سەرنووچە:

ژبەر خونیشاندانێن عێراقێ مەسعود بارزانی ئامادەی چ رێکەفتنەکێ یە؟

11/1/2019 11:50:03 AM
3302 جار خوێندراوەتەوە
نورمان کوردی
+ -

ژبەر خوپێشاندانێت عێراقێ پارتی و یەکێتی ئامادەی چ جورە تەنازلاتانە ژ بۆ حکومەتا ناڤەندا عێراقێ بکەن، ژ ترسێت خوپێشاندانێن ڤێ داویێ ل عێراقێ دئێنە ئەنجامدان؟. لسەر مادەیێ ١٤٠ێ دەستوری و دەستکاری د دەستورێ عێراقێ دا و ھێزێت پێشمەرگەی و پرسا رادەستکرنا نەفتێ ئەوا بناڤ وەکی (ئابورەکێ سەربەخۆ) دایە نیاسین و ریکلام بۆ ھاتیەکرن ب گشتی و ب تایبەتی ژلایێ سەرکردێت پارتی و یەکێتی ڤە، دڤێت ئەم پیچەکێ پاشڤەبزڤرین دا کو ب دروستی د بابەتی بگەھین و پلانێن بەرژەوەندیخازانە یێن پشکەک ژ سەرکردێن پارتی و یەکێتی بۆ خەلکێ خۆ دیار و روونبکەین.

ئەرێ پارتی و یەکێتی ئامادەنە لسەر حسابا بەرژەوەندیا گشتی بۆ بەرژەوەندیا حزب و بنەمالێن خۆ چ بکەن ؟

ھەر وەکى یا دیار  د نھا دا پارتی و یەکێتی  زورینەیا حکومەتێ و پەرلەمانی کوردستانێ پێکئینایە و رێژەکا باش یا کورسیێن پەرلەمانێ عێراقێ بدەست ئیناینە و خۆ ب نوینەرێت زورینەیا خەلکێ کوردستانێ ددەنە دیارکرن، ب سود وەرگرتن ژ سیستەمێ ئەلکترونی یێ ھەردوو ھەلبژاردنێن عێراقێ ١٢گۆلانا ٢٠١٨ و ھەلبژاردنێن کوردستانێ ٣٠ێ ئەیلونا ٢٠١٨ ھاتینە ئەنجامدان و ئەو ساختەکاریا تێدا ھاتیەکرن ژلایێ پارتی و یەکێتی ڤە، ژ ئەگەرێ نەبوونا چاڤدێریەکا باش یا نێڤدەولەتی و نەبوونا کۆمسیۆنەکا سەربەخۆ بوویە.

ترسا پارتی و یەکێتی ئەوە ژ خونیشاندانێن عێراقێ، کو حکومەت و پەرلەمانێ عێراقێ بهێنە هەلوەشاندن و ئەو پێگەھێ سەختەیێ پارتی و یەکێتی د نھا دا ھەیی نەمینیت، روویێ وان یێ راستەقینە بۆ خەلکێ کوردستانێ و جیھانێ دیار ببیت کو پارتی و یەکێتی کەمینە نە ل کوردستانێ نەک زورینە، ھەر ژبەر ھندێ سەرۆکێ پارتی مەسعود بارزانی د دیدارەکێ دا دگەل ئەیاد عەلاوی ل ٢٠ هەزیرانێ دا چەندین بریاران ددەت، کو  ئەیاد عەلاوی ٢٥ێ جوتمەها ٢٠١٩ێ  ل کەنالەکێ تەلەڤزیونی بەحس ژ کومبونا خۆ و مەسعود بارزانی دکەت و دبێژیت مەسعود بارزانی ئامادەیا خو نیشاندایە کو ھێزێن پێشمەرگەی بئێخیتە د بن کونترولا سەرۆک وەزیرێ عێراقێ دا کو دھەمان دەمدا دبیتە سەرۆکێ ھێزێن چەکدارێن عێراقێ،  ئامادەیە دەستکاریێ د ماددەیێ ١٤٠ێ دەستوری دا بکەت کو ئەو ژی یێ گرێدایە ب کەرکوک و شنگال و چەندین دەڤەرێن دی یێت دەرڤەی ئیدارا ھەرێمێ نە کو دبەرژەوەندیا عێراقێ دا بیت نە هەرێما کوردستانێ.

ھەر وەسا یەکێتیێ ژی ب رێکا بەرھەم سالح سەرۆک کومارێ عێراقێ کو لسەر پشکا یەکێتیێ لسەرخەتە بۆ ھاریکاریێ لسەر پێشنیار و بریارێن بارزانی، ل روژا شەمبی ٢٣ جوتمەها ٢٠١٩ێ  بەرھەم سالح سەرۆک کومارێ عێراقێ و عادل عبدولمەھدی سەرۆک وەزیرێ عێراقێ و محەمەد حەلبوسی سەرۆکێ پەرلەمانێ عێراقێ و فایق زێدان سەرۆکێ جڤاتا دادگەھا بلند یا عێراقێ پێکڤە کومبون، ئەف پرسە بەحسکرن و روژا ٢٨ێ جوتمەها ٢٠١٩ێ بریار ژ پەرلەمانێ عێراقێ دەرکەفت کو لیژنەیەک بهێتە پێکئینان و د دەما چار ھەیڤان دا دەستکاریا دەستورێ عێراقێ و ماددەیێ ١٤٠ بهێتە کرن.

پارتی و یەکێتی ھەڤبەشن دڤێ پلانێ دا و د ئامادەنە ھەر ئاسنکاریەکێ بو عادل عبدولمەھدی بکەن لسەر حسابا مللەتێ کورد و خونیشاندەرێن عێراقێ، ژ بۆ ھندێ کو عادل عەبدولمەھدی لسەر دەسھەلاتێ بمینیت و بەرژەوەندیێن وان یێن حزبی دگەل حکومەتا بەغدا تێکنەچن.

ھەر وەسا پارتی و یەکێتی ب ئاشکەرا دژاتیا خۆ بۆ خونیشاندانێن عێراقێ دیارکرینە ژبەر کو دزانن ئەگەر حکومەتەکا بھێز ل بەغدا ھەبیت وان چ سەنگ و قورسیەک نە ل کوردستانێ و نە ل بەغدا بگرە ھەتا لسەر ئاستێ جیھانێ نامینیت، ھەر چەندە ئەو سەنگ و قورسیا جاران نەمایە ژ ئەگەرێ مژارا ریفراندومێ و گوھنەدانا جڤاکا نێڤدەولەتی و حساب نەکرن بۆ بوچوونێن نەتەوەێن هەڤگرتى و چەندین ئەگەرێن دی ڤەدگەریت.