سەرنووچە:

سه‌رده‌ستیا ڤێ ده‌ستهه‌لاتێ ژ هه‌ر ڤایرۆسه‌كێ كوژه‌ك مه‌ترسیدارتره‌

2/25/2020 10:59:51 PM
4562 جار خوێندراوەتەوە
تاکور زەردەشتی
+ -

ژبەرکۆ سەردەستیا وێ مەترسیە لسەر بنبڕکرنا ڕەوشتێ گەل، باھرا زۆڕینەیا جڤاکا مە فێر بویە بویەرێن مەزن لسەر نانەتەوەیبون، نەبەرپرسیاری و دەھان جۆڕێن گەندەلی و بگشتی بێ رەوشتییان ژبیر بکەن، یان ئێدی بەرەبەرە فێری ھەدارا ل ھەمبەر ھەر میناکەکا وان تاوانان ببن، ژبەر کۆ بۆیەرەک جھێ یا دی دگریت و بێی کۆ ئەنجامەک، پێشگیریەک، چارەسەریەک و سزادانەک لسەر تاوانبار یان ھۆکارێن بۆیەران بھێتە کرن بابەت ب لاپەڕێن دیرۆکێ دھێتە سپاردن و دبیتە گاڤەک دی بەرەڤ بەرژێری داشقتینا سەنگا ب ھەڵوێست بونا ل ھەمبەر ھەر ڕەنگێ تاوان و نەبەرپرسیاریان کو چاڤکانیا وێ دەستھەلات بخوەیە.

بێ گومان دەمێ ھەر تاوانەک دھێتە رویدان چ ژ ئالیێ تیرۆر یان ژ ئالیێ سیاسی یان بەرپرسیاری د پلەیا ئێکەم دا ھێزێن ئەمنی و ئەولەھی و یاسا (ل باشورێ کوردستانێ یاسا حزبە) و حزبێن باڵادەست و بگشتی دەستھەلات ژێ بەرپرسە. لەورا ب ڕاگەھاندن و ھێزا گڤاشتنان ب ھەر ڕەنگێ چ ژ ئالیێ گڤاشتنێن لسەر موچە، ژکارلادان، تەھدیدێن گرتنێ، ڕێگری ل کاسبی و بازرگانی و ھتد.. جڤاکێ نەچارێ بێدەنگبونا لسەر وان تاوانان دکەت. تاوانێن کو د ھەمو قۆناغێن دیرۆکا گەلێ کورد دا د ھیچ ڕەوشەکێ ل ژێر ھەر ڕەنگێ گڤاشتن و شدەت و توندوتیژیان، ل بەرامبەر دژمنان چۆک نەدای و نەپەژراندی. لێ ئیرۆ پشتی بۆرینا نێزیکی سێ دەھکە ساڵان ب سەدان و ھزاران بۆیەرێن بێ رەوشتانەترین کریارێت تیرۆرێن مرۆڤێن وەڵاتپارێز و سیاسەتمەدار و خودان گیانێ بەرپرسیاریێ بگرە، ھەتا چەواشەکاریێن ڕاگەھاندنی و سیاسەتێن چەوتێن خاپاندنا گەل و بەرۆڤاژیکرنا ڕاستیان و ڕەواکرنا شەڕێن خۆخۆری و ھەڤدۆکوژیێ کو ئەنجاما وێ ژبۆ جڤاکێ دیار بۆ تنێ دەستھەلاتەکا گەندەل و بنەمالەییە، ب ھەروەدانا خاک و سەروەت و سامانێن وەڵاتی و بێ ھەلویستیا لھەمبەر ھەر ڕەنگێ ھێرشێن داگیرکارانەیێن دژمنان ژ میناکا ڤالاکرنا چەپەران و بدەستڤە بەردانا کچ و ژنێن کوردان بجاران ددەستێ بێگانەیان دا و ب ھەروە دانا خوینا شەھیدێن دەھان و سەدان ساڵان یا کوردان کو پێخەمەتی وێ کرامەتێ ھاتینە رژتن و بێدەنگی بەرامبەر دگیرکاریێن دەولەتا تورک و کوژتنا خەلکێ سڤیل و ھاوڵاتیان بێی ئێک بەیاننامە و خەمبارییەکێ بدەنە دیارکرن، تاوانێن وەک تیرۆرا گەنجێن وەک وەدات حوسێن بەرچاڤێ رایا گشتی ب شێوەکا دڕندانە کو بەرزەکرن و بێ سەروشوین کرنا ھەر رەنگێ سەرەداڤەک یان بەلگە و شوین پێیەکێ کو ددەستێ دەستھەلاتێ دانە و ب ھەمو جڤاکێ دا سەلماندن ئەم بکەرێ سەرەکەیێن ڤێ تاوانێ نە و ب ڤی ڕەنگی تابلۆیەک ژ ژەھرەچاڤەکا تڕسێ دانایە بەر چاڤێ جڤاکێ کۆ ئەگەر تو بئاخڤی ئەڤە دێ بیتە چارەنڤیسا تە و گەنجێ تە!

