سەرنووچە:

پێدڤیە ئەردۆغان ژ شکەستا هەلبژارتنان دەرسێ وەرگرە

4/20/2019 2:15:15 PM
2668 جار خوێندراوەتەوە
سەلاحەدین دەمیرتاش
+ -

هەلبژارتنێن ٣١ێ ئادارا ٢٠١٩ێ د سەری دا بۆ ئەردۆغان و بۆ رێڤەبەریا تورکیایێ پەیامەکا گرنگ بوو. ئەردۆغان د هەلبژارتنان دا بچووک بوو. پارتیا وی ل ٥ باژارێن مەزن و گرنگ ، ب تایبەتی ل ئیستەنبۆلێ کو جهێ دەستپێکا مەزنبوونا وی بوو وندا کر.

پارتیا داد و گەشەپێدان یا گرێدایی ئەردۆغان د ڤان سالین داویێ دا نە تەنێ ژ دیموکراسیێ بەلکو ژ نرخ و ئەخلاقێ ئیسلاما راستەقینە ژی دوور کەت. سەرۆک کۆمار و پارتیا وی، چاڤێ خوە ل هەمبەر ساختەکاری، بێعەدالەتی و بنپێکرنا مافان گرتن و نها ژی باجا وێ ددن.

ئەز ژی د ناڤ دا، ب هەزاران ئەندامێن پارتیا دیموکراتیک یا گەلان "هەدەپە" ژ بەر سەدەمێن سیاسی د زیندانێ دانە. هێزێن ئەولەهیێ د زیندانان دا ئەندامێن پارتیێن مە ئیشکەنجە دکن. پرانیا ئەندامێن پارتیا مە ژ ئالیێ دەستهەلاتداران ڤە وەکی تیرۆریست هاتن ب ناڤ کرن. لێ زێدەباری وێ یەکێ، پارتیا کو من ب سالان هەڤسەرۆکاتیا وێ کر، د هەلبژارتنان دا هێزا خوە نیشان دا.

زێدەباری هەموو ئاستەنگیان ژی، سەرکەفتنا هەدەپێ د هەلبژارتنان دا بالێ دکشینە. ب ڤێ سەرکەفتنێ دیار بوو، هەدەپە و پرانیا کوردان ل هەمبەر زەخت و فشارێن دەولەتێ سەرێ خوە ناتەڤینن. جەماوەرێ هەدەپێ جارەکا دن نیشان دا کو ئالیگرێ ئازادی، وەکهەڤی، دیموکراسی ، ئاشتی و بهەڤرە ژیانێ ل تورکیایێ نە.

رەوشا رۆژهەلاتا ناڤین و ب تایبەتی رەوشا کو سوریا نها تێدایە، نیشان ددە کو تورکیا پێدڤیە ل سەر کیشک رێکێ بمەشە. تورکیا پێدڤیە ژ بۆ یەکێتی و پاراستنا جڤاکێ خەباتێ بکە و ئەڤ یەک ژی ب تەنێ ب ئاشتی و دیموکراسیێ دێ سەربکەڤە.

د رەوشا نها دا، قەیرانا ئابوری و بێکارییا کو بەردەوام دکە ب تەنێ ب رێکا دیموکراسی و ریفۆرمێن سیاسی چارەسەر دبە. لێ سیاسەتا کو نها ئەردۆغان ل تورکیایێ دمەشینە، خوەدی ئیرادەیا پێویست و وێرەکیا کو بکارە چارەسەریێ د گەل خوە بینە، نینە.

سیاسەتێن کو ئەردۆغان ل هەمبەر ئۆپۆزسیۆنێ ب تایبەتی گەلێ کورد دمەشینە، جڤاکێ د ناڤا جەمسەران دا پارڤە دکە. گەلێ کورد دخوازە د گەل گەلێن دن د ناڤ ئاشتیێ دا بژی و ژ توندوتیژی و شەر دوور بە. بەلێ، پێدڤیا کوردان زێدە ب دیموکراسیێ هەیە. داخوازا کوردان یا سیاسی، جڤاکی و چاندی هەیە. مە ژی ژ بۆ بدەستئینانا وان داخوازیان سۆز دایە. لێ سەرۆک کۆمار و دەستهەلات ل پێشیا داخوازیێن گەلێ کورد ئاستەنگن.

