سەرنووچە:

ئەرێ گرتن دێ برینێن هەوە سارێژ و پاقژ کەت

5/17/2019 5:02:36 PM
5414 جار خوێندراوەتەوە
سیپان ئامێدی
+ -

دەمێ ولات د کەڤیتە دەستێ کەسانێن نەخویندەوار و سەربازی و زەلامکوژ دا، دێ رەوتا ژیان و ژیارا خەلکێ وی ولاتێ وەکى مێشکی خۆ یێ بچیک بڕێڤەبەن و نەشێن زێدەتری وی میشکێ بچیک بێخنە کاری بۆ هزرێن بەرەف پێشڤەچوونێ و خزمەتکرنا نفشێ نوو بکەن، لێ بەورۆڤاژی دێ بەرێ خەلکێ دەنە کوشتنێ و غەدر و خیانەت و گەندەلیێ دا کو وەکى خۆ لێ بکەن و ل دەما کەسەک ژی بخوازیت هزرا چاکسازیان بکەت یان هزرەکا نوو پەیدابکەت، یەکسەر دێ مێشکێ بچووکێ وان کەڤیتەکاری بۆ ژناڤبرنێ و دروستکرنا سیناریوو و بۆختانان.

ئەڤ کارە ژی د دیرۆکا حکومرانیا ڤێ دەسهەلاتێ دا یا تێکەلبووی و بوویە بەشک ژ ژیانا وان و دخوازن ب گرتن و کوشتنا کەسایەتیێن ئازا و رۆژنامەڤان و هزرمەندان، دیرۆکا خۆ یا چەپەڵ پاقژ بکەن، ل ڤیرە ژی پرسیار ئەوە ئایە ب کرتنا گەنجەکێ گوهرینخواز و پێشەڕۆژ بین، ئەو دشێن برینێن خۆیێن کور و پیس و چەپەڵ و پاقژ ساڕێژ بکەن، کو دیرۆکەکە پرە ژ خیانەت و ئاخ فرۆشی و سامان دزی و کوشتن و خوین ڕشتنێ...، مینا خیانەتا ٦٦ێ و ٣١ێ ئاب و ١٦ێ ئۆکتۆبەرێ و ١٧ێ ئۆکتۆبەرێ و فرۆتنا شنگالێ و دزین و تالانکرنا سامانێ بن عەرد و سەرعەرد و خیانەتا نەتەوەیی و دزینا مووچە و قوتێ خەلکی ب ئاوایەکێ ئاشکەرا و ستاندنا ژین و ژیارا خەکێ و ب تایبەت ژی خەلکێ وێرەک...، نەخێر نەشێن ژبەر کو ئەگەر هەتا نها بۆ وان چبیتە سەر ژ نها پێڤە نەشێن بەردەوام بن ژبەر کو خەلک وەکو جاران نەمایە و ب تایبەت ژی گەنج کو نها چاڤ ڤەکریترە ژ جاران و ئاستێ وان یێ رۆشنبیری و دونیابینی گەلەک باشترە ژ جاران و سەردابرنا وان هەتا ڕادەیەکی یا ب زەحمەتە ژبەر کو ئەگەر بەری نها ئەڤ دەسهەلاتە شیابا کارێن خۆیێن چەپەل ژبیرا خەلکێ ببەت، ژ نها پێدا نەشێت ژبەر کو نها سەردەمێ سوشیال میدیا و ئەلکترونیاتێن سەردەمە ب ئاسانیی خیانەت و کارێن چەپەلێن دەسهەلاتێ د هێنە سەر هزر و بەرچاڤێن خەلکی.