بۆچی خەلک دچیتە دەرڤەی وەلاتی؟

45484 جار خوێندراوەتەوە

د ڤی ماوەیێ دەربازبوویدا و ھەیا نها رۆژ بۆ رۆژ پتر خەلکێ ھەرێمێ قەستا ژدەرڤەی وەلاتی دکەن و ژوانا ژی ژ تاک و خێزانان و ھەژار و زەنگینان ژی پێکدھێن.

گەلەک ژ ئالیان و کەسان داکو روویێ برێڤەبرنا وەلاتی ژ ئالیێ ڤان بەرپرسێن شکەستن خاری ڤەشێرن گەلەک ئاخفتنێن نەجوان ونەڕاست گوتن، گەلەک گوتنێن وان ئەگەر تۆ باش ھزر تێدا بکەی ئەو گوتنە بدژی وان بخۆنە، بۆ نمونە دگوتن ئەڤێن دچن ژدەرڤەی وەلاتی بارا پتر زەنگینن و داھاتێ وان یێ ھەیڤانە یێ بلند بوو گەلەک، بۆچی زەنگین دچن؟ لڤێرە ئەڤ گوتنە مەزنترین بەلگەیە دژی وان، مرۆڤێن زەنگین و خودان داھات ژوەلاتی دچن ژبەرکو چ گەرەنتی نینە بۆ داھاتیا وان و زارۆکێن وان لڤی وەلاتی و دڤێت ھەر دەمەکێ یێ ئامادە بن بو ھەر تشتەکێ نەچاڤەرێکری و ھەروەسا ئەڤ بێ سیستەمی و بەرەلایی و کێمیا خزمەتگۆزاریان لڤی وەلاتی زەنگین ژی نەچار کرینە کو ھزر دجھەکێ دیدا بکەن بۆ ژیانێ، ئەگەر زەنگین جارەکێ ھزرا ژدەرڤەی وەلاتی بکەن پا مرۆڤێن دەستکورت وھەژار سەد جارا مافێ وییە ھزرا ژدەرڤە بکەت، ژبەرکو ژیانا مرۆڤێ ھەژار ئێکجار یا بزەحمەتە، مرۆڤێ ھەژار دێ چاوا ژیت ددەمەکێدا کو دھەمی کەرتان دا لاوازیەکا مەزن دھێتە دیتن وخەلکێ ھەژار دنالیت، بۆ نمونە زارۆکێن وی دچن قوتابخانێ بدرستی نەشێت مەزاختنێن وان بدەتێ و قوتابخانێت وان گەلەک نەد ئاست دانە، قوتابخانێت تایبەت گەلەک پێشکەفتیترن و بھایێ وان یێ گرانە، دەمێ خاندنا خۆ خلاس ژی دکەن گەلەک بزەحمەت د شێن کارەکێ بدەستخوڤە بینن، ھەروەسا کەرتێ تەندروستی گەلەک دئاستەکێ لاواز دایە نەخۆشخانێت حکومی گەلەک کێماسی ھەنە و دەرمان دکێمن، بھایێ نەخۆشخانێن تایبەت گەلەک دبلندن ھەتا وی ڕادەی کو خەلک دچیتە ژدەرڤە بۆ چارەسەریێ، خزمەتگۆازی گەلەک نە دئاستێ پێتڤی دانە، دھەمی کەرتان دا گەلەک و گەلەک کێماسی هەنە.

ھەروەسا پێتڤیێن سەرەکی یێن ژیانێ دئاستێ پێتڤی دا نین و بەردەوام قەیران دروست دبن، بۆ نمونە کارەب گەلەک یا بێ سەروبەرە و بھایێ وێ یێ گرانە، پانزین یا بێ کوالێتی یە ویا گرانە و گەلەک جاران نامینیت ب ئێکجار، غاز بەردەوام یا کێمە، بازار بگشتی بەردەوام دگران بونێ دایە، باج لسەر خەلکی گران بوویە، ئەڤە ھەمی خەلکێ ھەژار دئێخیتە بن فشارەکا مەزنا برێڤەبرنا ژیانێ و فشارەکا مەزنا دەروونی، ڤێجانەچار دبن ھزر د جھەکێ دی دا بکەن کو ژیانەکا دی تاقی بکەن.

سەبارەت قەیرانێن پێتڤیێن سەرەکی یێن ژیانێ راستە لھەمی جھا قەیران پەیدا دبن، بس گەلەک ب کێمی و زیکا دەرباز دبن، بەلێ ل کوردستانێ قەیرانەک ھێشتا بدرستی خلاس نەبوویە ئێکا دی پەیدا دبیت، ھەر سال چەند جارا غاز ژنشکەکێڤە نامینیت، چەند جارا بەنزین نامینیت یان ژنشکەکێ ڤە بھا بلند دبیت، ژنشکەکێ کارەبا گشتی گەلەک کێم دبیت، لەواژی خەلکەک گەلەک یێ بێزار بووی ژڤی وەلاتی، بەردەوامیا ڤان قەیرانا مرۆڤی مەندەھوش دکەت دێ بێژی ب پلان ئەڤ قەیرانە دھێنە چێکرن ژلایێ بەرپرسانڤە و ھندەک مەرەم پێ هەنە.

ژبەر ھندێ ژی ئەو کەسێن بڕیار داین ژڤی وەلاتی بچن ، رێزێ ل بوچوونا وان بگرن وبھێلن ژڤێ دوزەخێ برەڤن و دژاتیا وانا نەکەن.