PM:03:18:25/01/2022
480 جار خوێندراوەتەوە
+
-
دادگەها بلندا فیدرالیا عێراقێ د روینشتنا ئەڤرۆدا بڕیارا تانەیا نەدەستوری بوونا ئێکەم روینشتنا پەرلەمانی و هەلبژارتنا دەستەیا سەرۆکاتیێ رەتکر.
ئەڤرۆ سێشەمبی، دادگەها بلندا فیدرالیا عێراقێ، روینشتنا خۆ ب ئارمانجا ڤەکۆلین ل تانەیێن ئێکەم رویشتنا پەرلەمانی سازکر و تێدا بڕیارا تانەیێن نەدەستوری بوونا ئێکەم روینشتنا پەرلەمانی و هەلبژارتنا دەستەیا سەرۆکاتیێ رەتکر.
پشتی هەلبژارتنێن ١٠ی تشریا ئێکێ یا ٢٠٢١ێ، ئێکەمین روینشتنا خولا پێنجێ یا پەرلەمانی ل ٩ی ڤێ مەهێ ئەنجامدا و تێدا، محەمەد حەلبوسی وەک سەرۆکێ پەرلەمانی و حاکم زاملی ژ فراکسیۆنا سەدر ب جێگرێ ئێکێ و شاخەوان عەبدولا ژ فراکسیۆنا پارتی ب جێگرێ دووێ یێ سەرۆکێ پەرلەمانی هاتنە هەلبژارتن.
پشتی هەلبژارتنا دەستەیا سەرۆکاتیا پەرلەمانی، باسم خەزعەل خەشان ئەندامێ سەربەخۆ ل پەرلەمانی ب هێجەتا وێ یەکێ کو روینشتن و هەلبژارتنا دەستەیا سەرۆکاتیێ نە یاسایی بوون سکالا ل دادگەهێ تۆمارکر.
ل ١٣ی ١دا، دادگەها فیدرالیا عێراقێ بڕیاردا، کارێن دەستەیا نویا سەرۆکاتیا خولا پێنجێ یا پەرلەمانی ب رەنگەکێ دەمکی، رابگریت.
ل ١٩ی ١دا، دادگەها فیدرالی روینشتنا ڤەکۆلینێ ل ئێکەم روینشتنا خولا پێنجێ یا پەرلەمانی ئەنجامدا، لێ بڕیار دەربارەی تانەیان بۆ ئەڤرۆ پاشداخست و بڕیارا یاسایی بوونا روینشتنێ دا.
پێتڤیە دادگەها بلندا فیدرالیا عێراقێ بەری ٨ی شوباتا٢٠٢٢ێ، وان تانەیان ئێکلا بکەت دەربارەی نەدەستوری بوونا ئێکەم روینشتنا خولا پێنجێ یا پەرلەمانێ عێراقێ هاتینە تۆمارکرن، ژبەرکو لدویف خالا\ب ل برگەیا دووێ ل ماددەیێ ٧٢ یێ دەستوری هەردەمیێ عێراقێ، پێتڤیە دەمێ ٣٠ رۆژان پشتی ئێکەم روینشتنا خولا نویا پەرلەمانی، سەرۆکێ کۆماری ژ ئالیێ پەرلەمانی دەنگ پێ بهێتە دان.