوناهیێ
ددەن، هەمی ئەڤ کارێن دەستەلاتدار دکەن ب مەرەما ترس و توقاندن و بێدەنگکرنا خەلکی،
داکو ئەو بەردەوام بن لسەر دزی و ب تالانبرن سامانێن ڤی وەڵاتی و تەپەسەرکرن و هەژارکرنا
خەلکی و ئەو ژی بهەشتەکێ بۆ خۆ بخولقینن و کەس بەحسا گەندەلی و کارێن وان یێ ڕەش و
قڕێژ نەکەت، لێ خەونا ئەو کار بۆ دکەن یا ڤالایە و تەکەزیێ دکەین، ئەو ڕێکا سەردەشت و
گرتیێن بەهدینان گرتیەبەر، ئیرادەیە و ئیرادە ناهێت کوشتن و ژناڤبرن
و وەک کانیێن خۆڕسک چەند تێکبدەن و شێلی بکەن دێ هەر زەلال و زێدە و سەرهەلدەت هەتا
ڕۆژەکێ ب تەمامی ل هەمی لایان ڤە ئاڤا زەلال و پاقژ دەردکەڤیت و هەر پیسی و بەربەستەکێ
ڕامالیت.
ل داویێ دبێژم، سەردەشتێ من ڕووحا تە شادبیت،
ئەڤیندار و عاشق و خوین گەرم و ڕاستبێژ، تۆ ئارام بە، هەرچەندە دووبارەبوونا کەسێن
وەک تە نابیت، لێ سۆزا مەیە ئەم یێ درێژەیێ ب ئارمانجا قەلەمێ تە ددەین و دێ بەردەوام
بین هەتا بکوژێن تە دگەهن سزایێن خۆ و ئارمانجا تە خوینا خۆ بۆ دانای بگەهیت
بەرهەم.
ڕوحا سەردەشت و هەمی هەڤڕێیێن وی شاد و ئازادی
بۆ ئازادی خازێن بەهدینان.