لەیلا گوڤەن پارلەمانتارا مە و گەلەک کەس ل دەرڤە و ناڤ زیندانان دا دەست ب گرەڤێن برسیبوونێ کرنە. داخوازا گرەڤێن برسیبوونێ ژی راکرنا تەجریدا ل سەر عەبدولا ئۆجالانە. ئۆجالان ٢٠ سالن ل گرتیگەهێ یە و هەڤدیتنا وی د گەل پارێزەر و ئەندامێن مالباتا وی ل گراڤا ئیمرالیێ تێ ئاستەنگکرن و هاتیە تەجریدکرن. کەسێن کو دەست ب گرەڤا برسیبوونێ کرنە،  د وێ باوەریێ دانە کو ئۆجالان ژ بۆ دیموکراسی و ئاشتیێ خوەدی رۆلەکا سەرەکی یە. تێ زانین کو باندۆرا ئۆجالان د ناڤ کوردێن تورکیا و سوریایێ دا گەلەک زێدەیە. هەروەسا ژ بۆ جارەکا دن دەستپێکرنا پێڤاژۆیا ئاشتیێ، پەکەکە ژ بلی ئۆجالان رۆلا کەسی دن ناپەژرینە. چ پێڤاژۆیێن ئاشتیێ بێ ئۆجالان سەرناکەڤن و ئەگەر بێژین ئەردۆغان ژی د سالێن چوویی دا دەما کو د گەل پەکەکێ دەست ب دانوستاندنان کر، وێ راستیێ دیار دکە. پرانیا کوردان ژی ئۆجالان وەکی لێڤەگەرێ خوە یێ سەرەکی دبینن.

د ئەنجاما هەلبژارتنان دا دەرکەت کو نە تەنێ پارتیا مە، بەلکو هەموو پێکهاتە و گەلێن تورکیایێ دخوازن د ناڤ ئاشتی و دیموکراسیێ دا بژین. ل هەمبەر دەستهەلاتا تاکەکەسی و ئۆتۆریتەریێ دسەکنن. هێڤی دکم ئەردۆغان ژی ئەڤ تشت دیتبە. ئەگەر ڤان تشتان ل بەر جاڤان نەگرە. د هەلبژارتنا داهاتی دا دێ داربەیا داویێ بخوە.

باوەریا من و هەڤالێن من یێن د زیندانان دا بۆ دیموکراسی و ئاشتیێ بێ کو ب داوی ببە، بەردەوامە. باوەریا مە ب پێشەرۆژەک گەش و دیموکرات ل تورکیایێ هەیە. ئەم د ڤێ باوەریێ دانە کو هەلبژارتنێن ڤێ جارێ رێکا دیموکراسیێ ڤەکریە. ئەگەر حکومەت تاکڕەوی و ئۆتۆریتەریا خوە بەردەوام بکە، دێ زێدەتر راستی کریزێن سیاسی و ئابوری وەرە.

بانگا مە ژ بۆ جڤاکا ناڤدەولەتی هەیە کو تورکیایێ بۆ ئاشتی و دیموکراسیێ هان بدن. ئەم وەکی گەلێن تورکیایێ، زێدەباری زێدەبوونا جووداهیان دکارن ئاریشەیان ب رێکا گۆتوبێژان چارەسەر بکن. ل ئانادۆل و میزۆپۆتامیایێ دیرۆک شاهدێ ب هەڤرە ژیانێ یە.

هەدەپە و گەلێ کورد هەرتم ژ بۆ ئاشتیێ ئامادە نە. باوەریا من هەیە کو ئەم دێ سەربکەڤن. هەموو پێکهاتەیێن جڤاکێ دێ کۆم بکن و دێ ببین خوەدیێ دیموکراسی و ئابوریەک بهێز. هەلبژارتنێن ٣١ێ ئادارێ ئەڤ رێک نیشانی مە دا.

سەلاحەدین دەمیرتاش بۆ مالپەرا واشنتن پۆست