سەرنووچە:

​بەرەف سەرهەلدانا گەل

2/21/2020 11:23:35 AM
3875 جار خوێندراوەتەوە
ئەیاس کەرەم
+ -

ئێک ژ سەرەداڤێن سەرهەلدانا گەل ب وێ چەندێ دەست پێ دکەت دەمێ بوشایی دکەڤیت ناڤبەرا گەل و حکومرانیێ، ل ژیێ حکومرانیا باشورێ کوردستانێ چ دەمان وەک قوناغا نها ئەڤ بوشاییە مەزن نەبوویە، ئەگەر خاندنەکا دەستپێکی بۆ قوناغێن حکومرانیا هەرێمێ بێ کرن، ل هەمی سێکەتران خالێن نەرێنی زێدەترن ژ خالێن ئەرێنی، ل ژێر ڤێ بناڤ حکومرانیێ فایلێ نەفتا هەرێمێ دناڤا گەندەلیێ دا یێ خەندقی، ل ژێر ڤێ بناڤ حکومرانیێ سوپایەک ژ گەنجێن بێکار یێ دروست بویی، ئازادیا نێرینێن سیاسی هاتی یە زنجیر کرن، فایلێ مافێن مروڤ ل جەم رێکخراوێن نێڤ نەتەوی یێن چاڤدێریا مافێن مروڤان دکەن، یێ رەشە کەرتێ پەروەردێ پشتی ٢٩ سالێن حکومرانیێ دورە ژستاندەردێن پەروەردەیی ل ژێر ڤێ بناڤ حکومرانیێ کەلتورێ کوردی راستی داگیرکاریێ بوویە ژلایێ داگیرکەرێن کورد و هیچ رێگریەک ژێ ژێ ناهێت کرن ژ بال ڤێ حکومرانیێ،  ڤێ بناڤ حکومرانیێ جڤاکێ کوردی توشی چینایەتیێ کر، ب ئاوایەکێ بەراوردی دناڤبەرا چینا دەسەلاتدار و پرانیا جڤاکی مەودایەک مەزنە، ل ژێر ڤێ بناڤ حکومرانیێ شیرازا جڤاکی بەرەف تێکچونێ چوویە، ئامارێن کێشێن جڤاکی روژ ب روژ زێدەتر و مەترسیدار ترن.

 داینەمویا گهورینا جڤاکی یا ناڤ لێ تێکرن گەنج ب بەرنامە کار ل سەر ڤالا کرنا هەستێن وان یێن نەتەوی تێ کرن، هەرێم دابەش کر ل سەر دو جەمسەرێن مەزهەبی، ئەڤ خالەو چەندین خالێن دن یێن رەشێن ڤێ بناڤ حکومرانیێ رێخوشکەرن بو سەرهەلدانا گەل، هەلبەت سەرهەلدانا گەل پێتڤی ب پێشەنگایە، ئەو ئەرکێ دیروکی یێ ڤێ قوناغێ ژی دکەڤیت سەر ملێن وان هێزێن هەرێمێ چ وەک پارتێن ئوپوزسیون یان گروپێن جڤاکی یێن بەرهەلستکارێن ڤی گروپێ مافیا یێ چەندین سالە دەست دانایی سەر ژێدەرێن ژیانا خەلکی، ب ژمارە ئێک ژی گەرەکە سەروکێن پارتێن ئوپوزسیونا هەرێمێ ببن پێشەنگێن گەل، یا ژهەمیێ پێتر بەرهەڤ بو ڤێ قوناغێ هێرشا تەخا گەنجێن هەرێمێ یە ل هەمبەر ڤی سیستەمێ گەندەل، ئەڤ ژی دبیت خالا وەرچەرخانێ.