سەرنووچە:

میقداد بەدرخان و ئارمانجا ڕۆژنامەیا کوردستانێ

4/22/2019 5:38:33 PM
1868 جار خوێندراوەتەوە
هێرش جەلال
+ -

سەد و بیست و یەک ساڵ ب سەر ساڵڤەگەرا ڕۆژنامەگەریا کوردی رە دەرباس بوون. کورد ژ ڕۆژنامەیەکێ بوون خوەدانێ ب سەدان ڕۆژنامە، کۆڤار ، تەلەڤزیۆن، ڕادیۆ و ناڤەندێن دن یێن ڕۆژنامەگەری و چاپەمەنیێ. ژ ھێلا نڤیس، تەکنیک و کوالیتیێ ڤە، د ناڤا وان سەد و بیست و یەک سالان دە، سەری ھەتا بنی، گوھەرتن ب سەر ڕۆژنامەگەری و چاپەمەنیا کوردی رە ھات. لێ دڤێ مرۆڤ پرس بکە گەلۆ ئارمانجا کو میقداد میدحات بەدرخان ل سەر وێ ڕۆژنامەیا کوردستانێ دەرخست چ بوو. چما ناڤێ کوردستانێ ل ڕۆژنامەیێ کر. چاوا و د چ ڕەوشەکێ دا بریارا دەرخستنا ڕۆژنامەیا کوردستانێ دا. چاوا دەستپێکر و چاوا کارێ وی ب داوی ھات.

گەر تاکێ کورد، ب تایبەتی ڕۆژنامەڤانێن کورد ڤان پرسان ل خوە بکن و لێکۆلینێ ل سەر ھەولدانێن میقداد بەدرخان دا بکن، دێ ب باشی ل ئارمانجا ڕۆژنامەیا کوردستانێ تێبگەھن و دێ ببینن کا رەوشا ڕۆژنامەگەریا کوردی ڕۆژا مە یا ئیرۆ دا چ قاس کومباخ و نەباشە.

پشتی تێکچوونا شۆرەشا بەردخانیان د سالا ۱٨٤۷ێ دا، عوسمانیان بەدرخانی ژ بۆ باژارێ قاھیرەیا پایتەختا میسرێ نەفی کر. عوسمانیان ب سەدەما خەباتا نەتەوی، مالباتا بەدرخانیان ژ کوردستانێ دەرخست. لێ میقداد میدحات بەدرخان، ژ بۆ بەردەوامیدان ب خەباتا نەتەوی ڕێکەکا نوو جەرباند. ئەڤ ژی پێشخستنا چاند و زمان و تاکێ کوردی و ناساندنا کوردان ب رێکا ڕۆژنامەگەریێ بوو و میرێ کوردان رێ ل بەر دەستپێکا خەباتەکا نوو یا نەتەوی ڤەکر.

میقداد میدحات بەدرخان دەربارێ ئارمانجا ڕۆژنامەیا کوردستانێ دبێژە ( من ڕۆژنامەیەک دەرخست. من ناڤێ وی کر کوردستان. ئەز دخوازم کوردان ژ ھێلا، چاندی، سیاسی، زمان، ئابۆری و زاستی ڤە کوردان ھوشیار بکم).

ئەگەر ئەم ئارمانجێن ڕۆژنامەیا کوردستانێ و رەوشا ڕۆژنامەگەریا کوردی د ئیرۆ دا بەرھەڤ بدن. دێ ھێڤیێن میقداد بەگێ کوردان گەلۆ تێدە ببینین. مخابن نا!

ئیرۆ رۆژنامەگەریا کوردی ب گشتی ب تەنێ جھێ ناکۆکی، ھەڤرکی و کرێتکرنا ئالیێن سیاسی و پارتیێن کوردی یە. کا ھزرا نەتەوی و کا کی ڕۆژنامە، تی ڤی و ناڤەندەکا ڕۆژنامەگەری بەحسا یەکێتیا نەتەوی و یەکگرتنا گەلێ کورد دکە.

جیھان ل سەر خاک و نەتەوە و دەولەمەندیا کوردستانێ د ناڤ شەرەکی مەزن و بێئەمان دایە، ڕۆژنامەگەریا کوردی نووچە و بوویەرێن ھەزاران کیلۆمەتران دووری وەڵاتێ خوە دوەشینە. ل شوونا ژ بۆ چارەسەریا بنگەھین و زەلالکرنا پرسگرێکێن بنگەھین یێن گەل بگەڕە، لێ بەحسا چیرۆک و دەستان و بوویەرێن ب ھەزاران کیلۆمەتران ژ خوە دوور دکە.

بەرژەوەندیێن تاکەکەسی و حزبی بەشەکا سەرەکی یا مژارێن ڕۆژنامەگەری و چاپەمەنیا کوردی یە.

ڤەشارتنا ئاریشەیێن جڤاکی و ھزری د بن ناڤێن تەکنەلۆژیا و پێشکەتنا زانستا سەردەمیانە ب رێکا چاپەمەنیێ کارەکێ سەرەکی یە. دۆبلاژکرنا فیلم، ستران و بەرنامە و کۆپیکرنا وان بۆ ستایلەکا نە کوردی لێ پێشکێشکاریەکا ب زمانێ کوردی ھەر کاناڵ و ڕادیۆ و ماڵپەرەک داگیر کریە.

ئەگەر ئەم ب ئاوایەکێ کوور بەحسا وان ئاریشەیان بکن، ژ خوە پێدڤی ب دەمەک زێدە و لێکۆلینێن ھوور ھەیە.

د ئەنجامێ دا مرۆڤ دکارە بێژە، ب گشتی ڕۆژنامەگەریا کوردی ل گۆری ئارمانجا دامەزراندنا یەکەمین ڕۆژنامەیا کوردی و دامەزرێنەرێ وێ نامەشە.