سەرنووچە:

​راگەھاندنا کوردی د ناڤا بەرەلایی و ئازادیێ دا

2/4/2020 8:44:06 PM
6881 جار خوێندراوەتەوە
سەردار ھێتوتی
+ -

پشتی بوورینا چارێکە چەرخەکی ژ دەستھەلاتا خۆ برێڤەبەرا کوردی ل باشوور، و دگەل ھەبوونا ھەر سێ دەستھەلاتێن یاسادانان و بجھئینانێ و دادوەریێ، و دگەل ھەبوونا ھژمارەکا بێ ھژمار ژ رێکخراوێن جڤاکێ سڤیل و سەنتەرێن رەوشەنبیری و سەنتەرێن ھشیاریێ و ڤەکولین و ستراتیژی، لێ ھێشتا پێناسەکرنا راگەھاندنا کوردی ب ھەر سێ تایێن خوڤە (رادیۆ، تیڤی و رۆژنامە) وەک راگەھاندنەکا حزبی، ناکەڤنە د چ تایەکێ تەرازویێ دا ژ بۆ پێناسەکرنێ و ھێشتا د ناڤا وێ گێژەڤانکێ دا یا ئاسێ مای و نەشیایە خۆ ژ وان پێلان دەرباس بکەت ھەر چەند ب ناڤ ھندەک کەنالێن سیبەر یێن پەیدا بوی  بەس ھێشتا پەیامەکا ھشک و پری دوبەرەکی یا حزبی ل سەر وان کەنالان ژی یا ب زقی دیارە.

 ل ڤێرە ئەڤ پسیار پەیدا دبیت: ئایا دەم ھاتیە کەنالێن حزبی دەرگەھێ وەشانا خۆ بگرن؟ ئایا ھێشتا دەما یاسایێ نەھاتیە؟ ئەڤە و چەندین پسیارێن دیتر بەردەوام خۆ دئازرینن و بەردەوام دپرسن: ئەرێ دەم نەھاتیە ل سەر ھێلا بەرژەوەندیا نەتەوەیی کار ل ڤان کەنالا بھێتەکرن؟ لێ بەری کو بەرسڤا کەت ب کەتا ئەڤان پسیاران بدەین ل دەستپێکێ دخازم بێژم کو گشت کەنالێن حزبی و یێن سەر ب رێکخراوێن ئارمانجدار ڤە ل کوردستانێ یێن توشی شکەستنێ بوی و بینەرێن خۆ ب رێژەیەکا زێدە مەزن ژ دەست دانە و خەلک بەرڤ کەنالێن نیڤ سیبەر و دەم بوراندنێ ڤە یێن چوی و خۆ ژ سیاسەتا تاری پەرەستا کەنالێن حزبی پاراستیە و ئەڤرۆ ئەو کەنالێن حزبی ب ھەر دوو تایێن خو یێن علمانی و ئیسلامی د بەرتەنگیا نەبوونا بینەری دانە لێ ژ بەر کو ئەو کەنال ژ لایێ حزبێن خۆدان ئارمانجڤە دھێنە پشتەڤانیکرن و پارەدارکرن لەورا ھەتا نوکە ژی ھەر ل سەر وەشانا خۆ د بەردەوامن.

 دا بھێینە سەر بەرسڤا و لگورا ھزرا من ژ مێژە وەرە ئەو دەمێ ھاتی کو ئەڤ کەنالێن بەرگێ حزباتیا زق لخۆ کری ھەر ھیچ نەبیت ھێدی ھێدی د وی قالبی دا دەرکەڤن و نیڤ سیبەر خۆ بپێچن داکو بشێن ب ئایدولوژیەکا نوی و ھندەک بەرنامێن سەردەمانە دووبارە بینەران لدوور خۆ خرڤەکەن کو ئەڤە بخۆ دێ بیتە بەرسڤ بۆ پرسا مە یا دوویێ ژی، لدوور پرسیارا سیێ کانێ حکومەت و پەرلەمان دێ شێن یاسایەکێ بۆ گشت کەنالان دانن داکو ژ پەیاما توندا حزباتی دویر بکەڤن؟ لگورەی من، ھێشتا ئەو حکومەت و پەرلەمانێ خەلک چاڤەرێ ل کوردستانێ سەرھەلنەدایە چونکی ب گشتی ھەر دوو سازیێن ناڤھاتی نەشیانە دناڤا ھێلا دیموکراسی و تاک دەستھەلاتیێ دا خۆ ئێک لا بکەن و ل ڤان دوماھیا ھزرا توند و دژوارا عەشیرەتگەریێ ژی باندورا وێ ل سەر ڤان ھەر دوو سازیان زێدەبویە لەورا کەسێن گەلەک ھەژی ل پەرلەمانی ب کێمی دھێن دیتن کو خودان دیدگەھبن.

 لەورا ئەوا ل ڤی وەلاتی ھەی ب تنێ دشێم بێژم زێدەتر ژ راگەھاندنا حزبی بۆ سیبەرە و بەرەڤ بەرئەلایێ دچیت، راگەھاندنا ئازاد ژی زێدە لاوازبوویە و نێزیکی مرن و ژناڤچوونێ بوویە.