سەرنووچە:

نەوەی نوێ و تولڤەکرنێن سیاسی ب ناڤێ یاسایێ؟

5/8/2019 11:21:25 PM
6940 جار خوێندراوەتەوە
خەتاب عومەر
+ -

ھەر چەند نە د گەل دیتن و سیاسەتکرنا نەوەی نوێ یا رادیکال دامە لێ نابیتە حێجەت کو دەستھەلات و ھێزێن ئەولەھیێ یاسایان بکەنە ئامراز تێدا ئارمانجێن خوەیێن حزبی ب دەست بخن، ئەڤا د رۆژێن دەرباسبووی دا ل ھەمبەر ڤەلڤینا نەوەی نوێ و خوبەخشێن وێ ھاتیە کرن و ھێرشی سەر بارەگەھێن وان ھاتیە کرن ب حێجەتا ھەبوونا سکالایان کو تا نھا ب بریارێن دادگەھێ چ یەک ژ سکالایان ل سەر ساخ نەبوویە و ژ ئالیێ یاسایی ڤە ژی ئەو سکالا کارێ پۆلیسانە نەک ئاسایشێ و نەخاسمە ئاسایشەک کو سەرەدەریەکا  حزبی دکەت ؟

نەوەی نوێ ھێزەکا خودان کورسی یە ھەر چەند تێبینیێن جدی من ل سەر ھەبووینە لێ نابیت دەزگەھێن ئەولەھیێ بکەنە حێجەت و ھێرشی ھەموو کارێن وان و خوبەخشێن وان بێ چ پارێزبەندیەکا یاسای و کەسی بکەن.

دادگەھـ و دادوەر نابیت د دەرھەق ڤان ھێجەتێن حزبی دا زێدەتر خوە بچووک بکەن و خوە رادەستی بریارێن سیاسی بکەن ، ئەز د گەل وێ یەکێ دامە رێکارێن یاسایی یێن دروست د دەرھەق ھەمی تاکەکێ دا بێ جیاوازی بھێنە کرن لێ ب سیاسیکرنا کەیسان و ب تایبەت ئەڤا ل ھەمبەر نەوەی نوێ و خوبەخشێن وێ دھێتە کرن زێدەگاڤیەکا  زەلال و دیار یا یاسایی و بھایێن کەرامەتا مروڤی یە، دیسا خالەکا دی یا سێدارەدانا سەروەریا یاسایێ و مەزن ھێلانا دادگەھـ و دادوەرانە کو ب جورەکێ رادەستی حزب و سیاسەتێ بوونە کو ھەبوونا وان زیدەگاڤیبیت ل سەر سەروەریێن ڤێ ھەرێمێ .

ل گۆر داخویانیا دادگەھا سلێمانی تا نھا چ تشتەک ل سەر وان ساخ نەبوویە ئەڤجا ئێدی ئەڤا دھێتە کرن کوشتنا دادگەھـ و دادوەرانە و سەروەریا یاسایێ یە و بەرامبەر و تایبەت تر کو ل سەر نەوەی نوێ دھێتە کرن.

ئەڤ ھەرێمە ب سیاسەتا کوچکێن ئاغا و بریارێن سیاسی یێن تولڤەکرنێ برێڤە دچیت و بتەنێ  خالان ل سەر سمعەتا ڤێ ھەرێمێ  زێدە دکەت .