کۆ وەک مە دیتی بێی خوە بخاپینین بەھرا گشتی یا جڤاکێ خوە لسەر بێ دەنگ کر، ھەرچەندی دلئێشانەک ژی گرتبن لێ د سبەرۆژێن دی دا زەمینەیا سینگ بەرفرەھیا تیرۆر و تاوانێن زێدەتر ژبۆ جڤاکێ بەرھەڤ بۆ. دەمێ ژ لاێ سەرکردەیێن ھەرێمێ تورک وەکی باشترین ھەڤال و ھەڤپەیمان دھێنە ھەمبێزکرن، دەمێ سرودا نەتەوەیی ژبەر ئامادەبونا فاشیستەکێ تورک ل ھەولێرێ د مەراسما سویندخارنا ژبۆ سەرۆکاتیا ھەرێمێ دھێتە مت کرن، دەمێ سەرۆکێ حکومەتا ھەرێمێ ل ئەنقەرێ ژبەر نەشرین بۆنا زمانێ کوردی ژبۆ دەولەتا تورک خوە نەچاری نەئاخڤینا ب کوردی دبینیت، دەمێ تورکمانێن ھەرێمێ دناڤا زکێ حزب و دەستھەلاتا کوردیدا ب ئازادانە تۆڤێ فاشیزما تورک بەلاڤ دکەن و ژەھرا ڕک و کینا تورکیزمێ دپەشیننە ناڤا ھەست و شعورێ گەلێ کورد، دەمێ بھێزترین و رەسەنترین ھێزێن شەڕڤانێن کورد کو سەلماندیە تاکە ئەھرۆما شەڕەفپارێزیا نەتەوا کورد و نمونە ئیرادەیا کورد و کوردستانی وەک تیرەکێ دچاڤێ دژمناندا جی گرتین دەم و بێ دەم دناڤا زکێ ھەرێمێ دا ب تیرۆریست دھێنە لقەلەمدان بێی ھەڵوێستەک ژ ھەرێمێ بەرامبەر وێ بھێتە نیشادان و ھەتا بەرەڤاژی وێ ژی دھێتە دیتن، دەمێ دەمێ دەمێ...  و دەمێ بێھژمار ژ ڤان میناکان ڕۆژانە دقەومن و ھەرچی گەنج و لاوێ خودان دەعیا شەرەفا گەلەری لسەر پۆستەکێ سادە یێ فیسبۆکێ یان ڕەخنەکێ و جۆشەکا نەتەوەیی بھێتە گرتن و ئێشاندن و سەرکوتکرن و بێدەنگ کرن، بێ گومان ئەڤە مەزنترین کارەساتن ل سەر پەروەردەیا جڤاکێ د ملێ بەرپرسیاری، غرورا نەتەوەیی و ناسنامەیی، ئیرادەبۆن و گیانێ خوەبەشین و ئەنسیاتیڤا جڤاکیبۆنێ و بێ گومان کرامەتا کلتوریا کوردی!

ئەڤ تەجاوزا لسەر زاڕۆکێ تەمەن ٧ ساڵی ژلایێ ئەندام و ڕەشەکێن سەر ب دەستھەلاتێ ل دەمەکێ کو بخوە پارێزڤانێن تاوانبارانە ژی نمونەکا دییە لسەر پەروەردەیا بەر ب لۆتکەیا بێ کرامەتیێ برنا جڤاکا کوردی کو د دیرۆکێ دا میناکێن ڤان بێکرامەتیان و جۆڕێن سەرنزمی و شکانێن ئیرادی و تڕس و بێ ھەڵوێستی و نەبەرپرسیاری و شکانا دەعی و شکۆیێن نەتەوەیی ل ڤان سێ دەھکەساڵان کۆ ئیرۆ لسەر وان ھاتینە داسەپاندن نەدیتینە.

ل دوماھیێ ڤێ ڕاستیێ دخوازم ب زمان بینم کو ھەر کەسەک بزانیت، بەھرا ھەری زێدەیا گەلێ باشور د ئەشکەنجەکا دەرۆنی و وژدانی و خوەخۆریێ و ڕک و کینا بەرامبەر ڤان بێدادیاندانە کو د ناڤا خوە دا وەکی بورکانەکێ دکەلن و جڤاک چاڤەڕێ پەقینەکێ دکەت کو ھەر دەم بۆ دەمێ پەقینا وێ نێزیکتر دبیت کو ھندی درەنگتر بکەڤیت مەترسیا ژناڤچۆنا شیرازە و جەوھەر و بنەماێ نرخ و بھاێن جڤاکا ھەرێما کوردستانێ زێدەتر بەر ب لاوازی و ژناڤچۆنێ دچن کو ژ ھەر ڤایرۆسەکا کوشەندە مەترسیدار تر و وێرانکەرترە.